ആധാർ കാ‍ർഡ് ഉള്ളവർ സൂക്ഷിക്കുക, ഈ അബദ്ധം പറ്റിയാൽ നിങ്ങളുടെ 10000 രൂപ പോകും

നികുതിദായകരുടെ സൗകര്യാർത്ഥം പാൻ കാ‍ർഡ് നമ്പറിന് പകരം ഇപ്പോൾ നിങ്ങളുടെ 12 അക്ക ആധാർ നമ്പറും ഉപയോ​ഗിക്കാവുന്നതാണ്. എന്നാൽ തെറ്റായ നമ്പർ നൽകിയാൽ നിങ്ങൾക്ക് 10,000 രൂപ പിഴ നൽകേണ്ടി വരും. 2019ൽ അവതരിപ്പിച്ച ധനകാര്യ ബിൽ അനുസരിച്ച് പാൻ കാ‍ർഡിന് പകരം ആധാർ ഉപയോ​ഗിക്കാവുന്നതു പോലെ തന്നെ പാൻ നമ്പർ തെറ്റായി നൽകുമ്പോൾ ഈടാക്കുന്ന അതേ പിഴ തന്നെ ആധാർ നമ്പ‍‍ർ തെറ്റായി നൽകിയാലും ഈടാക്കുന്നതാണ്.

പിഴ നിയമങ്ങൾ ഇങ്ങനെ

പുതിയ പിഴ നിയമങ്ങൾ ബാധകമാകുന്നത് നിങ്ങൾ പാനിന് പകരമായി ആധാർ ഉപയോഗിക്കുന്ന സാഹചര്യങ്ങളിലാണ്. അതായത് ആദായനികുതി റിട്ടേൺ സമർപ്പിക്കൽ (ഐടിആർ), ബാങ്ക് അക്കൗണ്ട് തുറക്കൽ, ഡീമാറ്റ് അക്കൗണ്ട് തുറക്കൽ, മ്യൂച്വൽ ഫണ്ട് നിക്ഷേപം ആരംഭിക്കുമ്പോൾ തുടങ്ങിയവ ഇതിൽപ്പെടുന്നു.

ആദായനികുതി വകുപ്പ്

യുണീക്ക് ഐഡന്റിറ്റി അതോറിറ്റി ഓഫ് ഇന്ത്യയാണ് ആധാർ നൽകുന്നതെങ്കിലും പിഴ ചുമത്തിയിരിക്കുന്നത് യുഐ‌ഡി‌എഐ‌ അല്ല, മറിച്ച് ആദായനികുതി വകുപ്പാണ്. 1961ലെ ആദായനികുതി നിയമത്തിലെ സെക്ഷൻ 272 ബി പ്രകാരം, പാനുമായി ബന്ധപ്പെട്ട വ്യവസ്ഥകൾ പാലിക്കുന്നതിൽ വീഴ്ച വരുത്തിയാൽ വകുപ്പിന് പിഴ ചുമത്താൻ കഴിയും. 10,000 രൂപയായിരിക്കും പിഴ തുക.

സെപ്റ്റംബർ മുതൽ

നേരത്തെ തെറ്റായി പാൻ നമ്പർ രേഖപ്പെടുത്തിയാൽ മാത്രമാണ് പിഴ ഈടാക്കിയിരുന്നത്. എന്നാൽ സെപ്റ്റംബർ മുതൽ പാൻ കാർഡിന് പകരം ആധാറും ഉപയോ​ഗിക്കാം എന്ന നിയമം വന്നതോടെയാണ് ആധാർ നമ്പറും തെറ്റായി നൽകിയാൽ പിഴ ഈടാക്കാൻ തുടങ്ങിയത്.

പിഴ നൽകേണ്ടത് എപ്പോൾ?

• പാനിന് പകരമായി നിങ്ങൾ അസാധുവായ ആധാർ നമ്പർ നൽകുമ്പോൾ
• നിർദ്ദിഷ്ട ഇടപാടുകളിൽ നിങ്ങളുടെ പാൻ അല്ലെങ്കിൽ ആധാർ നൽകാതിരിക്കുമ്പോൾ
• 2 ഫോമുകളിൽ തെറ്റായ ആധാർ നമ്പർ നൽകിയിട്ടുണ്ടെങ്കിൽ പിഴ 20,000 രൂപയായിരിക്കും

malayalam.goodreturns.in