ലക്ഷ്യം ചെറുതല്ല; അഞ്ച് ബില്യണ്‍ ഡോളര്‍ വലിപ്പമുള്ള ആഗോള കമ്പനിയാകാന്‍ റോയല്‍ എന്‍ഫീല്‍ഡ്

ദില്ലി: ഇരുചക്ര വാഹനപ്രമികളുടെ ഏറ്റവും പ്രിയപ്പെട്ട നിര്‍മ്മാതാക്കളായ റോയല്‍ എന്‍ഫീല്‍ഡ് ലോകത്തെ വന്‍ സ്വാധീനമുള്ള കമ്പനിയാകാന്‍ ഒരുങ്ങുന്നു. അഞ്ച് ബില്യണ്‍ ഡോളര്‍ വലിപ്പമുള്ള കമ്പനിയാകുന്നതിന് വേണ്ടിയുള്ള ലക്ഷ്യത്തിലാണ് റോയല്‍ എന്‍ഫീല്‍ഡ്. ഇനി വരുന്ന ഓരോ സാമ്പത്തിക വര്‍ഷത്തിലും മൂന്ന് മാസം കൂടുമ്പോള്‍ ഓരോ മോഡലുകള്‍ വിപണിയില്‍ ഇറക്കി കമ്പനിയുടെ സ്വാധീനം വര്‍ദ്ധിപ്പിക്കുകയാണ് ലക്ഷ്യം.

റോയല്‍ എന്‍ഫീല്‍ഡ് എംഡി വിനോദ് ദസരിയയെ ഉദ്ധരിച്ചാണ് മാധ്യമങ്ങള്‍ ഇക്കാര്യം റിപ്പോര്‍ട്ട് ചെയ്യുന്നത്. അതേസമയം, എത്ര വര്‍ഷത്തിനുള്ളില്‍ അഞ്ച് ബില്യണ്‍ ഡോളര്‍ വലുപ്പമുള്ള കമ്പനിയാകുമെന്ന വ്യക്തമാക്കിയിട്ടില്ല. കയറ്റുമതിയിലും, ആഭ്യന്ത വിപണിയിലും കൂടുതല്‍ ശ്രദ്ധ ചെലുത്തി വിപണി കീഴടക്കുകയാണ് ലക്ഷ്യം. കൃത്യമായ പ്ലാനിങ്ങോട് അടുത്ത അഞ്ച് മുതല്‍ ഏഴ് വര്‍ഷത്തേക്ക് കമ്പനിയെ മുന്നോട്ടുകൊണ്ടു പോകാനാണ് നീക്കം.

റോയല്‍ എന്‍ഫീല്‍ഡ് സമീപ കാലത്തായി ഇറക്കിയ എല്ലാ മോഡലുകളും വിജയകരമാണെന്നാണ് കമ്പനി അവകാശപ്പെടുന്നത്. അടുത്ത കാലത്തായി പുറത്തിറക്കിയ ഹിമാലയന്‍, ആര്‍സി 650, മിറ്റിയോര്‍ എന്നിവ വലിയ രീതിയില്‍ വിറ്റു പോയെന്ന് വിനോദ് ദസരി പറയുന്നു. ഉപഭോക്താക്കള്‍ പുതിയ മോഡലുകളെ ഇരു കയ്യും നീട്ടി സ്വീകരിക്കുന്നതിലുള്ള സന്തോഷവും അദ്ദേഹം പങ്കുവച്ചു.