ഇനി യാത്രാ ദുരിതമില്ല, മെമു കോച്ചുകളുടെ എണ്ണം വര്‍ദ്ധിപ്പിച്ചു, ട്രെയ്ന്‍ പരിശോധിക്കാം

മെട്രോ നഗരങ്ങളിലേയ്ക്ക് ദൈനംദിന യാത്രകള്‍ നടത്തുന്നവര്‍ നിരവധിയാണ്. പ്രത്യേകിച്ചും വിദൂര പ്രദേശങ്ങളിലുള്ള വിദ്യാര്‍ത്ഥികളും ജോലിക്കാരും. പരിമിത എണ്ണം ട്രെയ്‌നുകളും ലോക്കല്‍ കമ്പാര്‍ട്ട്‌മെന്റുകളുടെ കുറവും ഈ യാത്രകളെ ദുരിതപൂര്‍ണ്ണമാക്കുന്നു. ഇതിനൊരാശ്വാസമായെത്തിയ മെമു ട്രെയ്‌നുകളിലും ഇപ്പോള്‍ നല്ല തിരക്കാണ്.

ആവര്‍ത്തിച്ചുള്ള പ്രതിഷേധങ്ങള്‍ക്കും നിവേദനങ്ങള്‍ക്കുമൊടുവില്‍ മെമു ട്രെയ്‌നുകളില്‍ അധിക കോച്ചുകള്‍ ഉള്‍പ്പെടുത്താന്‍ ദക്ഷിണ റെയില്‍വേ സമ്മതിച്ചു. ഫെബ്രുവരി 23 മുതല്‍ പാലക്കാട്-എറണാകുളം-പാലക്കാട് മെമു(66609/10), കൊല്ലം-എറണാകുളം (06169/70) മെമു, കൊല്ലം-കോട്ടയം (66316/15) മെമു ട്രെയ്‌നുകളില്‍ കോച്ചുകളുടെ എണ്ണം 12 ആകും.

പാലക്കാട്-എറണാകുളം മെമു
രാവിലെ 8.30 ന് പാലക്കാട് നിന്നും പുറപ്പെട്ട് ഉച്ചയ്ക്ക് 12.30 ന് എറണാകുളത്ത് എത്തുന്ന ട്രെയ്‌നിന് നിരവധി സ്‌റ്റോപ്പുകളുണ്ട്. പാസഞ്ചര്‍, എക്‌സ്പ്രസ് ട്രെയ്‌നുകളെ ആശ്രയിക്കാതെ വേഗത്തില്‍ എറണാകുളത്തെത്താന്‍ ഇതുവഴിയാകും. മലപ്പുറം, കോഴിക്കോട് ഭാഗത്തുനിന്നും വന്ന് തൃശൂരില്‍ ട്രെയ്ന്‍ കാത്തുനില്‍ക്കുന്നവര്‍ക്കും ഈ ട്രെയ്ന്‍ ഉപകാരപ്പെടുന്നു.

തിരിച്ച് എറണാകുളത്ത് നിന്നും വൈകീട്ട് 3.10 നാണ് വണ്ടി പുറപ്പെടുക. വൈകീട്ട് 7.25 ന് പാലക്കാടെത്തും. മലപ്പുറം, കോഴിക്കോട് ഭാഗത്തുള്ളവര്‍ക്ക് തൃശൂരില്‍
ഇറങ്ങി ബസ് പിടിക്കാവുന്നതാണ്. എല്ലാ ദിവസവും സര്‍വീസ് നടത്തുന്നതും ഗുണമാണ്.

കോട്ടയം-കൊല്ലം-കോട്ടയം മെമു വൈകീട്ട് 6 ന് കോട്ടയത്ത് നിന്ന് പുറപ്പെട്ട് വൈകീട്ട് 8.40 ന് കൊല്ലം ജംഗ്ഷനിലെത്തും. രാവിലെ 9.15 ന് കൊല്ലത്തു നിന്നും പുറപ്പെട്ട് ഉച്ചയ്ക്ക് 12.10 നാണ് ട്രയ്ന്‍ കോട്ടയത്തെത്തുക. കരുനാഗപ്പള്ളി, കായംകുളം, ചെങ്ങന്നൂര്‍, ചങ്ങനാശ്ശേരി എന്നിവയാണ് പ്രധാന സ്റ്റോപ്പുകള്‍.

കൊല്ലം-എറണാകുളം ജംഗ്ഷന്‍ മെമു രാവിലെ 5.55 ന് കൊല്ലത്തുനിന്നും പുറപ്പെട്ട് രാവിലെ 9.30 ന് എറണാകുളത്തെത്തും. പിറവം റോഡ്, കോട്ടയം, ചെങ്ങന്നൂര്‍, കായംകുളം എന്നിവയാണ് പ്രധാന സ്റ്റേഷനുകള്‍. തിരിച്ച് രാവിലെ 9.50 ന് എറണാകുളത്തുനിന്ന് പുറപ്പെട്ട് ഉച്ചയ്ക്ക് 1.30 ന് കൊല്ലത്തെത്തും.

തിരക്ക്

പാലക്കാട്-എറണാകുളം മെമുവില്‍ 610 സീറ്റുകളാണുള്ളത്. അതേസമയം പ്രതിദിനം 3,000-ത്തിലധികം യാത്രക്കാര്‍ സര്‍വീസ് ഉപയോഗപ്പെടുത്തുന്നു.തിരക്ക് കൂടിയതിനെത്തുടര്‍ന്ന് റെയില്‍ പാസഞ്ചേഴ്സ് അസോസിയേഷന്റെ നേതൃത്വത്തില്‍ പാര്‍ലമെന്റ് അംഗങ്ങള്‍ ഇടപടെട്ടതിനെത്തുടര്‍ന്നാണ് റെയില്‍വേ നടപടി.