12,000 ജീവനക്കാരുടെ ജോലി നഷ്ടമാവും, പിരിച്ചുവിടലുമായി ടിസിഎസ്: ഐടി മേഖല തകർച്ചയിലാണോ?

ആഗോളതലത്തിൽ സാങ്കേതിക മേഖലയിലെ ജീവനക്കാരെ കൂട്ടത്തോടെ പിരിച്ചുവിടുന്നത് ഒരു ട്രെൻഡായി മാറുന്ന കാലമാണിത്. ആർട്ടിഫിഷ്യൽ ഇൻ്റലിജൻസ് അഥവാ എഐയുടെ വ്യാപകമായ ഉപയോഗം ഐടി കമ്പനികൾ ലക്ഷ്യമിടുന്നതാണ് ഇതിന് പ്രധാന കാരണം. 2025ൽ ഇതുവരെ 491 കമ്പനികൾ 137,691 ജീവനക്കാരെ പിരിച്ചുവിട്ടതായാണ് കണക്കുകൾ സൂചിപ്പിക്കുന്നത്. മെറ്റ, ആമസോൺ, മൈക്രോസോഫ്റ്റ്, ഇൻ്റൽ, ഗൂഗിൾ തുടങ്ങിയ പ്രമുഖ കമ്പനികളെല്ലാം ജീവനക്കാരുടെ എണ്ണം വെട്ടിക്കുറച്ചിട്ടുണ്ട്.

ടിസിഎസിൻ്റെ കൂട്ടപ്പിരിച്ചുവിടൽ

ഇപ്പോൾ ഇന്ത്യൻ ഐടി ഭീമനായ ടാറ്റ കൺസൾട്ടൻസി സർവീസസ് (ടിസിഎസ്) 12,000 പേരെ പിരിച്ചുവിടുന്നു. ഇത് സത്യത്തിൽ വലിയ ഞെട്ടലുണ്ടാക്കുന്നു. സാങ്കേതിക മേഖലയിലെ ലേഓഫുകൾ ട്രാക്ക് ചെയ്യുന്ന Trueup.io വെബ്സൈറ്റിൻ്റെ കണക്കനുസരിച്ച്, 2025-ൽ ഇതുവരെ 491 ടെക് കമ്പനികളിലായി 137,691 പേർക്ക് തൊഴിൽ നഷ്ടമായി. അതായത്, പ്രതിദിനം 562 പേർക്ക് ജോലി നഷ്ടപ്പെടുന്നു. കഴിഞ്ഞ വർഷം 1,115 ടെക് കമ്പനികളിൽ നിന്നായി 238,461 പേർക്കാണ് തൊഴിൽ നഷ്ടപ്പെട്ടത്.

ടിസിഎസ് തങ്ങളുടെ ആകെ ജീവനക്കാരിൽ 2% പേരെ പിരിച്ചുവിടുമെന്ന് പ്രഖ്യാപിച്ചതോടെയാണ് ഇന്ത്യൻ ടെക് മേഖലയിൽ പരിഭ്രാന്തി ആരംഭിച്ചത്. ഇത് ഏകദേശം 12,000 ജീവനക്കാരെ ബാധിക്കും. ടിസിഎസിൻ്റെ ഈ തീരുമാനം ആഗോളതലത്തിൽ യൂണിയനുകളിൽ നിന്നും ജീവനക്കാരിൽ നിന്നും വലിയ എതിർപ്പിന് കാരണമായി.

"ടിസിഎസ് ജീവനക്കാരെ പിരിച്ചുവിടുന്നത് അവരുടെ ലാഭത്തിനുവേണ്ടിയാണ്. മുതിർന്ന ജീവനക്കാരെ ലക്ഷ്യമിട്ടും നിയമവിരുദ്ധമായ പിരിച്ചുവിടലുകൾ നടത്തിയതും ഐടി മേഖലയിലെ തൊഴിൽ സുരക്ഷയ്ക്ക് നേരെയുള്ള ആക്രമണമാണ്. തൊഴിലാളികൾ ബാലൻസ് ഷീറ്റിലെ അക്കങ്ങളല്ല - ഞങ്ങൾ നീതി തേടുന്നു" എന്നാണ് യൂണിയൻ ഓഫ് ഐടി & ഐടിഇഎസ് എംപ്ലോയീസ് (UNITE) എക്സ് പ്ലാറ്റ്ഫോമിലൂടെ പ്രതികരിച്ചത്.

"ഭാവിയിൽ ഏറ്റവും വലിയ ഒരു സ്ഥാപനമാകാനുള്ള യാത്രയിലാണ് ടിസിഎസ്. പുതിയ സാങ്കേതിക മേഖലകളിൽ നിക്ഷേപം നടത്തുക, പുതിയ വിപണികളിലേക്ക് പ്രവേശിക്കുക, എഐ വ്യാപകമായി ഉപയോഗിക്കുക, പങ്കാളിത്തം ശക്തിപ്പെടുത്തുക, അടിസ്ഥാന സൗകര്യങ്ങൾ വികസിപ്പിക്കുക, ജീവനക്കാരുടെ ജോലിഘടന പുനഃക്രമീകരിക്കുക തുടങ്ങിയ തന്ത്രപരമായ നിരവധി കാര്യങ്ങൾ ഇതിൽ ഉൾപ്പെടുന്നു." ​ഗുഡ്റിട്ടേൺസിനോട് പിരിച്ചുവിടലിനെക്കുറിച്ച് വിശദീകരിച്ച് ടിസിഎസ്.

ജീവനക്കാർക്കായി നിരവധി നൈപുണ്യ വികസന പദ്ധതികൾ നടക്കുന്നുണ്ട്. ഇതിൽ ഉൾപ്പെടുത്താൻ സാധിക്കാത്ത ജീവനക്കാരെ ഒഴിവാക്കേണ്ടിവരും. ഇത് ഞങ്ങളുടെ ആഗോള ജീവനക്കാരിൽ ഏകദേശം 2% പേരെ മാത്രമാണ്, പ്രത്യേകിച്ച് മുതിർന്ന തസ്തികകളിൽ ഉള്ളവരെയാണ് ഇത് ബാധിക്കുന്നത്" ടെക് ഭീമൻ വ്യക്തമാക്കി.

"ജോലി നഷ്ടപ്പെടാൻ സാധ്യതയുള്ള ഞങ്ങളുടെ സഹപ്രവർത്തകർക്ക് ഇത് ഒരു വെല്ലുവിളി നിറഞ്ഞ സമയമാണെന്ന് ഞങ്ങൾ മനസ്സിലാക്കുന്നു. അവരുടെ സേവനങ്ങൾക്ക് ഞങ്ങൾ നന്ദി പറയുന്നു, കൂടാതെ അവർക്ക് പുതിയ അവസരങ്ങളിലേക്ക് മാറാൻ ആവശ്യമായ ആനുകൂല്യങ്ങൾ, പുതിയ ജോലി കണ്ടെത്താനുള്ള സഹായം, കൗൺസിലിംഗ്, പിന്തുണ എന്നിവ നൽകാൻ ഞങ്ങൾ എല്ലാ ശ്രമങ്ങളും നടത്തും," ടിസിഎസ് ​ഗുഡ്റിട്ടേൺസിനോട് പറഞ്ഞു.

തൊഴിൽ വെട്ടിക്കുറച്ചാൽ എന്തു സംഭവിക്കും?

ടിസിഎസിൻ്റെ കാര്യത്തിൽ, എഐക്ക് ഭാവിയിൽ വലിയൊരു പങ്കുണ്ടായിരിക്കും. എന്നാൽ ആഗോളതലത്തിലെ വലിയ ടെക് കമ്പനികളിൽ എഐ മൂലം എൻട്രി-ലെവൽ ജോലികളെയാണ് കൂടുതലും ബാധിക്കുന്നതെങ്കിൽ, ടിസിഎസിലെ പിരിച്ചുവിടലുകൾ ഇടത്തരം മുതൽ മുതിർന്ന തസ്തികകളിൽ ജോലി ചെയ്യുന്നവരെയാണ് ബാഘിക്കുന്നത്. കമ്പനികൾ പുതിയ ബിസിനസ് മോഡലുകളിലേക്ക് മാറുന്നതിനാൽ, എഐ അധിഷ്ഠിത റോളുകളിൽ നിയമനങ്ങളും മറ്റ് റോളുകളിൽ പിരിച്ചുവിടലുകളും ഉണ്ടാകാൻ സാധ്യതയുണ്ടെന്നും എഐ & ബിയോണ്ട് സിഇഒ ജസ്പ്രീത് ബിന്ദ്ര ​ഗുഡ്റിട്ടേൺസിനോട് പറഞ്ഞു. ടിസിഎസ് ഇത്തരം മാറ്റങ്ങൾക്ക് വിധേയമാകുന്ന ആദ്യ കമ്പനി മാത്രമായിരിക്കാം എന്നും അദ്ദേഹം കൂട്ടിച്ചേർത്തു.

മറ്റു കമ്പനികളുടെ വെട്ടിച്ചുരുക്കൽ

ലോകത്തിലെ ഐടി കമ്പനികളിൽ ഏറ്റവും വലിയ മൂന്നാമത്തെ വലിയ പിരിച്ചുവിടലാണ് ടിസിഎസ് നടത്തിയത്. ജൂലൈയിൽ മൈക്രോസോഫ്റ്റ് 9,000 പേരെ പിരിച്ചുവിട്ടിരുന്നു. മെയ് മാസത്തിൽ 6,000 പേരെയും ജനുവരിയിൽ 2,280 പേരെയും ഏപ്രിലിൽ 2,000 പേരെയും മൈക്രോസോഫ്റ്റ് പിരിച്ചുവിട്ടിരുന്നു.

ഇൻ്റൽ തങ്ങളുടെ ജീവനക്കാരിൽ ഏകദേശം 20% പേരെ, അതായത് ഏകദേശം 10,000 പേരെ, വെട്ടിച്ചുരുക്കാൻ ഒരുങ്ങുകയാണ്. കൂടാതെ, കമ്പനി തങ്ങളുടെ ഓട്ടോമോട്ടീവ് ചിപ്പ് വിഭാഗം അടച്ചുപൂട്ടുന്നുമുണ്ട് എന്ന് സൂചന നൽകുന്നു. അതേസമയം, ഇൻ്റൽ ആകെ 24,000-ത്തിലധികം ജോലികൾ വെട്ടിച്ചുരുക്കുന്നുണ്ടെന്നും ഇത് 2025-ലെ ഒരു ടെക് കമ്പനി നടത്തുന്ന ഏറ്റവും വലിയ പിരിച്ചുവിടലാണെന്നും മറ്റ് റിപ്പോർട്ടുകൾ സൂചിപ്പിക്കുന്നു.

ഇന്ത്യയിൽ, 2026 സാമ്പത്തിക വർഷത്തിൻ്റെ ആദ്യ പാദത്തിൽ വിപ്രോ 114 ജീവനക്കാരെയും, എച്ച്സിഎൽ ടെക് 269 പേരെയും, ടെക് മഹീന്ദ്ര 214 പേരെയും പിരിച്ചുവിട്ടു.