ആര്‍ആര്‍ബി എന്‍ടിപിസി ഗ്രാജുവേറ്റ്: സിബിടി-1 പരീക്ഷാ തീയതി പ്രഖ്യാപിച്ചു, ഔദ്യോഗിക അറിയിപ്പ് ഇതാ

നോണ്‍-ടെക്‌നിക്കല്‍ പോപ്പുലര്‍ വിഭാഗങ്ങള്‍ക്കായുള്ള (ബിരുദം) കമ്പ്യൂട്ടര്‍ അധിഷ്ഠിത പരീക്ഷയുടെ (CBT-I) താല്‍ക്കാലിക ഷെഡ്യൂള്‍ റെയില്‍വേ റിക്രൂട്ട്‌മെന്റ് ബോര്‍ഡ് പ്രഖ്യാപിച്ചു. 2026 മാര്‍ച്ച് 16 മുതല്‍ മാര്‍ച്ച് 27 വരെയാണ് പരീക്ഷ.

എന്‍ടിപിസി (Non-Technical Popular Categories) ബിരുദ തല തസ്തികകളിലേയ്ക്ക് അപേക്ഷിച്ചവര്‍ക്ക് ആര്‍ആര്‍ബി (RRB) വെബ്‌സൈറ്റുകള്‍ വഴി വിശദമായ ഷെഡ്യൂളും നിര്‍ദ്ദേശങ്ങളും പരിശോധിക്കാം.

സിബിടി-1 തീയതിയും നിയമന വിവരങ്ങളും

നോണ്‍, ടെക്‌നിക്കല്‍ പോപ്പുലര്‍ കാറ്റഗറികള്‍ (ഗ്രാജുവേറ്റ്) തസ്തികകളിലേക്കുള്ള CEN 06/2025 പ്രകാരമുള്ള ഒന്നാം ഘട്ട കമ്പ്യൂട്ടര്‍ അധിഷ്ഠിത പരീക്ഷ 2026 മാര്‍ച്ച് 16 മുതല്‍ മാര്‍ച്ച് 27 വരെയുള്ള ദിവസങ്ങളില്‍ നടക്കും. 5,810 ഒഴിവുകളിലേക്കാണ് നിയമനം.

ചീഫ് കൊമേഴ്സ്യല്‍ കം ടിക്കറ്റ് സൂപ്പര്‍വൈസര്‍, സ്റ്റേഷന്‍ മാസ്റ്റര്‍, ഗുഡ്സ് ട്രെയിന്‍ മാനേജര്‍, ജൂനിയര്‍ അക്കൗണ്ടന്റ് അസിസ്റ്റന്റ് കം ടൈപ്പിസ്റ്റ്, സീനിയര്‍ ക്ലര്‍ക്ക് കം ടൈപ്പിസ്റ്റ്, ട്രാഫിക് അസിസ്റ്റന്റ് എന്നീ തസ്തികകള്‍ ഉള്‍പ്പടെയാണിത്.

തസ്തികയെ അടിസ്ഥാനമാക്കി ലെവല്‍ 4 മുതല്‍ ലെവല്‍ 6 വരെയാണ് ശമ്പള നിലവാരം. ഉദ്യോഗാര്‍ത്ഥികള്‍ 18 നും 33 നും ഇടയില്‍ പ്രായമുള്ളവരായിരിക്കണം, പ്രായപരിധി കട്ട് ഓഫ് തീയതി 2026 ജനുവരി 1 ആണ്. ഉദ്യോഗാര്‍ത്ഥികള്‍ ജനുവരി 1 ന് 18 വയസ്സിന് മുകളിലുള്ളവരും 33 വയസ്സിന് താഴെയുള്ളവരുമായിരിക്കണം.

നിയമങ്ങള്‍ അനുസരിച്ച് പ്രായപരിധിയില്‍ ഇളവ് ലഭിക്കും. ബിരുദദാരികളായിരിക്കണം അപേക്ഷിക്കേണ്ടത്. പരീക്ഷാ നഗരം സംബന്ധിച്ച വിശദാംശങ്ങള്‍, പരീക്ഷാ തീയതി സംബന്ധിച്ച വിശദാംശങ്ങള്‍,എസ്സി, എസ്ടി ഉദ്യോഗാര്‍ത്ഥികള്‍ക്ക് ട്രാവല്‍ അതോറിറ്റി എന്നിവ ഡൗണ്‍ലോഡ് ചെയ്യുന്നതിനുമുള്ള ലിങ്ക് ആര്‍ആര്‍ബി വെബ്സൈറ്റുകളില്‍ പരീക്ഷാ തീയതിക്ക് 10 ദിവസം മുമ്പ് സജ്ജമാകും.

പരീക്ഷാ തീയതിക്ക് നാല് ദിവസം മുമ്പ് ഇ-കോള്‍ ലെറ്ററുകള്‍ ഡൗണ്‍ലോഡ് ചെയ്യാം. റിക്രൂട്ട്മെന്റ് പ്രക്രിയയെക്കുറിച്ചുള്ള അപ്ഡേറ്റുകള്‍ക്കായി ഉദ്യോഗാര്‍ത്ഥികള്‍ക്ക് ഔദ്യോഗിക ആര്‍ആര്‍ബി വെബ്സൈറ്റുകള്‍ മാത്രം പരിശോധിക്കേണ്ടതാണ്.

ഔദ്യോഗിക അറിയിപ്പ് ഇവിടെ വായിക്കുക.

ബയോമെട്രിക് പ്രാമാണീകരണവും ആധാര്‍ നിര്‍ദ്ദേശങ്ങളും

അറിയിപ്പ് പ്രകാരം, പരീക്ഷാ ഹാളില്‍ പ്രവേശിക്കുന്നതിന് മുമ്പ് ബയോമെട്രിക് പ്രാമാണീകരണം നടത്തും. ഇതിനായി ഉദ്യോഗാര്‍ത്ഥികള്‍ ആധാര്‍ കാര്‍ഡോ ഇ-വെരിഫൈഡ് ആധാറിന്റെ പ്രിന്റൗട്ടോ ഹാജരാക്കണം.

UIDAI ഡാറ്റാബേസില്‍ ആധാര്‍ അണ്‍ലോക്ക് ചെയ്തിട്ടില്ലെന്ന് അപേക്ഷകര്‍ ഉറപ്പുവരുത്തേണ്ടതുണ്ട്. CBT-I, CBT-II, കമ്പ്യൂട്ടര്‍ അധിഷ്ഠിത അഭിരുചി പരിശോധന, ടൈപ്പിംഗ് സ്‌കില്‍ ടെസ്റ്റ് (ബാധകമാകുന്നിടത്ത്), ഡോക്യുമെന്റ് വെരിഫിക്കേഷന്‍, മെഡിക്കല്‍ ടെസ്റ്റ് എന്നിവ റിക്രൂട്ട്‌മെന്റ് പ്രക്രിയയില്‍ ഉള്‍പ്പെടുന്നു.