മാറ്റമില്ലാതെ സ്വർണ വില, കേരളത്തിലെ ഇന്നത്തെ സ്വർണ വില അറിയാം

കേരളത്തിൽ ഇന്നും സ്വർണ വിലയിൽ മാറ്റമില്ല. കഴിഞ്ഞ ഒന്നര മാസത്തിനിടയിലെ ഏറ്റവും കുറഞ്ഞ വിലയ്ക്കാണ് മൂന്ന് ദിവസമായി സ്വർണ വ്യാപാരം പുരോ​ഗമിക്കുന്നത്. ഒരു പവന് 37480 രൂപയാണ് നിലവിലെ സ്വർണ വില. ഗ്രാമിന് 4685 രൂപയാണ് ഇന്നത്തെ നിരക്ക്. ആ​ഗസ്റ്റിൽ സ്വ‍ർണ വില സ‍ർവ്വകാല റെക്കോ‍‍ർഡ് നിരക്കായ 42000 രൂപ വരെ ഉയ‍ർന്നിരുന്നു. എന്നാൽ ആഗസ്റ്റ് 18 മുതൽ സ്വർണ വില കുത്തനെ കുറയാൻ തുടങ്ങി.

ഇന്ത്യൻ വിപണി

ഇന്ത്യയിൽ സ്വർണ്ണത്തിന്റെയും വെള്ളിയുടെയും വില ഇന്ന് ഉയർന്നു. എം‌സി‌എക്‌സിൽ ഒക്ടോബർ സ്വർണ്ണ ഫ്യൂച്ചറുകൾ 10 ഗ്രാമിന് 0.3 ശതമാനം ഉയർന്ന് 50,911 രൂപയിലെത്തി. വെള്ളി ഫ്യൂച്ചറുകൾ 0.23 ശതമാനം ഉയർന്ന് കിലോയ്ക്ക് 67,080 രൂപയിലെത്തി. കഴിഞ്ഞ മൂന്ന് ദിവസം തുടർച്ചയായി സ്വർണ വില ഇടിഞ്ഞിരുന്നു. കഴിഞ്ഞ സെഷനിൽ സ്വർണ്ണ ഫ്യൂച്ചർ വില 10 ഗ്രാമിന് 0.12 ശതമാനം ഇടിഞ്ഞപ്പോൾ വെള്ളി കിലോഗ്രാമിന് 2 ശതമാനം അഥവാ 1,300 രൂപ കുറഞ്ഞു. ഓഗസ്റ്റ് 7 ന് സ്വർണ വില റെക്കോർഡ് നിരക്കായ 56,200 രൂപയിൽ എത്തിയിരുന്നു.

ആഗോള വിപണി

ആഗോള വിപണിയിലും ഇന്ന് സ്വർണ്ണ വില ഉയർന്നു. സ്‌പോട്ട് സ്വർണം 0.4 ശതമാനം ഉയർന്ന് 1,937.84 ഡോളറിലെത്തി. വിലയേറിയ മറ്റ് ലോഹങ്ങളിൽ വെള്ളി വില ഔൺസിന് 1.1 ശതമാനം ഉയർന്ന് 26.92 ഡോളറിലെത്തി. പ്ലാറ്റിനം 0.6 ശതമാനം ഉയർന്ന് 894.97 ഡോളറിലെത്തി.

സോവറിൻ ഗോൾഡ് ബോണ്ട്

തിങ്കളാഴ്ച സബ്‌സ്‌ക്രിപ്‌ഷനായി തുറന്ന ഈ വർഷത്തെ സോവറിൻ ഗോൾഡ് ബോണ്ടുകളുടെ ആറാം ഘട്ട വിൽപ്പന ഇന്ന് അവസാനിക്കും. റിസർവ് ബാങ്ക് ഒരു ഗ്രാമിന് 5,117 രൂപ നിരക്കിലാണ് സ്വർണ്ണ ബോണ്ടുകൾ നൽകുന്നത്. ഓൺലൈനായി അപേക്ഷിക്കുകയും ഓൺലൈനായി പണമടയ്ക്കുകയും ചെയ്യുന്നവർക്ക് ഒരു ഗ്രാമിന് 50 രൂപ കിഴിവ് ലഭിക്കും.

നേട്ടങ്ങൾ

നിക്ഷേപകർ കാലാവധി പൂർത്തിയാകുന്നതുവരെ കൈവശം വച്ചാൽ സ്വർണ്ണത്തിൽ നിക്ഷേപിക്കാനുള്ള ഫലപ്രദമായ മാർഗമാണ് സോവറിൻ ഗോൾഡ് ബോണ്ടുകൾ എന്ന് വിശകലന വിദഗ്ധർ പറയുന്നു. ഗോൾഡ് ബോണ്ടുകൾക്ക് മെച്യൂരിറ്റി കാലാവധി എട്ട് വർഷമാണ്. സോവറിൻ ഗോൾഡ് ബോണ്ട് വാങ്ങുന്നയാൾക്ക് 2.5% വാർഷിക പലിശ ലഭിക്കും.