ടിവിഎസ് മോട്ടോർ ജീവനക്കാരുടെ ശമ്പളം 20% വരെ വെട്ടിക്കുറയ്ക്കും

കൊറോണ വൈറസ് പ്രതിസന്ധിയെ തുടർന്ന് ടിവിഎസ് മോട്ടോർ കമ്പനി ജീവനക്കാരുടെ ശമ്പളം 20 ശതമാനം വരെ കുറയ്ക്കുമെന്ന് പ്രഖ്യാപിച്ചു. ആറുമാസത്തേക്ക് താൽക്കാലിക ശമ്പള വെട്ടിക്കുറയ്ക്കൽ നടപ്പാക്കുകയെന്ന് കമ്പനി അറിയിച്ചു. കൊവിഡ് ലോക്ക്ഡൌൺ കാലത്ത് ഇരുചക്ര വാഹന കമ്പനിയുടെ വിൽപ്പന കുത്തനെ ഇടിഞ്ഞതിനാലാണ് ഇത്തരത്തിലൊരു തീരുമാനവുമായി കമ്പനി രംഗത്തെത്തിയിരിക്കുന്നത്.

ആറുമാസത്തേയ്ക്ക്

നിലവിലെ സാഹചര്യത്തിൽ ടിവിഎസ് മോട്ടോർ കമ്പനി ആറുമാസത്തേക്ക് വിവിധ തലങ്ങളിലുള്ള ജീവനക്കാരുടെ ശമ്പളം താൽക്കാലികമായി കുറയ്ക്കുമെന്ന് കമ്പനി അറിയിച്ചു. 2020 മെയ് മുതൽ ഒക്ടോബർ വരെയാണ് ജീവനക്കാരുടെ ശമ്പളം കുറയ്ക്കാൻ കമ്പനി തീരുമാനിച്ചിരിക്കുന്നത്.

ശമ്പളം വെട്ടിക്കുറയ്ക്കൽ

താഴ്ന്ന ശമ്പളം വാങ്ങുന്ന തൊഴിലാളികളുടെ ശമ്പളം വെട്ടിക്കുറയ്ക്കില്ലെന്നും ഉദ്യോഗസ്ഥ തലത്തിലുള്ളവരുടെ ശമ്പളമായിരിക്കും വെട്ടിക്കുറയ്ക്കുക എന്നും ടിവിഎസ് അറിയിച്ചു. എന്നിരുന്നാലും, ജൂനിയർ എക്സിക്യൂട്ടീവ് തലത്തിൽ 5 ശതമാനം ശമ്പളവും സീനിയർ മാനേജ്‌മെന്റ് തലത്തിൽ 15 ശതമാനം മുതൽ 20 ശതമാനം വരെ ശമ്പളവും കുറയ്ക്കുമെന്നാണ് വിവരം. സ്വമേധയാ ശമ്പളം കുറയ്ക്കാൻ ആവശ്യപ്പെട്ട് ജീവനക്കാർ മുന്നോട്ട് വന്നുവെന്നും ടിവിഎസ് പറഞ്ഞു.

വിൽപ്പന ഇടിഞ്ഞു

ടിവിഎസ് മോട്ടോർ കമ്പനി മാർച്ചിൽ ഇരുചക്ര വാഹന വിൽപ്പനയിൽ 55 ശതമാനം ഇടിവ് രേഖപ്പെടുത്തി. ടിവിഎസ് മാർച്ചിൽ 1,33,988 യൂണിറ്റുകൾ വിറ്റു. 2019 മാർച്ചിൽ ഇത് 3,10,885 യൂണിറ്റായിരുന്നു. മോട്ടോർ സൈക്കിൾ ഭീമനായ ടിവിഎസ് ആഭ്യന്തര തലത്തിൽ 2020 മാർച്ചിൽ 94,103 യൂണിറ്റ് വിറ്റു. മോട്ടോർ സൈക്കിൾ വിൽപ്പന കഴിഞ്ഞ മാർച്ചിൽ 1,41,086 ൽ നിന്ന് ഈ വർഷം 66,673 ആയി കുറഞ്ഞു. സ്കൂട്ടർ വിൽപ്പനയിലും ഇതേ മാസത്തിൽ വിൽപ്പന 98,447 ൽ നിന്ന് 34,191 ആയി കുറഞ്ഞു.

ലോക്ക്ഡൌൺ പ്രതിസന്ധി

ഏപ്രിലിൽ, ലോക്ക്ഡൌൺ പൂർണ്ണമായും പ്രാബല്യത്തിൽ വന്നപ്പോൾ, ടിവിഎസ് മോട്ടോർ ആഭ്യന്തര വിപണിയിൽ വിൽപ്പന പൂജ്യമായി റിപ്പോർട്ട് ചെയ്തു. ചെന്നൈ തുറമുഖത്ത് പ്രവർത്തനം പുനരാരംഭിച്ച ശേഷം 8,134 ഇരുചക്രവാഹനങ്ങളും 1,506 ത്രീ വീലറുകളും കയറ്റുമതി ചെയ്തു. മാരുതി സുസുക്കി, സ്കോഡ ഓട്ടോ, എംജി മോട്ടോർ എന്നിവയാണ് ഏപ്രിലിൽ ആഭ്യന്തര വിൽപ്പന പൂജ്യം രേഖപ്പെടുത്തിയ മറ്റ് കമ്പനികൾ.