വിപണിയിൽ വെള്ളി വിലസുന്നു: വില ഒരു ലക്ഷം കടന്നു: സ്വർണ്ണത്തെ കടത്തി വെട്ടുമോ ഈ പോക്ക് പോയാൽ

വെള്ളി വിലയിൽ വലിയ മുന്നേറ്റമാണ് സ്വർണ്ണത്തിനൊപ്പം കഴിഞ്ഞ കുറെ മാസങ്ങളായി ഉണ്ടായിക്കൊണ്ടിരിക്കുന്നത്. കഴിഞ്ഞ ആഴ്ചയിലെ
വെള്ളി വിപണിയിൽ ഇടിവ് രേഖപ്പെടുത്തിയെങ്കിലും സ്വർണ്ണത്തിനൊപ്പം തന്നെ വെള്ളിയും വലിയ നിലയിലേക്ക് ഉയരും എന്നാണ് വിദഗ്ധർ വിലയിരുത്തുന്നത്. മാർച്ച് 20-ന് 1 കിലോ വെള്ളിയുടെ വില ₹1,05,100 ആയിരുന്നപ്പോൾ, ആഴ്ചയുടെ അവസാനത്തിൽ വില നേരിയ തിരുത്തലിന് വിധേയമായി. വെള്ളിയാഴ്ച, മാർച്ച് 28, 2025-ന് വില ₹1,01,522 ആയിട്ടാണ് ക്ലോസ് ചെയ്തത്. മെയ് ഡെലിവറിക്കായി എം സി എക്സിൽ വെള്ളി വില ₹209 (0.21%) വർദ്ധിച്ച് 22,870 ലോറ്റുകളുടെ വ്യാപാരത്തോടെയാണ് അവസാനിച്ചത്.

കഴിഞ്ഞ ആഴ്ചയിലുണ്ടായ വിപണി പ്രവണതകളും പ്രവചനങ്ങളും

വെള്ളിയുടെ വില മാർച്ച് 20-ന് ₹1,05,100 വരെ ഉയർന്നെങ്കിലും അതിനു ശേഷം ഇടയ്ക്കു നേരിയ കുറവ് അനുഭവപ്പെട്ടു. എന്നാൽ ആഴ്ചാവസാനത്തിൽ വീണ്ടും വാങ്ങൽ ആഗ്രഹം ശക്തിപ്പെട്ടതോടെ വെള്ളി വില ഉയർന്നു.

ആഗോള വിപണിയിലും വെള്ളി ശക്തമായ പ്രകടനമാണ് കാഴ്ചവച്ചത്. ന്യൂയോർക്കിൽ വെള്ളിയുടെ വില 1% ഉയർന്ന് ഔൺസിന് $35.42 ആയി. സാമ്പത്തിക വർഷം 2025-ൽ വെള്ളി മികച്ച മടക്കം നൽകുന്ന നിക്ഷേപ ഘടകമായി തുടരുന്നു. ഈ സാമ്പത്തിക വർഷം ഇതുവരെ 35.56% നേട്ടം ഈ ലോഹം നൽകി, ഗോൾഡിനെ (+31.37%), നിഫ്റ്റിയെ (+5.29%), സെൻസെക്സ് (+4.96%) എന്നിവയെ മറികടക്കുകയാണ് വെള്ളിയുടെ പ്രകടനം.

വിദഗ്ധരുടെ പ്രവചനം: വെള്ളി ചരിത്രം തിരുത്തുമോ?

സിറ്റി ബാങ്കിന്റെ ഗ്ലോബൽ കമോഡിറ്റീസ് തലവൻ മാക്‌സ് ലെയ്ടട്ടന്റെ വിലയിരുത്തൽ പ്രകാരം വെള്ളി അടുത്ത 3-6 മാസത്തേക്ക് ഔൺസിന് $34-$35 നിരക്കിൽ വ്യാപാരം പുരോഗമിക്കാനാണ് സാധ്യത. ഓഗ്മോണ്ട് നടത്തിയ പഠന പ്രകാരം വെള്ളിയുടെ വില $35 ഔൺസിന് മുകളിലേക്ക് കടന്നതോടെ അടുത്ത പ്രതിരോധ നിരക്ക് $38 എന്നതാണെന്ന് സൂചിപ്പിക്കുന്നു.

വെള്ളിയിൽ നിക്ഷേപം എങ്ങനെ നടത്താം?

മോത്തിലാൽ ഓസ്വാൾ പറയുന്നത് അനുസരിച്ച്, ആഗോള സാമ്പത്തിക അനിശ്ചിതത്വം ഉള്ളതിനാൽ വെള്ളിയിൽ 'ഡിപ്പിൽ വാങ്ങുക' എന്ന തന്ത്രം ഉപയോഗിക്കാവുന്നതാണ്. ഗോൾഡ്, സിൽവർ ഇടിഎഫുകൾ ഇപ്പോൾ വളരെയധികം പ്രചാരത്തിലുള്ള നിക്ഷേപ മാർഗമാണ്.

വെള്ളി വളർച്ചയിൽ ഗോൾഡിനെ ഓവർടേക്ക് ചെയ്യും?

ഭൗതിക വിപണിയിലെ അനിശ്ചിതത്വം, വ്യാപാര സംഘർഷങ്ങൾ, പണപ്പെരുപ്പം തുടങ്ങിയ ഘടകങ്ങൾ വെള്ളിയുടെ ഡിമാന്റ് വർദ്ധിപ്പിക്കുമെന്നും, ഇതുമൂലം വെള്ളി വിലയിൽ ഒരു ബുള്ളിഷ് പ്രവണത തുടരുമെന്നും വിദഗ്ദ്ധർ പ്രവചിക്കുന്നു. യു.എസ് ഫെഡറൽ പോളിസികൾ, ഡോളർ മൂല്യവ്യാപ്തി, വ്യാവസായിക ആവശ്യങ്ങൾ എന്നിവയും വെള്ളിയുടെ ഭാവി വിലയെയും വിപണിയെയും ബാധിച്ചേക്കാം.

വെള്ളി ഈ സാമ്പത്തിക വർഷം മികച്ച മടക്കം നൽകുന്ന നിക്ഷേപ മാർഗമായി തുടരുന്നു. വിലയിലുണ്ടാകുന്ന ഉയർച്ചകളെയും ഇടിവുകളെയും ഗുണകരമായി ഉപയോഗിച്ച് നിക്ഷേപകർ മാർക്കറ്റിൽ അവസരങ്ങൾ തേടിയാൽ, മികച്ച ലാഭം നേടാൻ സാധ്യതയുണ്ട്. അതിനാൽ, വിപണി ട്രെൻഡുകൾ നിരീക്ഷിച്ചുകൊണ്ടുള്ള ബുദ്ധിപരമായ നിക്ഷേപം ആവശ്യമാണ്.

വെള്ളി ഭാവി നിർണയിക്കും?

സ്വർണ്ണം പോലെ തന്നെ വെള്ളിയും വലിയൊരു സമ്പാദ്യ മാർഗ്ഗമായിട്ടാണ് ഇപ്പോൾ വളർന്നുകൊണ്ടിരിക്കുന്നത്. അനുദിനം വളർച്ച രേഖപ്പെടുത്തുന്നത് കൊണ്ട് തന്നെ വെള്ളിയിൽ നിക്ഷേപിക്കുന്നതിലൂടെ നല്ലൊരു ലാഭം നിങ്ങൾക്ക് നേടിയെടുക്കാൻ കഴിയുന്നതാണ്. എന്നാൽ എപ്പോഴാണ് മാർക്കറ്റിൽ വിളിക്കു വിലയിടിയുന്നത് അപ്പോഴാണ് നിങ്ങൾ വാങ്ങേണ്ട മികച്ച സമയം. നിക്ഷേപങ്ങൾക്കും അത് പിൻവലിക്കുന്നതിനും വിദഗ്ധരുടെ അഭിപ്രായം തേടുന്നത് എപ്പോഴും നല്ലതായിരിക്കും.