'അക്കൗണ്ടിൽ 3500 രൂപ'; ലിങ്കിൽ തൊട്ട് പോകരുത്, പണം അപഹരിക്കും.. പുതിയ തട്ടിപ്പ്, മുന്നറിയിപ്പ്

കൊച്ചി; ഓൺലൈൻ പണമിടപാടുകൾ ഉയർന്നതോടെ ഓൺലൈൻ വഴിയുള്ള തട്ടിപ്പുകളും വ്യാപകമായിട്ടുണ്ട്. കോടികൾ വരെ ഓൺലൈൻ തട്ടിപ്പിലൂടെ നഷ്ടമായ സംഭവങ്ങൾ വാർത്തയായിട്ടുണ്ട്. ഇപ്പോഴിതാ മറ്റൊരു തട്ടിപ്പാണ് വ്യാപകമായിരിക്കുന്നത്. അക്കൗണ്ടിലേക്ക് പണം ക്രെഡിറ്റായെന്ന് കാണിച്ചാണ് തട്ടിപ്പ് സംഘം ആളുകളെ കുടുക്കുന്നത്. ഇതിനെതിരെ മുന്നറിയിപ്പുമായി പോലീസും രംഗത്തെത്തിയിട്ടുണ്ട്.

അക്കൗണ്ടിൽ 3500 രൂപ വന്നതായാണ് സന്ദേശം വരിക. വിശദ വിവരങ്ങളറിയാന്‍ താഴെയുള്ള ലിങ്കിൽ ക്ലിക്ക് ചെയ്യണമെന്നും സന്ദേശത്തിൽ ആവശ്യപ്പെടും.ലർക്ക് ഉയർന്ന തുക രേഖപ്പെടുത്തിയ സന്ദേശങ്ങളും വരുന്നുണ്ട്. എന്നാൽ ലിങ്കിൽ യാതൊരു കാരണവശാലും ക്ലിക്ക് ചെയ്യരുതെന്നാണ് പോലീസ് മുന്നറിയിപ്പ് നൽകുന്നത്.

ലിങ്കിൽ ക്ലിക്ക് ചെയ്താൽ അപ്പോൾ പണം നഷ്ടമാകുമത്രേ.രാജസ്ഥാൻ കേന്ദ്രീകരിച്ച് പ്രവര്‍ത്തിയ്ക്കുന്ന സംഘമാണ് പണം തട്ടിപ്പിന് പിന്നിൽ. നിരവധി പേർക്കാണ് ദിവസവും ഇത്തരത്തിൽ സന്ദേശം ലഭിക്കുന്നതെന്ന് പോലീസ് പറയുന്നു.അവസാനം നടത്തിയ പണം ഇടപാടുകളുടെ വിവരങ്ങൾ ചോര്‍ത്തി നടത്തുന്ന സംഭാഷണങ്ങൾക്കൊടുവിൽ ക്യൂആര്‍ കോഡ് സ്കാൻ ചെയ്യാൻ ആവശ്യപ്പെട്ടിട്ടുള്ള സന്ദേശങ്ങളും വ്യാപകമാവുന്നുണ്ട്.അക്കൗണ്ടിൽനിന്ന് പണം നഷ്ടപ്പെടാൻ ഇതു കാരണമാകുമെന്നും പോലീസ് മുന്നറിയിപ്പ് നൽകുന്നുണ്ട്.