ജില്ലാ പഞ്ചായത്ത് പ്രസിഡന്റിന്റെ ശമ്പളം 16,800; അപ്പോൾ മെമ്പറായാൽ എത്ര കിട്ടും?

തിരുവനന്തപുരം: തദ്ദേശ തെരഞ്ഞെടുപ്പ് ചൂടിലേക്ക് കൂടുതൽ അടുക്കുകയാണ് കേരളം. രണ്ട് ഘട്ടങ്ങളായി നടക്കുന്ന തെരഞ്ഞെടുപ്പിന്റെ ആദ്യ ഘട്ടം നവംബർ 9നും രണ്ടാം ഘട്ടം നവംബർ 11നുമാണ്. മൂന്ന് മുന്നണികൾക്ക് പുറമെ ചെറിയ പാർട്ടികളും സ്വതന്ത്ര സ്ഥാനാർത്ഥികളുമെല്ലാം ജയ പ്രതീക്ഷയിൽ തന്നെ. ഒരു മാസത്തോളം നീണ്ടുനിന്ന പ്രചരണ പരിപാടികളും അവസാന ഘട്ടത്തിലേക്ക് എത്തുമ്പോൾ ദിവസങ്ങൾക്കുള്ളിൽ തദ്ദേശ തലത്തിൽ നമ്മളെ നയിക്കാൻ പുതിയ നേതൃത്വം അധികാരമേൽക്കും. ഇവർ നൽകുന്ന സേവനത്തിന് പ്രതിഫലമുണ്ടെന്ന് നിങ്ങൾക്ക് എത്ര പേർക്കറിയാം? അത് എത്രയാണെന്ന് അറിയാമോ?

തദ്ദേശ സ്വയം ഭരണ സ്ഥാപനങ്ങളിലേക്ക് തെരഞ്ഞെടുക്കപ്പെടുന്ന സ്ഥാനാർത്ഥികൾക്ക് ശമ്പളമില്ല എന്നതാണ് വസ്തുത. അവർക്ക് കിട്ടുന്ന പ്രതിഫലത്തെ ഓണറേറിയം എന്നാണ് പറയുന്നു. ത്രിതല പഞ്ചായത്തുകൾക്ക് പുറമെ മുനിസിപ്പാലിറ്റികളിലേക്കും കോർപ്പറേഷനിലേക്കും നടക്കുന്ന തെരഞ്ഞെടുപ്പിനെയാണ് തദ്ദേശ സ്വയം ഭരണ തെരഞ്ഞെടുപ്പ് എന്ന് പറയുന്നത്. ഇവിടങ്ങളിലേക്കി തെരഞ്ഞെടുക്കപ്പെടുന്നവരിൽ ഏറ്റവും കൂടുതൽ ഓണറേറിയം ജില്ലാ പഞ്ചായത്ത് പ്രസിഡന്റിനാണ് ലഭിക്കുന്നത്. കുറവ് ഓണറേറിയം ലഭിക്കുന്നത് പഞ്ചായത്ത് മെമ്പർമാർക്കുമാണ്. ഭരണ സ്ഥാപനങ്ങൾ തിരിച്ചുള്ള പ്രതിഫല കണക്ക് പരിശോധിക്കാം.

ഗ്രാമ പഞ്ചായത്ത് - ഗ്രാമ പഞ്ചായത്തിലേക്ക് ഓരോ വാർഡിൽ നിന്നും തെരഞ്ഞെടുക്കപ്പെടുന്ന മെമ്പർമാർക്ക് 8,000 രൂപയാണ് ഒരു മാസം ഓണറേറിയമായി ലഭിക്കുന്നത്. ഇവരിൽ നിന്നും സ്റ്റാൻഡിംഗ് കമ്മിറ്റി അധ്യക്ഷ സ്ഥാനത്തേക്ക് തെരഞ്ഞെടുക്കപ്പെടുന്നവർക്ക് 9,200 രൂപയും വൈസ് പ്രസിഡന്റ് സ്ഥാനത്തേയ്ക്ക് തെരഞ്ഞെടുക്കപ്പെടുന്നവർക്ക് 11,600 രൂപയും ലഭിക്കുന്നു. പ്രസിഡന്റാണെങ്കിൽ ഓണറേറിയമായി ലഭിക്കുക 14,200 രൂപയാണ്.

ബ്ലോക്ക് പഞ്ചായത്ത് - ബ്ലോക്ക് പഞ്ചായത്തിലേക്ക് തെരഞ്ഞെടുക്കപ്പെടുന്ന മെമ്പറുടെ പ്രതിഫലം 8,600 രൂപയാണ്. അതേസമയം സ്റ്റാൻഡിംഗ് കമ്മിറ്റി ചെയർപേഴ്സൺ ആണെങ്കിൽ 9800 രൂപ ലഭിക്കും. വൈസ് പ്രസിഡന്റിന് 13,000 രൂപയും പ്രസിഡന്റിന് 15,600 രൂപയുമാണ് പ്രതിഫലം.

നഗരസഭ - നഗരസഭകളിലും ബ്ലോക്ക് പഞ്ചായത്തിലേതിന് സമാനമായ പ്രതിഫലം ജനപ്രതിനിധികൾക്ക് ലഭിക്കുന്നു. നഗരസഭ കൗൺസിലറായി തെരഞ്ഞെടുക്കപ്പെടുന്നയാൾക്ക് 8,600 രൂപ ലഭിക്കുമ്പോൾ സ്റ്റാൻഡിംഗ് കമ്മിറ്റി ചെയർപേഴ്സണ് 9800 രൂപ ലഭിക്കും. വൈസ് ചെയർമാൻ സ്ഥാനത്തേക്ക് തെരഞ്ഞെടുക്കപ്പെടുന്നയാൾക്ക് 13,000 രൂപയും അധ്യക്ഷനാണെങ്കിൽ 15,600 രൂപയും ലഭിക്കുന്നു.

കോർപ്പറേഷൻ - കോർപ്പറേഷനിലേക്ക് വരുമ്പോൾ പ്രധാന പദവികളിൽ ശമ്പള വർധനവ് കാണാം. എന്നാൽ കൗൺസിലർക്കും സ്റ്റാൻഡിംഗ് കമ്മിറ്റി ചെയർപേഴ്സണും നഗരസഭകളിലേതിനേക്കാൾ കുറഞ്ഞ തുകയാണ് പ്രതിഫലമായി ലഭിക്കുന്നത്. കൗൺസിലർക്ക് 8,200 രൂപയും സ്റ്റാൻഡിംഗ് കമ്മിറ്റി ചെയർപേഴ്സണ് 9,400 രൂപയും ലഭിക്കുന്നു. ഡെപ്യൂട്ടി മേയർക്ക് 13,200 രൂപ ലഭിക്കുമ്പോൾ മേയറുടെ ഓണറേറിയം 15,800 രൂപയാണ്.

ജില്ലാ പഞ്ചായത്ത് - ജില്ലാ പഞ്ചായത്ത് അംഗത്തിന്റെ പ്രതിഫലം 9,800 രൂപയാണ്. സ്റ്റാൻഡിംഗ് കമ്മിറ്റി ചെയർപേഴ്സൺ ആണെങ്കിൽ 10,400 രൂപയും വൈസ് പ്രസിഡന്റാണെങ്കിൽ 14,200 രൂപയും ലഭിക്കുന്നു. പ്രസിഡന്റിന് 16,800 രൂപയാണ് പ്രതിഫലം.