650 രൂപ കടന്ന് ടാറ്റ ഓഹരി; ഇപ്പോൾ വാങ്ങണോ, അതോ കാത്തിരിക്കണോ..? വിശദമായി അറിയാം

2025 ജൂൺ 30 ന് അവസാനിച്ച പാദത്തിൽ അറ്റാദായത്തിൽ 30 ശതമാനം ഇടിവ് റിപ്പോർട്ട് ചെയ്തതിനുശേഷവും, ഓഗസ്റ്റ് 11 തിങ്കളാഴ്ച ആദ്യ സെഷനിൽ ഓട്ടോമൊബൈൽ ഭീമനായ ടാറ്റ മോട്ടോഴ്‌സ് ലിമിറ്റഡിന്‍റെ ഓഹരികൾ ഉയർന്നു. നിക്ഷേപകർക്ക് ഇപ്പോഴും ഈ ടാറ്റ ഗ്രൂപ്പ് ഓഹരിയിൽ വിശ്വാസിക്കുന്നു എന്നതിന്‍റെ സൂചനയാണിത്. അതേസമയം ബ്രോക്കറേജ് സ്ഥാപനങ്ങൾ ടാറ്റ ഗ്രൂപ്പ് ഓഹരിയിൽ ജാഗ്രത തുടരുകയാണ്. നമുക്ക് വിശദമായി നോക്കാം.

പാദഫലം

2026 സാമ്പത്തിക വർഷത്തിലെ ഏപ്രിൽ-ജൂൺ പാദത്തിൽ ടാറ്റ മോട്ടോഴ്‌സ് 3,924 കോടി രൂപയുടെ അറ്റാദായം രേഖപ്പെടുത്തി, കഴിഞ്ഞ വർഷം ഇതേ കാലയളവിൽ ഇത് 5,643 കോടി രൂപയായിരുന്നു. അതേസമയം, പ്രവർത്തനങ്ങളിൽ നിന്നുള്ള കമ്പനിയുടെ വരുമാനം 2.5 ശതമാനം കുറഞ്ഞ് 2026 സാമ്പത്തിക വർഷത്തിലെ ആദ്യ പാദത്തിൽ 1.04 ലക്ഷം കോടി രൂപയായി. 2025 സാമ്പത്തിക വർഷത്തിലെ ആദ്യ പാദത്തിൽ ഇത് 1.07 ലക്ഷം കോടി രൂപയായിരുന്നു.

എല്ലാ ബിസിനസുകളിലെയും വോളിയം ഇടിവും പ്രധാനമായും ജാഗ്വാർ ലാൻഡ് റോവറിന്‍റെ (ജെഎൽആർ) ലാഭക്ഷമതയിലുണ്ടായ ഇടിവുമാണ് ടാറ്റ മോട്ടോഴ്‌സിന്‍റെ പ്രകടനത്തെ ബാധിച്ചതെന്ന് കമ്പനി പറഞ്ഞു. ഡൊണാൾഡ് ട്രംപിന്റെ താരിഫ് ആഡംബര വാഹന നിർമ്മാതാക്കളുടെ വരുമാനത്തെ ബാധിച്ചു. ഇത് 9 ശതമാനം ഇടിഞ്ഞ് 6.6 ബില്യൺ പൗണ്ടിലെത്തി. ഇബിഐടി മാർജിൻ 490 ബേസിസ് പോയിന്‍റ് കുറഞ്ഞ് 4 ശതമാനമായി.

ഓഹരി വില

എൻഎസ്ഇയിൽ തിങ്കളാഴ്ച ആദ്യ സെഷനിൽ നേട്ടമുണ്ടാക്കാൻ സാധിച്ചതോടെ ടാറ്റ മോട്ടോഴ്സ് ഓഹരിയുടെ വില 650 രൂപയ്ക്ക് മുകളിലേക്ക് ഉയർന്നു. ഉച്ചയോടെ 653.30 രൂപയിലാണ് വ്യാപാരം പുരോഗമിക്കുന്നത്. കഴിഞ്ഞ ഒരുമാസത്തിനിടെ 4 ശതമാനത്തിന്‍റെ ഇടിവാണ് ഓഹരിക്ക് സംഭവിച്ചത്. ആറ് മാസത്തെ പ്രകടനം പരിശോധിച്ചാൽ 3.6 ശതമാനം നഷ്ടം സംഭവിച്ചിട്ടുണ്ടെന്നും കാണാം. 1142 രൂപയാണ് 52 ആഴ്ചയിലെ ഏറ്റവും ഉയർന്ന ഓഹരി വില.

ഓഹരി വാങ്ങണോ..?

ടാറ്റ മോട്ടോഴ്‌സ് ഓഹരികൾ വരും ദിവസങ്ങളിൽ മികച്ച പ്രകടനം കാഴ്ചവെയ്ക്കാൻ സാധ്യതയില്ല എന്ന അന്താരാഷ്ട്ര ബ്രോക്കറേജായ ജെഫറീസ് അഭിപ്രായപ്പെടുന്നത്. അതുകൊണ്ടുതന്നെ ബ്രോക്കറേജ് ഓഹരിയുടെ ടാർഗെറ്റ് വില 550 രൂപയാക്കി കുറച്ചിട്ടുണ്ട്. ജാഗ്വാർ ലാൻഡ് റോവറിന്‍റെ വർദ്ധിച്ചുവരുന്ന മത്സരം, ചൈന നികുതി, വാറന്‍റി ചെലവുകൾ, പുതിയ മോഡലുകളുടെ അഭാവം തുടങ്ങിയ കാര്യങ്ങളെല്ലാം ബ്രോക്കറേജ് ചൂണ്ടിക്കാട്ടുന്നു.

ബ്രോക്കറേജ് സ്ഥാപനമായ നുവാമ ടാറ്റ മോട്ടോഴ്‌സിന് റിഡ്യൂസ് റേറ്റിംഗ് നൽകി. ടാർഗെറ്റ് വില 670 രൂപയിൽ നിന്നും 610 രൂപയാക്കി കുറച്ചിട്ടുമുണ്ട്. ബ്രോക്കറേജിന്‍റെ റിപ്പോർട്ട് അനുസരിച്ച് 2026 സാമ്പത്തിക വർഷത്തിലെ ആദ്യ പാദത്തിൽ കമ്പനിയുടെ EBITDA 97.2 ബില്യൺ രൂപയാണ്. ഇത് വാർഷികാടിസ്ഥാനത്തിൽ 35% ഇടിവാണ്. ജാഗ്വാർ മോഡലുകളുടെ നിർത്തലാക്കൽ, ചൈനയിലെ വിപണി വിഹിത നഷ്ടം, യുഎസ് താരിഫുകൾ, വാണിജ്യ വാഹന (സിവി) മേഖലയിൽ റെയിൽവേയിൽ നിന്നുള്ള വർദ്ധിച്ചുവരുന്ന മത്സരം തുടങ്ങിയ നിരവധി വെല്ലുവിളികളും നുവാമ ചൂണ്ടിക്കാണിച്ചു.

നേട്ടം നൽകും

മറുവശത്ത്, ആഭ്യന്തര ബ്രോക്കറേജായ എംകെ ഗ്ലോബൽ, കഴിഞ്ഞ അഞ്ച് വർഷത്തിനിടയിൽ, ജെഎൽആർ അതിന്‍റെ ബിസിനസ് പ്രൊഫൈൽ, ലാഭക്ഷമത, ബാലൻസ് ഷീറ്റ് എന്നിവ മെച്ചപ്പെടുത്തിയിട്ടുണ്ടെന്നും, പ്രതിവർഷം 1.4 ബില്യൺ ലാഭിക്കുകയെന്ന ലക്ഷ്യത്തോടെയുള്ള എന്‍റർപ്രൈസ് സംരംഭങ്ങളിലൂടെ പ്രതിരോധശേഷി നേടിയിട്ടുണ്ടെന്നും അഭിപ്രായപ്പെട്ടു. ടാറ്റ മോട്ടോഴ്‌സിൽ ബ്രോക്കറേജ് പോസിറ്റീവ് ആയി തുടരുന്നു, 750 രൂപ ലക്ഷ്യ വിലയോടെ 'വാങ്ങൽ' റേറ്റിംഗ് നിലനിർത്തി.

അറിയിപ്പ്: മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.