'ഹാപ്പി ബർത്ത്ഡേ തലൈവാ': 75-ാം പിറന്നാൾ നിറവിൽ രജനീകാന്ത്; സൂപ്പർസ്റ്റാറിൻ്റെ മൊത്തം ആസ്തി അറിയാം

ഇന്ത്യൻ സിനിമയിൽ ഇന്നും അസൂയാവഹമായ വളർച്ചയിലൂടെ തൻ്റേതായ താര പദവി സ്വന്തമാക്കിയ അഭിനേതാവാണ് രജനീകാന്ത്. ഈ പേരിന് മുന്നിൽ സൂപ്പർസ്റ്റാർ എന്ന പട്ടം വർഷങ്ങൾക്കു മുന്നേ താരത്തിന് ലഭിച്ചു. തമിഴ് സിനിമാ മേഖലയുടെ മുഖച്ഛായ മാറ്റിയ ആരാധകരുടെ സ്വന്തം തലൈവർക്ക് ഇന്ന് 75ാം പിറന്നാൾ. ആരാധകരും സെലിബ്രിറ്റികളും സോഷ്യൽ മീഡിയ അക്കൗണ്ടുകളിലൂടെ സൂപ്പർസ്റ്റാറിന് പിറന്നാൾ ആശംസകൾ നേർന്നു.

ലോകേഷ് കനകരാജ് സംവിധാനം ചെയ്ത കൂലി എന്ന മൾട്ടിസ്റ്റാർ ചിത്രമായിരുന്നു രജനീകാന്തിൻ്റേതായി അവസാനം റിലീസ് ചെയ്തത്. ഒരു ബി​ഗ് ബഡ്ജറ്റ് ചിത്രമെന്ന നിലയിൽ മികച്ച കളക്ഷൻ നേടിയ ചിത്രം കൂടിയായിരുന്നു കൂലി. ഇനി വരാനിരിക്കുന്നത് ജെയ്ലർ 2 എന്ന ചിത്രമാണ്.

പിറന്നാൾ ആശംസകളുമായി ധനുഷ്

അദ്ദേഹത്തിൻ്റെ മൂത്തമകൾ ഐശ്വര്യ രജനീകാന്തിനെ വിവാഹം ചെയ്തിരുന്നത് നടൻ ധനുഷ് ആയിരുന്നു. ഇരുവരും വേർപിരിഞ്ഞെങ്കിലും ഭാര്യാ പിതാവിന് പിറന്നാൾ ആശംസിക്കാൻ ധനുഷ് മറന്നില്ല.

"ഹാപ്പി ബർത്ത്ഡേ തലൈവ" എന്നാണ് ധനുഷ് എക്സ് പ്ലാറ്റ്ഫോമിൽ കുറിച്ചത്. അന്നും, ഇന്നും എന്നും ധനുഷ് രജീകാന്തിൻ്റെ വലിയ ആരാധകനാണ്. ധനുഷിന് പുറമേ എസ്.ജെ. സൂര്യ, കുശ്ബു തുടങ്ങിയ നിരവധി താരങ്ങളും എക്സ് പ്ലാറ്റ്ഫോമിൽ സൂപ്പർ സ്റ്റാറിന് ജന്മ ദിനാശംസകൾ നേർന്നു.

തമിഴ്‌നാട് മുഖ്യമന്ത്രിയുടെ ആശംസ

പിറന്നാൾ ആശംസകൾ നേർന്നുകൊണ്ട് തമിഴ്‌നാട് മുഖ്യമന്ത്രി എം.കെ. സ്റ്റാലിനും രജനീകാന്തിനൊപ്പമുള്ള ഒരു ചിത്രം തന്റെ സോഷ്യൽ മീഡിയ അക്കൗണ്ടിൽ പോസ്റ്റ് ചെയ്തു. "രജനീകാന്തിന് പ്രായത്തിനപ്പുറമുള്ള ഒരു ആകർഷണീയതയുണ്ട്! വേദിയിൽ കയറുമ്പോൾ അദ്ദേഹത്തിന്റെ വാക്ചാതുര്യം എല്ലാവരെയും ആകർഷിക്കുന്നു! പുറത്ത് ഒന്നും പറയാത്ത, മറ്റുള്ളവർക്ക് ദോഷം ആഗ്രഹിക്കാത്ത, വഞ്ചിക്കാത്ത ഒരു ഹൃദയമുണ്ട് അദ്ദേഹത്തിന്!" എന്നാണ് പോസ്റ്റിൽ മുഖ്യമന്ത്രി കുറിച്ചത്.

"ആറ് വയസ്സ് മുതൽ അറുപത് വയസ്സ് വരെ അരനൂറ്റാണ്ടായി എന്നെ അത്ഭുതപ്പെടുത്തിയ എന്റെ സുഹൃത്ത് #സൂപ്പർസ്റ്റാർ രജനീകാന്തിന് ജന്മദിനാശംസകൾ! കൂടുതൽ വിജയകരമായ സിനിമകൾ അദ്ദേഹം തുടർന്നും നൽകട്ടെ, ജനങ്ങളുടെ സ്നേഹത്തോടെയും പിന്തുണയോടെയും അദ്ദേഹത്തിന്റെ കരിയർ എന്നും ഉയരട്ടെ! #HBDSuperStarRajinikanth," എന്നും സ്റ്റാലിൻ കൂട്ടിച്ചേർത്തു.

രജനീകാന്തിൻ്റെ ആസ്തി

ഇന്ത്യയിൽ ഏറ്റവും കൂടുതൽ പ്രതിഫലം വാങ്ങുന്ന നടന്മാരിൽ ഒരാളാണ് രജനീകാന്ത്. ഫോർബ്സ് ഇന്ത്യയുടെ കണക്കനുസരിച്ച്, രജനീകാന്തിന്റെ ആസ്തി ഏകദേശം 430 കോടി രൂപയാണ്. രജനീകാന്ത് ഒരു സിനിമയ്ക്ക് 125 കോടി മുതൽ 270 കോടി വരെ പ്രതിഫലം വാങ്ങുന്നുണ്ടെന്ന് റിപ്പോർട്ടുകൾ പറയുന്നു. ഏകദേശം 35 കോടി രൂപ വിപണി വിലയുള്ള പോയസ് ഗാർഡനിൽ അദ്ദേഹത്തിന് ഒരു ആഡംബര വീട് ഉണ്ട്.

2024 ലെ റിപ്പോർട്ടുകൾ പ്രകാരം, അദ്ദേഹത്തിന് 6 കോടി രൂപ വിലവരുന്ന ഒരു റോൾസ് റോയ്‌സ് ഗോസ്റ്റും, 16.5 കോടി രൂപ വിലവരുന്ന ഒരു റോൾസ് റോയ്‌സ് ഫാന്റവും ഉൾപ്പെടെയുള്ള ആഡംബര കാറുകൾ അദ്ദേഹത്തിനുണ്ട്. 1.77 കോടി വിലയുള്ള ഒരു BMW X5 ഉം, 2.55 കോടി വിലയുള്ള ഒരു മെഴ്‌സിഡസ് ബെൻസ് G-വാഗണും, 3.10 കോടി രൂപ വിലയുള്ള ഒരു ലംബോർഗിനി ഉറുസും, 6 കോടി രൂപ വിലയുള്ള ഒരു ബെന്റ്ലി ലൂമിനസും ഈ ലിസ്റ്റിൽ ഉൾപ്പെടുന്നു. ഇതിനുപുറമെ, താരത്തിന് ഒരു ടൊയോട്ട ഇന്നോവ, ഹോണ്ട സിവിക്, പ്രീമിയർ പദ്മിനി, ഒരു അംബാസഡർ എന്നിവയും സ്വന്തമായുണ്ട്.