ഡിസംബറിൽ ഇന്ത്യൻ കയറ്റുമതിയിൽ നേരിയ വർധനവ്, പ്രതീക്ഷയ്ക്ക് വക

2020 ഡിസംബറിൽ ഇന്ത്യയുടെ കയറ്റുമതിയിൽ നേരിയ വർധനവ്. കയറ്റുമതി 27.15 ബില്യൺ ഡോളറായി ഉയർന്നു. ഇറക്കുമതി 7.56 ശതമാനം ഉയർന്ന് 42.59 ബില്യൺ ഡോളറിലെത്തി. ചരക്ക് കയറ്റുമതി 2019 ഡിസംബറിൽ 27.11 ബില്യൺ ഡോളറായിരുന്നു. ഇറക്കുമതി 39.59 ബില്യൺ ഡോളറായിരുന്നു.

സർക്കാർ കണക്കുകൾ പ്രകാരം, 2020 ഡിസംബറിലെ വ്യാപാരക്കമ്മി 15.44 ബില്യൺ ഡോളറായി കണക്കാക്കപ്പെടുന്നു. ഇത് 2019 ഡിസംബറിലെ 12.49 ബില്യൺ ഡോളർ കമ്മിയേക്കാൾ 23.66 ശതമാനം വർദ്ധിച്ചിട്ടുണ്ട്. 2020-21 ഏപ്രിൽ-ഡിസംബർ കാലയളവിൽ ഇന്ത്യയുടെ മൊത്തം കയറ്റുമതി (ചരക്കുകളും സേവനങ്ങളും) 348.49 ബില്യൺ ഡോളറായി കണക്കാക്കപ്പെടുന്നു. ഇത് കഴിഞ്ഞ വർഷത്തെ ഇതേ കാലയളവിനെ അപേക്ഷിച്ച് 12.65 ശതമാനം കുറവാണ്.

ഡിസംബറിൽ ഇന്ത്യൻ കയറ്റുമതിയിൽ നേരിയ വർധനവ്, പ്രതീക്ഷയ്ക്ക് വക — export india

ഏപ്രിൽ മുതൽ ഡിസംബർ വരെയുള്ള മൊത്തം ഇറക്കുമതി 25.86 ശതമാനം ഇടിഞ്ഞ് 343.27 ബില്യൺ ഡോളറിലെത്തി. കയറ്റുമതിയും ഇറക്കുമതിയും വളർച്ച കാണിക്കുന്ന ഡിസംബർ മാസത്തെ വ്യാപാര ഡാറ്റ മികച്ച പ്രതീക്ഷ നൽകുന്നതായി എക്‌സിം ബാങ്ക് ഇന്ത്യ ചീഫ് ജനറൽ മാനേജർ പ്രഹലതൻ അയ്യർ പറഞ്ഞു. പെട്രോളിയം ഇതര, ജ്വല്ലറി ഇതര കയറ്റുമതിയുടെ വളർച്ച 5.5 ശതമാനമാണ്. ഇത് രാജ്യത്തെ ഉൽ‌പാദന പ്രവർത്തനങ്ങളിലെ വർദ്ധനവിനെ സൂചിപ്പിക്കുന്നു.

മൊത്തം കയറ്റുമതിയിൽ 0.14 ശതമാനം നേട്ടമുണ്ടായപ്പോൾ ഡിസംബർ മാസത്തെ ഇറക്കുമതി 7.56 ശതമാനത്തിന്റെ വളർച്ചയാണ് രേഖപ്പെടുത്തിയത്. എഞ്ചിനീയറിംഗ് ചരക്ക് കയറ്റുമതിയിൽ 0.3 ശതമാനം വളർച്ച രേഖപ്പെടുത്തി. സേവന കയറ്റുമതിയുടെ 2020 ഡിസംബറിലെ മൂല്യം 17.31 ബില്യൺ ഡോളറാണ്. 2020 ഡിസംബറിലെ സേവന ഇറക്കുമതിയുടെ മൂല്യം 10.32 ബില്യൺ ഡോളറാണ്.