കേരളത്തിലെ ഒരു പവൻ സ്വർണത്തിന്റെ ഇന്നത്തെ വില അറിയാം

കേരളത്തിൽ സ്വ‍ർണ വിലയിൽ ഇന്ന് മാറ്റമില്ല. ഇന്നലത്തെ അതേ വിലയ്ക്ക് തന്നെയാണ് ഇന്നും വ്യാപാരം പുരോ​ഗമിക്കുന്നത്. ഒരു പവന് 36720 രൂപയാണ് ഇന്നത്തെ വില. ​ഗ്രാമിന് 4590 രൂപയാണ് നിരക്ക്. ഡിസംബറിലെ ഏറ്റവും കുറഞ്ഞ സ്വ‍‍ർണ വിലയാണ് ഇന്നലെ മുതൽ കേരളത്തിൽ രേഖപ്പെടുത്തിയിരിക്കുന്നത്. ഈ മാസത്തെ ഏറ്റവും ഉയ‍ർന്ന വില ഡിസംബ‍ർ എട്ടിന് രേഖപ്പെടുത്തിയ 37280 രൂപയാണ്.

കഴിഞ്ഞ മാസത്തെ വില

കേരളത്തിൽ കഴിഞ്ഞ മാസം സ്വർണ വിലയിൽ വലിയ ചാഞ്ചാട്ടങ്ങൾ ഉണ്ടായിരുന്നു. നവംബറിലെ ആദ്യ ആഴ്ച്ചകളിൽ 38880 രൂപ വരെ ഉയ‍ർന്ന സ്വർണ വില നവംബർ അവസാനമായപ്പോഴേയ്ക്കും 35760 രൂപയായി കുറഞ്ഞു. വെറും ആഴ്ച്ചകൾക്കുള്ള 3000 രൂപയിലധികം കുറവാണ് സ്വ‍ർണ വിലയിലുണ്ടായത്.

ഇന്ത്യൻ വിപണി

ഇന്ത്യൻ വിപണിയിൽ ഇന്ന് സ്വർണ വില നേരിയ തോതിൽ ഉയർന്നു. രണ്ട് ദിവസത്തെ ഇടിവിന് ശേഷം ഫെബ്രുവരിയിൽ സ്വർണ്ണ ഫ്യൂച്ചറുകൾ 10 ഗ്രാമിന് 0.15 ശതമാനം ഉയർന്ന് 49,149 രൂപയിലെത്തി. വെള്ളി നിരക്ക് കിലോയ്ക്ക് 0.11 ശതമാനം കുറഞ്ഞ് 63,460 രൂപയിലെത്തി. കഴിഞ്ഞ സെഷനിൽ സ്വർണം 0.3 ശതമാനവും വെള്ളി 0.12 ശതമാനവും ഇടിഞ്ഞിരുന്നു.

ആഗോള വിപണി

ആഗോള വിപണികളിൽ സ്വർണ്ണ നിരക്ക് ഇന്ന് ഉയർന്നു. സ്‌പോട്ട് സ്വർണം 0.1 ശതമാനം ഉയർന്ന് ഔൺസിന് 1,836.54 ഡോളറിലെത്തി. വിലപിടിപ്പുള്ള മറ്റ് ലോഹങ്ങളിൽ വെള്ളി വില ഒരു ഔൺസിന് 0.1 ശതമാനം ഇടിഞ്ഞ് 23.94 ഡോളറിലും പ്ലാറ്റിനം 0.2 ശതമാനം ഉയർന്ന് 1,028.71 ഡോളറിലും പല്ലേഡിയം 0.1 ശതമാനം ഉയർന്ന് 2,334.03 ഡോളറിലും എത്തി. ഡോളറിന്റെ ഇടിവ് ഇന്ന് സ്വർണത്തെ പിന്തുണച്ചു.

2021ൽ സ്വർണ വില എങ്ങോട്ട്?

അടുത്ത വർഷം വരെ സ്വർണ വിലയിലെ കുതിപ്പ് തുടരുമെന്നാണ് ചില നിരീക്ഷകരുടെ അഭിപ്രായം. ആദ്യ പകുതിയിൽ ഉയരുന്ന സ്വർണ വില രണ്ടാം പകുതിയിൽ കുറയാൻ സാധ്യതയുണ്ടെന്നും സ്വർണ്ണത്തിന് ഒരു സമ്മിശ്ര വർഷമായിരിക്കും 2021 എന്നും വിശകലന വിദഗ്ധർ പറയുന്നു.