കേരളത്തിൽ സ്വർണ വില കൂപ്പുകുത്തി, ഒറ്റയടിയ്ക്ക് കുറഞ്ഞത് 1200 രൂപ; വിവാഹക്കാർക്ക് സന്തോഷ വാർത്ത

കേരളത്തിൽ സ്വർണ വിലയിൽ കനത്ത ഇടവ്. ഒറ്റയടിയ്ക്ക് പവന് 1200 രൂപയാണ് ഇന്ന് കുറഞ്ഞിരിക്കുന്നത്. ഒരു പവൻ സ്വർണത്തിന്റെ ഇന്നത്തെ വില 30600 രൂപയാണ്. ഈ മാസം ആദ്യമായാണ് സ്വർണ വില പവന് 31000ന് താഴേയ്ക്ക് എത്തുന്നത്. ഈ മാസത്തെ ഏറ്റവും കുറഞ്ഞ വിലയും 30600 രൂപയാണ്. സ്വർണത്തിന്റെ ചരിത്രത്തിലെ തന്നെ റെക്കോർഡ് വിലയായ 32320 രൂപയ്ക്ക് ഈ മാസം നാല് ദിവസം സ്വർണ വിൽപ്പന നടന്നിരുന്നു. പിന്നീട് കഴിഞ്ഞ ഒരാഴ്ച്ചയായി വില കുത്തനെ കുറയുകയായിരുന്നു. ഒരു ഗ്രാം സ്വർണത്തിന്റെ ഇന്നത്തെ വില 3825 രൂപയാണ്. വിവാഹാവശ്യങ്ങൾക്കും മറ്റും സ്വർണം വാങ്ങാൻ കാത്തിരിക്കുന്നവർക്ക് ആശ്വാസമാണ് ഇന്നത്തെ വിലയിടിവ്.

എംസിഎക്സിലെ വില

എംസിഎക്സിലും സ്വർണ വില ഇന്ന് കുത്തനെ ഇടിഞ്ഞു. നാല് ദിവസമായി തുടർച്ചയായ ഇടിവാണ് രേഖപ്പെടുത്തി കൊണ്ടിരിക്കുന്നത്. എം‌സി‌എക്‌സിൽ സ്വർണ്ണ ഫ്യൂച്ചറുകൾ 10 ഗ്രാമിന് 763 രൂപ കുറഞ്ഞ് 41,443 രൂപയിലെത്തി. ആഗോള ഇക്വിറ്റികളിലെ വിൽപ്പനയാണ് ഇന്ന് സ്വർണ വില കുത്തനെ കുറയാൻ കാരണം. എം‌സി‌എക്‌സിലെ സിൽ‌വർ‌ ഫ്യൂച്ചറുകൾ‌ ഇന്ന്‌ കിലോഗ്രാമിന്‌ 2% അഥവാ 1,000 രൂപ കുറഞ്ഞ്‌ 43,179 രൂപയിലെത്തി. കഴിഞ്ഞ സെഷനിൽ ഇന്ത്യയിൽ സ്വർണ്ണ വില 10 ഗ്രാമിന് 1,100 രൂപ വരെ ഇടിഞ്ഞപ്പോൾ വെള്ളി കിലോഗ്രാമിന് 1,600 രൂപ കുറഞ്ഞിരുന്നു.

സുരക്ഷിത നിക്ഷേപം

നിലവിലെ വിപണി സാഹചര്യത്തിൽ സ്വർണ്ണത്തെ ഒരു സുരക്ഷിത നിക്ഷേപമായാണ് കണക്കാക്കുന്നത്. കൊറോണ വൈറസിന്റെ മഹാമാരിയായി ലോക ആരോഗ്യ സംഘടന പ്രഖ്യാപിച്ചതിനെ തുടർന്നാണ് വിപണികൾ കുത്തനെ ഇടിയാൻ തുടങ്ങിയത്. ആഗോള വിപണികളിൽ സ്വർണം 2011 ന് ശേഷമുള്ള ഏറ്റവും വലിയ പ്രതിവാര നഷ്ടത്തിലേക്കാണ് നീങ്ങുന്നത്. ഈ ആഴ്ച തുടക്കത്തിൽ സ്വർണ വില ഏഴ് വർഷത്തിനിടയിലെ ഏറ്റവും ഉയർന്ന നിരക്കിലേക്ക് ഉയർന്നിരുന്നു. എന്നാൽ ഇപ്പോൾ വീണ്ടും വില കുത്തനെ കുറഞ്ഞു.

ആഗോള വിപണി

ആഗോള വിപണിയിൽ സ്പോട്ട് സ്വർണം ഇന്ന് 1.3 ശതമാനം ഇടിഞ്ഞ് 1,555.42 ഡോളറിലെത്തി. കഴിഞ്ഞ സെഷനിൽ 3.6 ശതമാനം ഇടിവ് രേഖപ്പെടുത്തിയിരുന്നു. തിങ്കളാഴ്ച ഏഴുവർഷത്തെ ഏറ്റവും ഉയർന്ന നിരക്കായ 1,700 ഡോളറിലെത്തിയ സ്വർണ വിപണിയിൽ ഈ ആഴ്ച ഇതുവരെ സ്വർണ വില 7% കുറഞ്ഞു. വിലയേറിയ മറ്റ് ലോഹങ്ങളിൽ വെള്ളി 2 ശതമാനവും പ്ലാറ്റിനം 0.4 ശതമാനവും ഉയർന്നു. വ്യാഴാഴ്ച 20 ശതമാനം ഇടിവ് നേരിട്ട പല്ലേഡിയം 0.4 ശതമാനം മുന്നേറി.

വിപണിയിലെ പ്രതിസന്ധികൾ

യുഎസ് ഡോളറിനെതിരെ രൂപയുടെ മൂല്യം 74.50 ഡോളറിലെത്തിയിട്ടും ആഭ്യന്തര സ്വർണ വിലയിൽ ഇടിവ് രേഖപ്പെടുത്തി. ആഭ്യന്തര സ്വർണ്ണ വിലയിൽ 12.5% ഇറക്കുമതി തീരുവയും 3% ജിഎസ്ടിയും ഉൾപ്പെടുന്നു. 1987 ന് ശേഷം വാൾസ്ട്രീറ്റ് ഏറ്റവും വലിയ ഏകദിന വിൽപ്പന നടത്തിയതിനെത്തുടർന്ന് ഏഷ്യൻ വിപണികളും ഇടിഞ്ഞു. ഒരാഴ്ചയ്ക്കുള്ളിൽ സർക്യൂട്ട് ബ്രേക്കറുകൾ ഇത് രണ്ടാം തവണയാണ് പ്രവർത്തിപ്പിക്കുന്നത്.

പലിശ നിരക്ക്

ബാങ്ക് ഓഫ് ഇംഗ്ലണ്ട് ബുധനാഴ്ച പലിശനിരക്ക് കുറച്ചതോടെ സ്വർണ്ണത്തിന് വീണ്ടും പിന്തുണ ലഭിച്ചു. യുഎസ് ഫെഡറൽ റിസർവ് കഴിഞ്ഞയാഴ്ച അടിയന്തരയമായി നിരക്ക് കുറച്ചിരുന്നു. ബാങ്ക് ഓഫ് ജപ്പാൻ, യൂറോപ്യൻ സെൻട്രൽ ബാങ്ക് തുടങ്ങിയ സെൻട്രൽ ബാങ്കുകളും കൊറോണ വൈറസിന്റെ സാമ്പത്തിക ആഘാതം പരിഹരിക്കുന്നതിന് പുതിയ നടപടികളുമായി മുന്നോട്ട് പോകുകയാണ്. റിസർവ് ബാങ്കും ഇത് സംബന്ധിച്ച് ചർച്ചകൾ നടത്തുന്നുണ്ട്. സ്വർണ വിലയെ ബാധിക്കുന്ന പ്രധാന ഘടകങ്ങളിലൊന്നാണ് ലോക ബാങ്കുകളുടെ പലിശ നിരക്ക് കുറയ്ക്കൽ.

ക്രൂഡ് ഓയിലും സ്വർണ വിലയും

ക്രൂഡ് ഓയിൽ വിൽപ്പന ആഗോള വിപണിയിൽ കുതിച്ചുകയറിയതോടെ ഈ ആഴ്ച ആദ്യം സ്വർണ്ണം ഔൺസിന് 1700 ഡോളറിനേക്കാൾ ഉയർന്നിരുന്നു. കൊറോണ വൈറസ് വ്യാപിക്കുന്നത് സാമ്പത്തിക പ്രത്യാഘാതമുണ്ടാക്കാൻ സാധ്യതയുണ്ടെന്നും ഇത് സ്വർണ്ണത്തെ സുരക്ഷിത നിക്ഷേപം എന്ന നിലയിൽ നിക്ഷേപകർ കണക്കാക്കാൻ സാധ്യതയുണ്ടെന്നുമാണ് സാമ്പത്തിക വിദഗ്ധരുടെ വിലയിരുത്തൽ.

വിവാഹക്കാർക്ക് ആശ്വാസം

ഇന്ത്യയിലെയും ചൈനയിലെയും ഉപഭോക്തൃ ഡിമാൻഡിനെക്കുറിച്ചുള്ള ആശങ്കകളും സ്വർണ വിലയെ ബാധിക്കുന്നുണ്ട്. ഇന്ത്യയിൽ സ്വർണ്ണ വിലയിലുണ്ടായ വർധനവ് സ്വർണാഭരണങ്ങളുടെ വാങ്ങലിനെ ബാധിച്ചെങ്കിലും വിലയേറിയ ലോഹത്തിനുള്ള നിക്ഷേപ ആവശ്യം കഴിഞ്ഞ മാസങ്ങളിൽ ഉയർന്നു. ഗോൾഡ് എക്സ്ചേഞ്ച് ട്രേഡഡ് ഫണ്ടുകളുടെ (ഇടിഎഫ്) ഫെബ്രുവരിയിലെ മൊത്തം നിക്ഷേപം 1,483 കോടി രൂപയിലെത്തി. ജനുവരിയിൽ ഇത് 202 കോടി രൂപയായിരുന്നു. എന്നാൽ ഇന്നത്തെ വിലയിടിവ് വിവാഹക്കാർക്കും ആഭരണങ്ങൾ വാങ്ങാൻ കാത്തിരിക്കുന്നവർക്കും ഏറെ ആശ്വാസകരമാണ്.