ഈ ബാങ്കിന്റെ ക്രെഡിറ്റ് കാർഡുകൾക്ക് പുത്തൻ മാറ്റങ്ങൾ; പുതിയ നിരക്കുകൾ ഇതാണ്....

ഒക്ടോബർ മാസത്തിൽ അപ്രതീക്ഷിത മാറ്റങ്ങളാണ് സംഭവിച്ചത്. വിവിധ ബാങ്കുകൾ അവരുടെ പലിശ നിരക്കുകൾ പരിഷ്കരിച്ചു. അതുപോലെ ക്രെഡിറ്റ് കാർഡുകളുടെ ഉപയോ​ഗത്തിലും ചില നിയന്ത്രണങ്ങളും ചാർജുകളിൽ വർദ്ധനയും ഉണ്ടായി. ഈ മാസം ഉത്സവ സീസൺ ആയതിനാൽ എല്ലാ ഓൺലൈൻ സ്റ്റോറുകളിലും പർച്ചേസുകൾക്ക് വമ്പൻ കിഴിവാണ്. മാത്രമല്ല ക്രെഡിറ്റ് കാർഡുകളിലും ഓഫർ പെരുമഴയാണ്. ഇത്തവണ ക്രെഡിറ്റ് കാർഡ് വഴി പർച്ചേസുകൾ നടത്തുന്നതിനു മുന്നേ നിങ്ങളുടേത് എസ്.ബി.ഐ ക്രെഡിറ്റ് കാർഡാണോ എന്ന് പരിശോധിക്കുക.

സ്റ്റേറ്റ് ബാങ്ക് ഓഫ് ഇന്ത്യ അതിൻ്റെ ചില എസ്ബിഐ ക്രെഡിറ്റ് കാർഡുകളുടെ നിരക്കുകൾ വർദ്ധിപ്പിച്ചു. അതിൽ യൂട്ടിലിറ്റി ബിൽ പേയ്‌മെൻ്റും ഫിനാൻസ് ചാർജുകളും ഉൾപ്പെടുന്നു. എസ്.ബി.ഐ ക്രെഡിറ്റ് കാർഡ് വഴി ഇടപാടുകൾ നടത്തുന്നതിനു മുന്നേ ഈ മാറ്റങ്ങളും പരിഷ്കാരങ്ങളും തിരിച്ചറിയേണ്ടതുണ്ട്.

എസ്.ബി.ഐ കാർഡ് വഴിയുള്ള ചില ഇടപാടുകൾക്ക് ഇനി മുതൽ അധിക ചാർജ് ഈടാക്കും. ഏതെല്ലാം ഇടപാടുകൾക്കാണ് ഇത്തരത്തിൽ ചാർജ് ഈടാക്കുന്നതെന്ന് പരിശോധിക്കാം.

മൊബൈൽ, വൈദ്യുതി ബിൽ തുടങ്ങിയവയ്ക്ക് അധിക ചാർജ് നൽകണം

യൂട്ടിലിറ്റി ബില്ലുകൾ സാധാരണക്കാരെ സംബന്ധിച്ച് ഏറ്റവും പ്രധാനമാണ്. ബിൽ അടക്കുന്ന സമയത്ത് നിങ്ങൾ അടക്കേണ്ട മൊത്തം യൂട്ടിലിറ്റി പേയ്‌മെൻ്റ് തുക രൂപ 50,000 രൂപയിൽ കൂടുതലാണെങ്കിൽ ഒരു ശതമാനം അധിക ചാർജ് നൽകേണ്ടിവരും. ടെലിഫോൺ, മൊബൈൽ, വൈദ്യുതി ബിൽ, ഇൻഷുറൻസ് പ്രീമിയം എന്നിവയാണ് യൂട്ടിലിറ്റി ബിൽ പേയ്മെന്റുകൾ. യൂട്ടിലിറ്റി ബിൽ പേയ്‌മെൻ്റിലെ ഈ മാറ്റം 2024 ഡിസംബർ 1 മുതൽ പ്രാബല്യത്തിൽ വരും.

ക്രെഡിറ്റ് കാര്‍ഡുകള്‍ ഉപയോഗിച്ച് ഒറ്റ സ്റ്റേറ്റ്മെന്‍റില്‍ 50,000 രൂപയ്ക്ക് മുകളിലുള്ള യൂട്ടിലിറ്റി ബില്‍ പേയ്മെന്‍റുകള്‍ക്കാണ് 1 ശതമാനം അധിക ചാര്‍ജായി എസ്ബിഐ ഈടാക്കുന്നത്. എന്നാൽ ഇത് 50,000 രൂപയില്‍ കുറവാണെങ്കില്‍, അധിക നിരക്കുകളൊന്നും ഈടാക്കില്ല

ഫിനാൻസ് ചാർജ്

എസ്.ബി.ഐയുടെ സുരക്ഷിതമല്ലാത്ത ക്രെഡിറ്റ് കാർഡുകളുടെ ഫിനാൻസ് ചാർജ് പ്രതിമാസം 3.75% ആയി വർദ്ധിച്ചു. ചില എസ്.ബി.ഐ ക്രെഡിറ്റ് കാർഡുകൾ സുരക്ഷിതമല്ല. പുതുക്കിയ നിയമം ദീപാവലിക്ക് ശേഷം അതായത് 2024 നവംബർ 1 മുതൽ പ്രാബല്യത്തിൽ വരും. മുൻപ് ഇത് 3.5% ശതമാനം ആയിരുന്നു. സെക്യൂരിറ്റി ഡെപ്പോസിറ്റോ ഈടുകളോ നല്‍കേണ്ടതില്ലാത്ത ക്രെഡിറ്റ് കാര്‍ഡുകളാണ് സുരക്ഷിതമല്ലാത്ത ക്രെഡിറ്റ് കാര്‍ഡുകള്‍.

അടിമുടി മാറ്റങ്ങൾ

എസ്.ബി.ഐ ക്രെഡിറ്റ് കാർഡുകൾക്ക് അടിമുടി മാറ്റങ്ങളാണ് സംഭവിക്കുന്നത്. അതിന്റെ ഭാ​ഗമായി ചില ക്രെഡിറ്റ് കാർഡുകൾ ഇനി ഒരിക്കലും എസ്.ബി.ഐ ഇറക്കില്ല. ഇത് ദുഖകരമായ വാർത്തയാണ്. ഇത്തരം കാർഡുകൾ ഉപയോ​ഗിച്ചവർ ഉണ്ടെങ്കിൽ ശ്രദ്ധിക്കണം. അതായത് ഈ 2024 സെപ്‌റ്റംബർ 28 മുതൽ ക്ലബ് വിസ്താര എസ്‌.ബി.ഐ ക്രെഡിറ്റ് കാർഡും, എസ്‌.ബി.ഐ ക്രെഡിറ്റ് കാർഡ് പ്രൈമും നിർമ്മാണം അവസാനിപ്പിച്ചു.

ക്രെഡിറ്റ് കാർഡ് ഇൻഷുറൻസിനായി നോമിനി രജിസ്‌ട്രേഷൻ നിർബന്ധമാക്കിയിരിക്കുന്നു. ഇതി ആർ.ബി.ഐ നിർദ്ദേശപ്രകാരമാണ്. വിമാന അപകടത്തിലോ വ്യക്തിഗത അപകട ഇൻഷുറൻസ് പോളിസിയിലോ നോമിനി വിശദാംശങ്ങൾ അപ്‌ഡേറ്റ് ചെയ്യാനോ ചേർക്കാനോ നിങ്ങൾക്ക് എസ്.ബി.ഐ കാർഡ് ആപ്പോ വെബ്‌സൈറ്റോ ഉപയോഗിക്കാം.