ഒക്ടോബറിൽ പകുതി ദിവസവും രാജ്യത്തെ ബാങ്കുകൾ പ്രവർത്തിക്കില്ല; കാരണം ഇതാണ്

നാളെ മുതൽ ഇന്ത്യയിലെ ബാങ്കുകൾക്ക് അവധിയാണ്. ഇത്തവണ ഒക്ടോബർ മാസം ഉത്സവാഘോഷങ്ങളുടെ പൊടി പൂരമാണ്. ​നവരാത്രി, ദീപാവലി തുടങ്ങിയ വലിയ ആഘോഷങ്ങളാണ് വരാനിരിക്കുന്നത്. ആഘോഷങ്ങൾക്കിടയിൽ അവധി ദിവസങ്ങളും സുപ്രധാനമാണ്. ഒക്ടോബറിൽ ഇന്ത്യയിലെ വിവിധ സംസ്ഥാനങ്ങളിലുടനീളമുള്ള ബാങ്കുകൾ 15 ദിവസത്തേക്ക് അടഞ്ഞു കിടക്കും. ബാങ്ക് ഇടപാടുകൾ നടത്തേണ്ടവർക്ക് ഒരു വെല്ലുവിളി നിറഞ്ഞ മാസമാണ് ഒക്ടോബർ. എന്നാൽ ഈ അവധികൾ ഓരോ സംസ്ഥാനത്തും വ്യത്യസ്തമാണ്.

ബാങ്ക് അവധികൾ സാധാരണയായി മാസത്തിലെ നാല് ഞായറാഴ്ചയും പിന്നെ രണ്ടാം ശനിയാഴ്ചയും നാലാം ശനിയാഴ്ചയും ഉണ്ടാവുന്നത്. ഇത് പ്രത്യേകിച്ച് ആളുകൾക്ക് മനസിലാക്കേണ്ട ഒന്നല്ല. പക്ഷേ മറ്റു അവധികളെ കുറിച്ച് ചിലപ്പോൾ മറന്നു പോവാനുള്ള സാധ്യതയും കൂടുതലാണ്. ഇത്തവണ ഒരു മാസത്തിന്റെ പകുതി ദിവസവും ബാങ്ക് അടഞ്ഞു കിടക്കുന്നത് എടുത്തു പറയേണ്ട കാര്യമാണ്. ഇനി ഓരോ സംസ്ഥാനത്തിലും ഈ അവധികളിൽ മാറ്റങ്ങൾ വരുന്നതും നോക്കാം.

കേരളത്തിൽ ഞായറാഴ്ചയും രണ്ട് ശനിയാഴ്ചയും ഒഴിച്ചു നിർത്തിയാൽ ഒക്ടോബറിൽ മൂന്ന് അവധി ദിവസങ്ങളാണ് ഉള്ളത്. പക്ഷേ മറ്റു നോർത്ത് ഇന്ത്യൻ സംസ്ഥാനങ്ങളിൽ പലയിടത്തും അധിക അവധികൾ മാർക്ക് ചെയ്തിട്ടുണ്ട്.

ഒക്ടോബർ 1: സംസ്ഥാന നിയമസഭയിലേക്കുള്ള പൊതു തിരഞ്ഞെടുപ്പ് നടക്കുന്നതിനാൽ ജമ്മുവിൽ ബാങ്കുകൾ അടച്ചിരിക്കുന്നു.

ഒക്ടോബർ 2 : ​ഗാന്ധി ജയന്ധിയാണ്. അതിനാൽ രാജ്യത്തുടനീളം ബാങ്കുകൾ പ്രവർത്തിക്കില്ല.

ഒക്ടോബർ 3 : നവരാത്ര സ്ഥപ്ന ആഘോഷിക്കുന്നതിനാൽ രാജസ്ഥാനിൽ ബാങ്കുകൾ അടഞ്ഞുകിടക്കുന്നു. നവരാത്രി ആഘോഷങ്ങൾ തുടങ്ങുന്ന ദിവസമാണ് ഇത്. രാജസ്ഥാനിലെ പ്രത്യേക ആഘോഷമാണ് ഈ നവരാത്ര സ്ഥപ്ന

ഒക്ടോബർ 10 : ദുർഗാ പൂജ/ദസറ (മഹാ സപ്തമി) ആഘോഷിക്കുന്നു. ത്രിപുര, ആസാം, നാഗാലാൻഡ്, ബംഗാൾ എന്നിവിടങ്ങളിൽ ബാങ്കുകൾ അടഞ്ഞുകിടക്കുന്നു.

ഒക്ടോബർ 12 : ദസറ ആഘോഷമാണ് ഇന്ന്. ഇന്ത്യയിലെ വിവിധ സ്ഥലങ്ങളിൽ ഈ ദിവസം അവധിയായിരിക്കും. എന്നാൽ ഇത് മാസത്തിലെ രണ്ടാം ശനിയാഴ്ചയായതിനാൽ എല്ലാ സംസ്ഥാനങ്ങളിലും ബാങ്കുകൾ അടച്ചിരിക്കും.

ഒക്ടോബർ 14 : ദുർഗ്ഗാ പൂജ (ദസൈൻ) നടക്കുന്നതിനാൽ സിക്കിമിൽ ബാങ്കുകൾ അടച്ചിരിക്കുന്നു.

ഒക്ടോബർ 16 : ലക്ഷ്മി പൂജ നടക്കുന്നതിനാൽ ത്രിപുരയിലും ബംഗാളിലും ബാങ്കുകൾ അടഞ്ഞുകിടക്കുന്നു.

ഒക്ടോബർ 17 : മഹർഷി വാൽമീകി ജയന്തി/കതി ബിഹു എന്നീ പ്രത്യേക ആഘോഷങ്ങൾ നടക്കുന്നു. അതിനാൽ കർണാടക, അസം, ഹിമാചൽ പ്രദേശ് എന്നിവിടങ്ങളിൽ ബാങ്കുകൾ അടച്ചിരിക്കുന്നു.

ഒക്ടോബർ 26 : ജമ്മുവിലും ശ്രീനഗറിലും പ്രവേശന ദിനം അല്ലെങ്കിൽ അക്സെഷൻ ഡേ ആഘോഷിക്കുന്നു. അതിനാൽ ഈ ദിവസം ഇവിടെ ബാങ്കുകൾ തുറന്നു പ്രവർത്തിക്കില്ല.

ഒക്ടോബർ 31 : പ്രധാനമായും ഇത് ദീപാവലി ആഘോഷമാണ്. കാളി പൂജ/സർദാർ വല്ലഭായ് പട്ടേലിൻ്റെ ജന്മദിനം/നരക ചതുർദശി തുടങ്ങിയ പ്രത്യേകതയും ഈ ദിവസത്തിനുണ്ട്. ത്രിപുര, മഹാരാഷ്ട്ര, ഉത്തരാഖണ്ഡ്, സിക്കിം, മണിപ്പൂർ, മേഘാലയ ഒഴികെയുള്ള എല്ലാ സംസ്ഥാനങ്ങളിലും ബാങ്കുകൾ അടഞ്ഞുകിടക്കുന്നു.

2024-ലെ ഇന്ത്യയിലെ ബാങ്ക് അവധികൾ ഓരോ സംസ്ഥാനത്തിനും വ്യത്യാസപ്പെട്ടിരിക്കുമെങ്കിലും, രാജ്യവ്യാപകമായി അംഗീകരിക്കപ്പെട്ട നിരവധി പൊതു അവധി ദിനങ്ങളുണ്ട്. ഒക്ടോബർ 6, ഒക്ടോബർ 13, ഒക്ടോബർ 20, ഒക്ടോബർ 27 ദിവസങ്ങൾ ഞായറാഴ്ചയായതിനാൽ അവധിയാണ്. ഒക്ടോബർ 12 ന് രണ്ടാം ശനിയാഴ്ചയും ഒക്ടോബർ 26ന് നാലാം ശനിയാഴ്ചയും അവധിയാണ്.