'മോദിയും മസ്‌ക്കും കണ്ടുമുട്ടി, നമുക്ക് കാറ് കിട്ടി', ടെസ്‌ല ഇന്ത്യയിലേക്ക്: കോടികളുടെ മുതൽ ആര് ആദ്യം വാങ്ങും

ആഗോള ഇലക്ട്രിക് കാർ ഭീമനായ ടെസ്‌ലയുടെ ഇന്ത്യ പ്രവേശനം ഒടുവിൽ യാഥാർഥ്യമാകുന്നു. കമ്പനി ഇന്ത്യയിൽ ഉദ്യോഗാർത്ഥികളെ തേടി റിക്രൂട്ട്‌മെന്റ് പ്രക്രിയ ആരംഭിച്ചിരിക്കുകയാണ്. 13 തസ്തികകളിലേക്കാണ് ഇപ്പോൾ ടെസ്‌ല അപേക്ഷ ക്ഷണിച്ചിരിക്കുന്നത്, കൂടാതെ ടെസ്‌ലയുടെ ലിങ്ക്ഡ്‌ഇൻ പേജിൽ ഇതുമായി ബന്ധപ്പെട്ട ഔദ്യോഗിക അറിയിപ്പുകളും പുറത്ത് വന്നിട്ടുണ്ട്. ഇതോടെ വാഹന പ്രേമികളുടെ ഏറെക്കാലം ആയിട്ടുള്ള ഒരു സ്വപ്നമാണ് യാഥാർഥ്യമാകാൻ പോകുന്നത്.

മോദിയും മസ്ക്കും നേർക്കുനേർ

അമേരിക്കയിലെ സന്ദർശനത്തിനിടയിൽ പ്രധാനമന്ത്രി നരേന്ദ്ര മോദി, ടെസ്‌ല സിഇഒ ഇലോൺ മസ്‌കുമായി കൂടിക്കാഴ്ച നടത്തിയത്, കമ്പനിയുടെ ഇന്ത്യൻ വിപണിയിലേക്കുള്ള കാൽവെയ്പിന് പ്രചോദനമായെന്നാണ് ഇത് സംബന്ധിച്ച റിപ്പോർട്ടുകളിൽ വ്യക്തമാക്കുന്നത്. ഉദ്യോഗാർത്ഥികൾക്കുള്ള അവസരങ്ങൾ മുംബൈയും ന്യൂഡൽഹിയും ഉൾപ്പെടുന്ന നഗരങ്ങളിലാണെന്നത് റിക്രൂട്ട്മെന്റ് നോട്ടിഫിക്കേഷനിൽ വ്യക്തമാണ്.

കസ്റ്റമർ സർവീസ്, ബാക്ക് എൻഡ് സേവനങ്ങൾ, സർവീസ് ടെക്‌നീഷ്യൻ, ഉപദേശക തസ്തികകൾ എന്നിവയ്ക്കാണ് ഇപ്പോൾ അവസരങ്ങൾ ഉണ്ടെന്ന് പ്രഖ്യാപിച്ചിരിക്കുന്നത്. മുംബൈയിലായിരിക്കും കസ്റ്റമർ എന്ഗേജ്മെന്റ് മാനേജർ, ഡെലിവറി ഓപ്പറേഷൻസ് സ്പെഷ്യലിസ്റ്റ് എന്നീ തസ്തികകളുടെ നിയമനം ഉണ്ടായിരിക്കുക.

ഇന്ത്യൻ വിപണിയിലേക്കുള്ള വരവിൽ ടെസ്‌ലയ്ക്കുണ്ടായ വഴിത്തിരിവ്

ഇന്ത്യയിലെ ഉയർന്ന ഇറക്കുമതി തീരുവയാണ് ടെസ്‌ലയുടെ വിപണി പ്രവേശനം ഇത്രയും കാലം വൈകിച്ചതിന്റെ പ്രധാന കാരണം. 110% ആയിരുന്ന കസ്റ്റംസ് തീരുവ, 40,000 ഡോളറിലധികം വിലവരുന്ന ഉയർന്ന നിലവാരമുള്ള കാറുകൾക്കായി 70% ആയി കുറയ്ക്കുമെന്നുള്ള കഴിഞ്ഞ ബജറ്റ് പ്രഖ്യാപനത്തിന് ശേഷമാണ് ടെസ്‌ല ഈ നീക്കം ശക്തിപ്പെടുത്തിയത്.

ചൈന 2023-ൽ ഏകദേശം 11 മില്യൺ ഇലക്ട്രിക് കാറുകൾ വിൽക്കുമ്പോൾ, ഇന്ത്യയിൽ ഈ സംഖ്യ ഒരു ലക്ഷത്തിൽ മാത്രമേ എത്തിയിരുന്നുള്ളൂ. ഇന്ത്യൻ വിപണി വളർന്നേക്കാമെന്ന പ്രതീക്ഷയിലാണ് ടെസ്‌ലയുടെ താൽപര്യം ഇപ്പോൾ കൂടുതൽ വർദ്ധിച്ചിരിക്കുന്നത്.

പൂനെയിൽ ഓഫീസ്, ബെംഗളൂരുവിലെ തുടക്കം

2023 ഓഗസ്റ്റിൽ, ടെസ്‌ലയുടെ ഇന്ത്യൻ വിഭാഗമായ "ടെസ്‌ല ഇന്ത്യൻ മോട്ടോർ ആന്റ് എനർജി" പൂനെയിലെ വിമൻ നഗറിലെ പഞ്ച്ഷിൽ ബിസിനസ് പാർക്കിൽ ഓഫീസ് തുറന്നിരുന്നു. 5,850 ചതുരശ്ര അടിയുള്ള ഓഫീസ് സ്പേസിന്റെ പ്രതിമാസ വാടക
₹11.65 ലക്ഷം രൂപയായിരുന്നു. ലീസ് കാലാവധി എല്ലാം ചേർത്ത് മൊത്തം ചെലവ് ₹7.72 കോടിയായിരുന്നു. 2023 ജൂലായ് 26-ന് ഇതിന്റെ കരാർ രജിസ്റ്റർ ചെയ്യപ്പെട്ടു.

അതേസമയം, 2021 ജനുവരിയിൽ ടെസ്‌ല ഇന്ത്യയിലെ ആദ്യ രജിസ്ട്രേഷൻ ബെംഗളൂരുവിൽ നടത്തിയിരുന്നു, എന്നാൽ അതിനു ശേഷം വലിയ മുന്നേറ്റങ്ങളൊന്നും കമ്പനിയുടെ ഭാഗത്ത് നിന്ന് ഉണ്ടായിരുന്നില്ല.

ഇന്ത്യയിലെ ടെസ്‌ലയുടെ ഭാവി

ഇന്ത്യയിലെ ഇലക്ട്രിക് കാർ വിപണി അടുത്ത കുറച്ച് വർഷങ്ങൾക്കുള്ളിൽ വലിയ വളർച്ച കൈവരിക്കും എന്നതിലാണ് ടെസ്‌ലയുടെ ഉറച്ച വിശ്വാസം. കസ്റ്റംസ് തീരുവ കുറയ്ക്കലും സർക്കാർ നയപരിപാടികളും ടെസ്‌ലയുടെ വിപണി പ്രവേശനത്തെ പ്രോത്സാഹിപ്പിച്ചേക്കും.

റിക്രൂട്ട്‌മെന്റ് നടപടികൾ ആരംഭിച്ചതോടെ, ടെസ്‌ലയുടെ ആദ്യ വിപണി പ്രവേശനത്തിനുള്ള കാത്തിരിപ്പിന് തിരശീല വീഴുന്നതിന്റെ സൂചനകളാണ് ഇപ്പോൾ ലഭിക്കുന്നത്. വാഹനപ്രേമികൾ ആ സ്വപ്ന വാഹനത്തെ ഇന്ത്യൻ മണ്ണിൽ കണ്ടുമുട്ടുന്നതും കാത്ത് ഇരിക്കുകയാണ്. ഇന്ത്യയിൽ എത്തിയാൽ ആദ്യം ആരാണ് ഈ വാഹനം സ്വന്തമാക്കുക എന്നതും ഇപ്പോൾ ചർച്ചകളിൽ ഇടം പിടിക്കുന്നുണ്ട്. 70 ലക്ഷം മുതൽ 2.6 കോടി രൂപയാണ് ടെസ്‌ലയുടെ കാറുകൾക്ക് വില വരുന്നത്. എന്തായാലും, ഇലക്ട്രിക് വാഹനരംഗത്ത് ഇന്ത്യ നടത്തുന്ന വിപ്ലവകരമായ മാറ്റങ്ങൾക്ക് ഒപ്പം ടെസ്‌ലയും ഉണ്ടാകുമെന്ന് തന്നെ വിശ്വസിക്കാം.