സ്വർണത്തിന് പിന്നാലെ പാഞ്ഞ് വെള്ളിയും, ഒരു മാസത്തിനുള്ളിൽ 25% വില വർദ്ധനവ്, ഇന്നത്തെ നിരക്ക് അറിയാം

ഇന്ത്യൻ വിപണിയിൽ ഇന്ന് വെള്ളി നിരക്ക് കുത്തനെ ഉയർന്നു. ഇത് വെള്ളി വിലയിലെ സമീപകാല നേട്ടങ്ങൾ വർദ്ധിപ്പിച്ചു. ഇന്ന്, എം‌സി‌എക്‌സിൽ സിൽവർ ഫ്യൂച്ചറുകൾ 817 രൂപ അല്ലെങ്കിൽ 1.6 ശതമാനം ഉയർന്ന് കിലോയ്ക്ക് 51,000 രൂപയിലെത്തി. വെള്ളിയാഴ്ച വെള്ളി നിരക്ക് കിലോയ്ക്ക് 1,500 രൂപ ഉയർന്നിരുന്നു. രാജ്യങ്ങൾ തങ്ങളുടെ സമ്പദ്‌വ്യവസ്ഥ വീണ്ടും തുറക്കുമ്പോൾ ലോഹത്തിന്റെ വ്യാവസായിക ആവശ്യം പുനരുജ്ജീവിപ്പിക്കുമെന്ന ശുഭാപ്തിവിശ്വാസമാണ് വെള്ളിയുടെ വിലയിലുണ്ടായ വർദ്ധനവിന് കാരണമെന്ന് വിശകലന വിദഗ്ധർ പറഞ്ഞു.

വില കൂടാൻ കാരണം

സമ്പദ്‌വ്യവസ്ഥ പുനരാരംഭിക്കാനുള്ള ആഗോള ശ്രമങ്ങൾ വെള്ളിയുടെ ആവശ്യം വർദ്ധിപ്പിക്കുമെന്നും പ്രതിസന്ധി ഘട്ടത്തിൽ സ്വർണവുമായി താരതമ്യപ്പെടുത്തുമ്പോൾ വെള്ളിയുടെ നിർമ്മാണ ചെലവ് എക്കാലത്തേയും താഴ്ന്ന നിലയിലാണെന്നും എന്നാൽ വില ശക്തമായി ഉയരാൻ സാധ്യതയുണ്ടെന്നും വിശകലന വിദഗ്ധർ പറയുന്നു.

മേയിലെ നേട്ടം

സ്വർണം, വെള്ളി അനുപാതം 114 (2020 മെയ് 1) ൽ നിന്ന് 97 ആയി കുറഞ്ഞതിനാൽ എംസിഎക്സ് വെള്ളി വില 50,000 രൂപ മറികടന്നു. എം‌സി‌എക്‌സിലെ വെള്ളി വില മെയ് മാസത്തിൽ 23% നേട്ടമുണ്ടാക്കി. വില ഏതാനും ദിവസങ്ങൾ കൂടി ഉയരാനാണ് സാധ്യതയെന്ന് നിരീക്ഷകർ പറയുന്നു.

സ്വർണ വില

വെള്ളിയുമായി താരതമ്യപ്പെടുത്തുമ്പോൾ, കഴിഞ്ഞ ഒരു മാസത്തിനിടയിൽ സ്വർണ വില ഉയർന്നു തന്നെയാണ് നിൽക്കുന്നത്. കാര്യമായ മാറ്റങ്ങളില്ല. നിലവിൽ, എംസിഎക്സ് ഗോൾഡ് ഫ്യൂച്ചേഴ്സ് 10 ഗ്രാമിന് 47,000 രൂപയ്ക്കടുത്താണ് വ്യാപാരം നടത്തുന്നത്.

ആഗോള വിപണി

ആഗോള വിപണിയിൽ വെള്ളി വില ഇന്ന് ഔൺസിന് 2 ശതമാനം ഉയർന്ന് 18.20 ഡോളറിലെത്തി. ഫെബ്രുവരി 26 ന് ശേഷമുള്ള ഏറ്റവും ഉയർന്ന നിരക്കാണിത്. ഫെബ്രുവരിയിൽ 1.8 ശതമാനം ഉയർന്ന് 18.16 ഡോളറിലെത്തിയിരുന്നു. സ്വർണ്ണത്തെയും അതുവഴി വെള്ളിയുടെ വിലയെയും നിലവിൽ പിന്തുണയ്ക്കുന്നത് യുഎസ്-ചൈന പിരിമുറുക്കമാണ്.