ബെഗളൂരുവിലെ സ്ത്രീകള്‍ക്ക് കരുത്തേകാന്‍ ശക്തി കാര്‍ഡ്: ബസ്, മെട്രോ സൗജന്യയാത്രയുള്‍പ്പെടെ ആനുകൂല്യങ്ങള്‍

ബെംഗളൂരുവിലെ സ്ത്രീകള്‍ക്ക് ഇനി ബസ്സിലും മെട്രോയിലും വെവ്വേറെ ടിക്കറ്റ് എടുക്കേണ്ടിവരില്ല. ബിഎംടിസി ബസുകളിലും മെട്രോകളിലും യാത്ര സാധ്യമാക്കുന്ന ശക്തി സ്‌ക്കീം ഐഡി സ്മാര്‍ട്ട് കാര്‍ഡുകള്‍ പുറത്തിറക്കുകയാണ് സംസ്ഥാന സര്‍ക്കാര്‍.

ഈ സ്മാര്‍ട്ട് മൊബിലിറ്റി കാര്‍ഡ് ഉപയോഗിക്കുന്നവര്‍ക്ക് ബിഎംടിസി ബസുകളില്‍ യാത്ര സൗജന്യമായിരിക്കും. എന്നാല്‍ മെട്രോ സേവനങ്ങള്‍ക്കായി കാര്‍ഡ് റീ ചാര്ജ്ജ് ചെയ്യേണ്ടതുണ്ട്.

പദ്ധതിക്ക് സംസ്ഥാന മന്ത്രിസഭ അംഗീകാരം നല്‍കി.കാര്‍ഡുകള്‍ പൗര സേവന കേന്ദ്രങ്ങള്‍ വഴിയും ഓണ്‍ലൈനായും വിതരണം ചെയ്യും. യോഗ്യരായ ഗുണഭോക്താക്കള്‍ക്ക് കാര്‍ഡുകള്‍ സൗജന്യമായി നല്‍കുമെന്ന് ഗതാഗത മന്ത്രി രാമലിംഗ റെഡ്ഡി പറഞ്ഞു.

സൗജന്യ യാത്രാ പദ്ധതി
നാല് സംസ്ഥാന ഗതാഗത കോര്‍പ്പറേഷനുകളുടെ ബസുകള്‍ നിലവില്‍ സ്ത്രീകള്‍ക്ക് സൗജന്യ യാത്ര അനുവദിക്കുന്നുണ്ട്. പ്രതിദിനം 75 ലക്ഷത്തിലധികം സ്ത്രീകള്‍ സൗജന്യയാത്ര നടത്തുന്നു. ബെംഗളൂരുവില്‍ മാത്രം, ഇത് ഏകദേശം 22 മുതല്‍ 24 ലക്ഷം വരെ വരും.

നിലവില്‍ ആധാര്‍ കാര്‍ഡുപയോഗിച്ചാണ് സ്ത്രീകള്‍ യാത്ര ചെയ്യുന്നത്. ശക്തി കാര്‍ഡുകള്‍ വരുന്നതോടെ അവ ആധാറുകള്‍ക്ക് പകരമാകുമെന്ന്‌ റിപ്പോര്‍ട്ട് പറഞ്ഞു. ശക്തി കാര്‍ഡ് ടിക്കറ്റ് മെഷീനുകളില്‍ സൈ്വപ്പ് ചെയ്ത് യാത്ര സാധ്യമാക്കാം.

പരീക്ഷാ സമയത്ത് പി.യു.സി വിദ്യാര്‍ത്ഥികള്‍ക്ക് സൗജന്യ യാത്ര
അനുബന്ധമായി, കര്‍ണാടക സ്റ്റേറ്റ് റോഡ് ട്രാന്‍സ്‌പോര്‍ട്ട് കോര്‍പ്പറേഷന്‍ പ്രീ-യൂണിവേഴ്‌സിറ്റി കോഴ്സ് അല്ലെങ്കില്‍ പി.യു.സി വിദ്യാര്‍ത്ഥികള്‍ക്ക് പരീക്ഷാ കാലയളവില്‍ സൗജന്യ ബസ് യാത്ര പ്രഖ്യാപിച്ചു. ഫെബ്രുവരി 28 മുതല്‍ മാര്‍ച്ച് 17 വരെ ഈ സൗകര്യം ലഭ്യമാകും.

പി.യു.സി വിദ്യാര്‍ത്ഥികള്‍ക്ക് പരീക്ഷാ ഹാള്‍ ടിക്കറ്റ് കാണിച്ച് ഓര്‍ഡിനറി, എക്‌സ്പ്രസ് കെ.എസ്.ആര്‍.ടി.സി സര്‍വീസുകളില്‍ സൗജന്യ യാത്ര ചെയ്യാം.
കര്‍ണാടക സ്‌കൂള്‍ പരീക്ഷാ ആന്‍ഡ് അസസ്മെന്റ് ബോര്‍ഡ് ചെയര്‍മാന്റെ അഭ്യര്‍ത്ഥനയെ തുടര്‍ന്നാണ് തീരുമാനം.