കേരളത്തിൽ സ്വർണ വിലയിൽ ഇന്ന് കനത്ത ഇടിവ്, ഒരു പവന് 32000ൽ താഴെ

കേരളത്തിൽ സ്വർണ വില ഇന്ന് കുത്തനെ ഇടിഞ്ഞു, പവന് 200 രൂപ കുറഞ്ഞ് 31800 രൂപയ്ക്കാണ് ഇന്ന് വ്യാപാരം പുരോഗമിക്കുന്നത്. തുടർച്ചയായ മൂന്നാം ദിവസമാണ് സ്വർണ വിലയിൽ കുറവ് രേഖപ്പെടുത്തുന്നത്. ഇന്ന് ഒരു ഗ്രാം സ്വർണത്തിന്റെ വില 3975 രൂപയാണ്. ഈ മാസം സ്വർണത്തിന്റെ ചരിത്രത്തിലെ തന്നെ ഏറ്റവും ഉയർന്ന വിലയായ 32320 രൂപ രേഖപ്പെടുത്തിയിരുന്നു. മാർച്ച് ആറ് മുതൽ ഒൻപത് വരെയാണ് ഈ വിലയ്ക്ക് വ്യാപാരം നടന്നത്. പിന്നീടുള്ള ദിവസങ്ങളിൽ വില കുത്തനെ കുറയുകയായിരുന്നു.

എംസിഎക്സിലെ വില

തുടർച്ചയായ മൂന്നാം ദിവസവും എംസിഎക്സിൽ സ്വർണ നിരക്ക് കുറഞ്ഞു. എം‌സി‌എക്‌സിൽ ഏപ്രിൽ സ്വർണ്ണ ഫ്യൂച്ചറുകൾ 0.1 ശതമാനം കുറഞ്ഞ് 10 ഗ്രാമിന് 43,314 രൂപയിലെത്തി. വെള്ളി കിലോയ്ക്ക് 1.3 ശതമാനം ഇടിഞ്ഞ് 45,225 രൂപയായി കുറഞ്ഞു. ആഗോള വിപണിയിൽ നിന്ന് വ്യത്യസ്തമായാണ് ഇന്ന് ആഭ്യന്തര വിപണിയിൽ വില കുറഞ്ഞത്.

ആഗോള വിപണി

ലോകാരോഗ്യ സംഘടന കൊറോണ രോഗത്തെ മഹാമാരിയെന്ന് പ്രഖ്യാപിച്ചതിന് ശേഷം വിദേശ വിപണികളിൽ കൊറോണ വൈറസ് ആശങ്കകൾ വീണ്ടും ഉയർന്നു. ഇത് സ്വർണ വിലയെയും ബാധിച്ചു. ആഗോള വിപണിയിൽ സ്വർണ വില ഇന്ന് കുത്തനെ ഉയർന്നു. സ്‌പോട്ട് സ്വർണം ഔൺസിന് 0.6 ശതമാനം ഉയർന്ന് 1,645.00 ഡോളറിലെത്തി. മറ്റ് വിലയേറിയ ലോഹങ്ങളിൽ വെള്ളി ഔൺസിന് 0.6 ശതമാനം ഉയർന്ന് 16.85 ഡോളറിലെത്തി. പ്ലാറ്റിനം 0.2 ശതമാനം ഇടിഞ്ഞ് 858.63 ഡോളറിലെത്തി.

പലിശ നിരക്ക് കുറയ്ക്കൽ

ബാങ്ക് ഓഫ് ഇംഗ്ലണ്ട് ബുധനാഴ്ച പലിശനിരക്ക് കുറച്ചതോടെ സ്വർണ്ണത്തിന് വീണ്ടും പിന്തുണ ലഭിച്ചു. യുഎസ് ഫെഡറൽ റിസർവ് കഴിഞ്ഞയാഴ്ച അടിയന്തരയമായി നിരക്ക് കുറച്ചിരുന്നു. ബാങ്ക് ഓഫ് ജപ്പാൻ, യൂറോപ്യൻ സെൻട്രൽ ബാങ്ക് തുടങ്ങിയ സെൻട്രൽ ബാങ്കുകളും കൊറോണ വൈറസിന്റെ സാമ്പത്തിക ആഘാതം പരിഹരിക്കുന്നതിന് പുതിയ നടപടികളുമായി മുന്നോട്ട് പോകുകയാണ്. റിസർവ് ബാങ്കും ഇത് സംബന്ധിച്ച് ചർച്ചകൾ നടത്തുന്നുണ്ട്.

സുരക്ഷിത നിക്ഷേപം

ക്രൂഡ് ഓയിൽ വിൽപ്പന ആഗോള വിപണിയിൽ കുതിച്ചുകയറിയതോടെ ഈ ആഴ്ച ആദ്യം സ്വർണ്ണം ഔൺസിന് 1700 ഡോളറിനേക്കാൾ ഉയർന്നിരുന്നു. വൈറസ് പടരുന്നതിലെ ഭീഷണിയുടെ പശ്ചാത്തലത്തിൽ പ്രധാന സെൻ‌ട്രൽ ബാങ്കുകളുടെ പണ നയ നിലപാടാണ് സ്വർണ്ണ വിലയെ പിന്തുണയ്ക്കുന്നത്. കൊറോണ വൈറസ് വ്യാപിക്കുന്നത് സാമ്പത്തിക പ്രത്യാഘാതമുണ്ടാക്കാൻ സാധ്യതയുണ്ടെന്നും ഇത് സ്വർണ്ണത്തെ സുരക്ഷിത നിക്ഷേപം എന്ന നിലയിൽ നിക്ഷേപകർ കണക്കാക്കാൻ സാധ്യതയുണ്ടെന്നുമാണ് സാമ്പത്തിക വിദഗ്ധരുടെ വിലയിരുത്തൽ.

സ്വർണാഭരണങ്ങൾ വേണ്ട

ഇന്ത്യയിലെയും ചൈനയിലെയും ഉപഭോക്തൃ ഡിമാൻഡിനെക്കുറിച്ചുള്ള ആശങ്കകളും സ്വർണ വിലയെ ബാധിക്കുന്നുണ്ട്. ഇന്ത്യയിൽ സ്വർണ്ണ വിലയിലുണ്ടായ വർധനവ് സ്വർണാഭരണങ്ങളുടെ വാങ്ങലിനെ ബാധിച്ചെങ്കിലും വിലയേറിയ ലോഹത്തിനുള്ള നിക്ഷേപ ആവശ്യം കഴിഞ്ഞ മാസങ്ങളിൽ ഉയർന്നു. ഗോൾഡ് എക്സ്ചേഞ്ച് ട്രേഡഡ് ഫണ്ടുകളുടെ (ഇടിഎഫ്) ഫെബ്രുവരിയിലെ മൊത്തം നിക്ഷേപം 1,483 കോടി രൂപയിലെത്തി. ജനുവരിയിൽ ഇത് 202 കോടി രൂപയായിരുന്നു.