കുതിച്ചുയ‍‌‍‍ർന്ന് ഇന്ധനവില; കേരളത്തിലെ ഇന്നത്തെ പെട്രോൾ, ഡീസൽ വില അറിയാം

രാജ്യത്ത് പെട്രോൾ, ഡീസൽ വിലയിൽ ഇന്നും വർദ്ധനവ്. കേരളത്തിൽ ഒരു ലിറ്റർ പെട്രോളിന്റെ ഇന്നത്തെ വില 81.22 രൂപയാണ്. ഇന്നത്തെ ഡീസൽ നിരക്ക് 76.06 രൂപയാണ്. കഴിഞ്ഞ ഒരു മാസത്തിനിടെ പെട്രോൾ വില ലിറ്ററിന് 9.09 രൂപ ഉയർന്നു. മെയ് 20 ന് ലിറ്ററിന് 72.12 രൂപയായിരുന്നു പെട്രോളിന്റെ വില. മെയ് 20ന് 66.36 രൂപയായിരുന്ന ഡീസൽ വില ഒരു മാസം കൊണ്ട് ലിറ്ററിന് 9.7 രൂപ വർദ്ധനവ് രേഖപ്പെടുത്തി.

17 ദിവസത്തെ വില വർദ്ധനവ്

കഴിഞ്ഞ 17 ദിവസങ്ങളിലായി രാജ്യത്ത് പെട്രോൾ വില 8 രൂപയിൽ കൂടുതലും ഡീസൽ നിരക്ക് 10 രൂപയോളവും ഉയർന്നിട്ടുണ്ട്. വില വർദ്ധനവ് ദേശീയ തലസ്ഥാനത്ത് മാത്രമല്ല, ഇന്ത്യയിലെ എല്ലാ പ്രധാന നഗരങ്ങളിലും വില വർദ്ധിച്ചിട്ടുണ്ട്. പ്രാദേശിക വിൽപ്പന നികുതി, മൂല്യവർദ്ധിത നികുതി അല്ലെങ്കിൽ വാറ്റ് എന്നിവ അടിസ്ഥാനമാക്കി ഓരോ സംസ്ഥാനത്തെയും വില വ്യത്യാസപ്പെടുന്നു.

ഡൽഹിയിലെ വില

ലോക്ക്ഡൌൺ സമയത്ത് 82 ദിവസം ഇന്ധന വില പരിഷ്കരിച്ചിരുന്നില്ല. എന്നാൽ രാജ്യത്തെ പ്രധാന എണ്ണക്കമ്പനികൾ (ഒ‌എം‌സി) ‘അൺ‌ലോക്ക്' ന്റെ ആദ്യ ഘട്ടത്തിൽ നിരക്കുകളുടെ ദൈനംദിന പരിഷ്കരണം പുനരാരംഭിച്ചു. ഇതിനെ തുടർന്ന് വില അതിവേഗം ഉയരുകയാണിപ്പോൾ. പെട്രോൾ, ഡീസൽ വില യഥാക്രമം 79.76 രൂപയും (0.20 രൂപ), ലിറ്ററിന് 79.40 രൂപയുമാണ് (0.55 രൂപ വർദ്ധനവ്) ഇന്ന് ഡൽഹിയിൽ വർദ്ധിച്ചിരിക്കുന്നത്.

നികുതി

ഇന്ധന ചില്ലറ വിൽപ്പന വിലയുടെ മൂന്നിൽ രണ്ട് ഭാഗവും നികുതികളാണ്. പെട്രോൾ വിലയിൽ ലിറ്ററിന് 50.69 രൂപ അഥവാ 64% നികുതികളാണ്. 32.98 രൂപ കേന്ദ്ര എക്സൈസ് തീരുവയും 17.71 രൂപ പ്രാദേശിക വിൽപ്പന നികുതിയും വാറ്റും ആണ്. ഡീസലിന്റെ ചില്ലറ വിൽപ്പന വിലയുടെ 63% നികുതികളാണ്. മൊത്തം നികുതിയിൽ ലിറ്ററിന് 49.43 രൂപയിൽ 31.83 രൂപ കേന്ദ്ര എക്സൈസ് നികുതിയും 17.60 രൂപ വാറ്റും ആണ്.