സ്വർണ വില വീണ്ടും കുത്തനെ താഴേയ്ക്ക്; ഈ മാസത്തെ ഏറ്റവും കുറഞ്ഞ വില ഇന്ന്

കേരളത്തിൽ സ്വർണ വില വീണ്ടും കുത്തനെ ഇടിഞ്ഞു. പവന് 320 രൂപ കുറഞ്ഞ് 38560 രൂപയ്ക്കാണ് ഇന്ന് വ്യാപാരം പുരോഗമിക്കുന്നത്. ഗ്രാമിന് 4820 രൂപയാണ് ഇന്നത്തെ വില. കഴിഞ്ഞ നാല് ദിവസങ്ങളായി 38880 രൂപയായിരുന്നു കേരളത്തിൽ ഒരു പവൻ സ്വർണത്തിന്റെ വില. എന്നാൽ ഇന്ന് വീണ്ടും വില കുറഞ്ഞു. ഈ മാസത്തെ ഏറ്റവും കുറഞ്ഞ വിലയാണ് ഇന്നത്തേത്. ഓഗസ്റ്റ് 7, 8, 9 തീയതികളിലാണ് സംസ്ഥാനത്ത് സ്വര്‍ണ വില ഏറ്റവും കൂടുതല്‍ രേഖപ്പെടുത്തിയത്. ഈ ദിവസങ്ങളില്‍ പവന് വില 42,000 രൂപയെന്ന റെക്കോര്‍ഡ് തൊട്ടു.

ഇന്ത്യൻ വിപണി

ഇന്ത്യൻ വിപണികളിൽ സ്വർണത്തിന്റെയും വെള്ളിയുടെയും വില ഇന്നും കുറഞ്ഞു. എം‌സി‌എക്‌സിൽ ഒക്ടോബർ സ്വർണ്ണ ഫ്യൂച്ചറുകൾ 10 ഗ്രാമിന് 0.3 ശതമാനം ഇടിഞ്ഞ് 51865 രൂപയിലെത്തി. തുടർച്ചയായ നാലാം ദിവസമാണ് സ്വർണ വില ഇന്ന് കുറഞ്ഞത്. നാല് ദിവസത്തിനുള്ളിൽ സ്വർണ്ണ വില 10 ഗ്രാമിന് 1,700 രൂപ കുറഞ്ഞു. എം‌സി‌എക്‌സിന്റെ സിൽവർ ഫ്യൂച്ചർ ഒരു ശതമാനം ഇടിഞ്ഞ് കിലോഗ്രാമിന് 66,426 രൂപയിലെത്തി. കഴിഞ്ഞ സെഷനിൽ സ്വർണം 0.3 ശതമാനവും സെപ്റ്റംബർ സിൽവർ ഫ്യൂച്ചേഴ്സ് ഒരു ശതമാനവും കുറഞ്ഞു. ഓഗസ്റ്റ് 7ന് 56,200 രൂപ വരെ സ്വർണ വില ഉയർന്നിരുന്നു.

ആഗോള വിപണി

ആഗോള വിപണിയിൽ ഇന്ന് സ്വർണ വില ഇടിഞ്ഞു. സ്പോട്ട് സ്വർണ വില ഔൺസിന് 0.3 ശതമാനം ഇടിഞ്ഞ് 1,933.37 ഡോളറിലെത്തി. യുഎസ് സ്വർണ്ണ ഫ്യൂച്ചേഴ്സ് 0.4 ശതമാനം ഇടിഞ്ഞ് 1,910.10 ഡോളറിലെത്തി. വിലയേറിയ മറ്റ് ലോഹങ്ങളിൽ വെള്ളി വില ഔൺസിന് 0.6 ശതമാനം ഇടിഞ്ഞ് 26.54 ഡോളറിലെത്തി. പ്ലാറ്റിനം 0.5 ശതമാനം ഇടിഞ്ഞ് 913.78 ഡോളറിലെത്തി.

ഡിസ്കൌണ്ട്

ഇന്ത്യയിൽ ഭൌതിക സ്വർണ്ണ ഡീലർമാർ ഒന്നര മാസത്തിനിടെ ഏറ്റവും ഉയർന്ന ഡിസ്കൗണ്ട് വാഗ്ദാനം ചെയ്തു. ഇന്ത്യയിലെയും ചൈനയിലെയും ദുർബലമായ ഉപഭോക്തൃ ആവശ്യം ഭൌതിക വിപണിയിലെ കിഴിവുകളിൽ നിന്ന് വ്യക്തമാണ്.

ഹാൾമാർക്കിംഗ്

കഴിഞ്ഞയാഴ്ച ഇന്ത്യൻ സർക്കാർ സ്വർണ്ണ പരിശോധന, ഹാൾമാർക്കിംഗ് കേന്ദ്രങ്ങളുടെ ലൈസൻസ് രജിസ്റ്റർ ചെയ്യുന്നതിനും പുതുക്കുന്നതിനുമായി ഒരു ഓൺലൈൻ സംവിധാനം ആരംഭിച്ചിരുന്നു. നിലവിൽ, സ്വർണ്ണ ഹാൾമാർക്കിംഗ് സ്വമേധയാ ഉള്ളതാണ്. എന്നിരുന്നാലും, 2021 ജൂൺ മുതൽ ഇത് നിർബന്ധമാക്കും. ജ്വല്ലറികൾ വിൽക്കുന്ന സ്വർണ്ണത്തിന് 'ഹാൾമാർക്ക്' ഗുണനിലവാര സർട്ടിഫിക്കേഷൻ ആവശ്യമാണ്.