മലയാളികൾക്ക് ആശ്വാസം, ക്രിസ്മസിന് നാട്ടിലെത്താം, കേരളത്തിലേക്ക് സ്പെഷ്യൽ ട്രെയിനുകൾ പ്രഖ്യാപിച്ച് റെയിൽവേ

കേരളത്തിന് പുറത്തുള്ളവരുടെ ഏറ്റവും വലിയ ആശങ്ക എന്നത് ക്രിസ്മസ്-ന്യൂ ഇയർ അവധിക്ക് എങ്ങനെ നാട്ടിലെത്തും എന്നതാണ്. കാരണം ഈ സമയത്തെ ട്രെയിനുകളിലെ സീറ്റുകൾ എല്ലാം ബുക്കിംഗ് ഫുള്ളാണ്. വിമാന ടിക്കറ്റ് നിരക്കാണെന്നും കഴുത്തറുപ്പനും. ഈ സാഹചര്യത്തിലാണ് ദക്ഷിണ റെയിൽവേ സഹായത്തിനെത്തുന്നത്. കേരളത്തിലെ വിവിധ സ്റ്റേഷനുകളിലേക്ക് ക്രിസ്തുമസ് - പുതുവത്സര സ്പെഷ്യൽ ട്രെയിനുകൾ പ്രഖ്യാപിച്ച് ദക്ഷിണ റെയിൽവേ.

ഏതൊക്കെ ജില്ലകൾ

തിരുവനന്തപുരം, കോട്ടയം, കൊല്ലം തുടങ്ങി വിവിധ സ്റ്റേഷനുകളിലേക്കാണ് പ്രത്യേക ട്രെയിൻ സർവീസുകൾ. ഒരു സർവീസ് മുതൽ നാല് സർവീസുകൾ വരെയാണ് ദക്ഷിണ റെയിൽവേ പ്രഖ്യാപിച്ചിരിക്കുന്നത്. ലോകമാന്യ തിലക് - തിരുവനന്തപുരം നോർത്ത് സ്റ്റേഷനുകൾക്കിടയിൽ 8 പ്രത്യേക സർവീസുകൾ നടത്തും. രണ്ട് ട്രെയിനുകളാണ് ഈ റൂട്ടിൽ സർവീസ് നടത്തുക. ഇരു വശത്തേക്കും നാല് സർവീസുകൾ വീതം നടത്തും. 01171, 01172 എന്നീ നമ്പരിലുള്ളതാണ് ഈ ട്രെയിനുകൾ.

കോട്ടയം - വഡോദര റൂട്ടുകളിൽ ഇരുവശത്തേക്കും നാല് സർവീസുകൾ വീതം എട്ട് പ്രത്യേക സർവീസുകൾ പ്രഖ്യാപിച്ചിട്ടുണ്ട്. 09124, 09123 ആണ് ട്രെയിൻ നമ്പർ. തിരുവനന്തപുരം നോർത്തിൽ നിന്ന് ബെംഗളൂരുവിലേക്കും തിരിച്ചും ഓരോ സർവീസുകൾ വീതം പ്രഖ്യാപിച്ചു. 06571, 06572 എനീ നമ്പരുകളിലുള്ള ട്രെയിനുകൾ ഈ സർവീസ് നടത്തും. കൊല്ലം - ബെംഗളൂരു റൂട്ടിലും 06573, 06574 എന്നീ ട്രെയിനുകൾ സമാനമായ രീതിയിൽ ഇരുവശത്തേക്കും ഓരോ സർവീസുകൾ വീതം നടത്തും.

ബെംഗളൂരു - കൊല്ലം

06573 നമ്പര്‍ എസ്എംവിടി ബെംഗളൂരു- കൊല്ലം എക്‌സ്പ്രസ് ട്രെയിന്‍ ഡിസംബര്‍ 25 വ്യാഴം ഉച്ചയ്ക്ക് മൂന്ന് മണിക്ക് ബെംഗളൂരുവില്‍ നിന്ന് പുറപ്പെടും. കൊല്ലത്ത് പിറ്റേദിവസം രാവിലെ 6.30 ഓടെ എത്തിച്ചേരും. 3.10ന് കൃഷ്ണരാജപുരം, 3.58ന് ബംഗരാജപേട്ട്, 7.40ന് സേലം, 8.45ന് ഈറോഡ്, 9.33ന് തിരുപ്പു, 10.20ന് പോഡന്നൂര്‍ എന്നീ സ്റ്റേഷനുകളിലെത്തും. 11.17-ന് പാലക്കാട്, 12.25-ഓടെ തൃശ്ശൂർ, 1.28ന് ആലുവ എന്നിങ്ങനെയാണ് സമയക്രമം. 1.50 ന് എറണാകുളം ടൗൺ, 3.07ന് കോട്ടയം, 3.28ന് ചങ്ങനാശേരി, 3.39ന് തിരുവല്ല, 3.50ന് ചെങ്ങന്നൂര്‍, 4.02ന് മാവേലിക്കര, 4.16ന് കായംകുളം സ്റ്റേഷനിലെത്തും. 6.30 ന് കൊല്ലത്തെത്തുന്നതോടെ യാത്ര അവസാനിക്കും.

ഡിസംബര്‍ 26ന് വെള്ളിയാഴ്ച രാവിലെ 10.30നാണ് ട്രെയിന്‍ കൊല്ലത്ത് നിന്ന് മടക്കയാത്ര ആരംഭിക്കുന്നത്. 11.26ന് കായംകുളം, 11.36 ന് മാവേലിക്കര, 11.48 ന് ചെങ്ങന്നൂര്‍, 11.57 ന് തിരുവല്ല, 12.08 ന് ചെങ്ങനാശേരി, 12.24 ന് കോട്ടയം, 1. 35ന് എറണാകുളം ടൗണ്‍, 2.3ന് ആലുവ, 3 ന് തൃശൂര്‍, 6.42ന് പാലക്കാട്, 6.20ന് പോഡന്നൂര്‍, 7.18ന് തിരുപ്പു, 8.20ന് ഈറോഡ്, 9.20 ന് സേലം, 12.38ന് ബംഗരാജപേട്ട്, 1.15 ന് കൃഷ്ണരാജപുരം, പിറ്റേദിവസം 3.30ന് എസ്എംവിടി ബെംഗളൂരു.

ലഗേജ് കൂടരുത്

ട്രെയിൻ യാത്ര ചെയ്യുന്നവർ ലെഗേജുകളിൽ ശ്രദ്ധ വേണം. കാരണം സൗജന്യ പരിധി കവിഞ്ഞാൽ പിന്നീട് കൈവശം വെക്കാവുന്ന പരമാവധി പരിധി വരെ നിശ്ചിത തുക പിഴയായി അടക്കേണ്ടി വരും. ഫസ്റ്റ് എസി കോച്ചുകളിൽ കൊണ്ടു പോകാനാവുന്ന പരമാവധി ല​ഗേജ് പരിധി 150 കിലോ​ഗ്രാം വരെയാണ്. എന്നാൽ സൗജന്യ പരിധി 70 കിലോ വരെയാണ്. സ്ലീപ്പർ കോച്ചുകളിൽ കൈവശം വെക്കാവുന്ന പരമാവധി പരിധി 80 കിലോ​ഗ്രാമും, സൗജന്യ പരിധി 40 കിലോ​ഗ്രാമും ആണ്.