ഫോട്ടോകോപ്പികൾ എടുത്ത് സമയം കളയേണ്ട, ആധാർ പരിശോധിക്കാൻ ക്യൂആർ കോഡുള്ള പുതിയ ആപ്പ് വരുന്നു

രാജ്യത്തെ ഏറ്റവും വലിയ തിരിച്ചറിയൽ രേഖയായ ആധാർ കാർഡിൽ വീണ്ടും പുതിയ അപ്ഡേറ്റ് വരുന്നു. ഇത്തവണ ഉപഭോക്താക്കൾക്ക് ആധാർ ഉപയോ​ഗം കൂടുതൽ ലളിതമാക്കാൻ സഹായിക്കുന്നു. ഡിജിറ്റൽ കാർഡുകളുണ്ടെങ്കിലും പല ഔദ്യോ​ഗിക ആവശ്യങ്ങൾക്കും ആധാറിൻ്റെ ഫോട്ടോകോപ്പികൾ കൈവശം സൂക്ഷിക്കേണ്ടി വരുന്നു. ഈ പ്രശ്നം അവസാനിപ്പിക്കുന്നതിന് യുണീക്ക് ഐഡന്റിഫിക്കേഷൻ അതോറിറ്റി ഓഫ് ഇന്ത്യ (യുഐഡിഎഐ) പുതിയ മൊബൈൽ ആപ്പ് അവതരിപ്പിക്കുന്നു.

ഈ ആപ്പിൻ്റെ വരവോടെ ഡിജിറ്റൽ രൂപത്തിൽ എല്ലായിടത്തും ആധാർ ഉപയോ​ഗിക്കാൻ സാധിക്കും. ഒരു ക്യുആർ കോഡ് വഴി ആധാറിൻ്റെ പൂർണ്ണമായതോ അല്ലെങ്കിൽ മാസ്ക് ചെയ്തതോ ആയ പതിപ്പ് അയയ്ക്കാൻ അനുവദിക്കുന്നു. ഉടൻ തന്നെ പുതിയ ആപ്പ് പ്രതീക്ഷിക്കാം... ഇതോടെ ആളുകൾ വീട്ടിലിരുന്ന് തന്നെ അപ്ഡേറ്റുകൾ പൂർത്തിയാക്കാനും സാധിക്കുമെന്നതാണ് ഏറ്റവും വലിയ ആശ്വാസം. കൂടുതൽ അറിയാം.

വീട്ടിലിരുന്ന് ആധാർ അപ്‌ഡേറ്റ് ചെയ്യാം...

ആധാർ അപ്ഡേറ്റിലും പുതിയ മാറ്റങ്ങൾ വരുന്നു. അതായത് ഇനി മുതൽ നിങ്ങൾക്ക് വീട്ടിലിരുന്ന് തന്നെ മേൽവിലാസം, ഫോൺ നമ്പർ, പേര്, ജനനതിയ്യതി എന്നിവ അപ്ഡേറ്റ് ചെയ്യാൻ സാധിക്കും. നവംബർ മുതലായിരിക്കും ഈ മാറ്റം പൂർണമായും എത്തുന്നത്. അതിനാൽ തന്നെ നിങ്ങളുടെ വിരലടയാളങ്ങളും ഐറിസ് സ്കാനുകളും മാത്രം എൻറോൾമെന്റ് സെന്ററിൽ നേരിട്ട് എത്തി നൽകിയാൽ മതിയാവും.

അമിതമായ പേപ്പർവർക്കുകൾ കുറയ്ക്കുക, വ്യാജ രേഖകളുടെ അപകടസാധ്യത കുറയ്ക്കുക, അപ്ഡേറ്റ് പ്രക്രിയകൾ വേഗത്തിലാക്കുക എന്നിവയാണ് ഈ മാറ്റത്തിലൂടെ ലക്ഷ്യമിടുന്നത്. ജനന സർട്ടിഫിക്കറ്റുകൾ, ഡ്രൈവിംഗ് ലൈസൻസുകൾ, പാസ്‌പോർട്ടുകൾ, പാൻ, പിഡിഎസ് തുടങ്ങിയ രേഖകളിൽ നിന്ന് യുഐഡിഎഐ നേരിട്ട് ഡാറ്റ ശേഖരിക്കുന്നു.

പുതിയ യുഐഡിഎഐ ആപ്പ് പുറത്തിറങ്ങി.

യുഐഡിഎഐയുടെ ഒരു ലക്ഷം എൻറോൾമെന്റ് മെഷീനുകളിൽ ഏകദേശം 2,000 എണ്ണം പുതിയ ആപ്പിലേക്ക് മാറ്റിയതായി യുഐഡിഎഐ ചീഫ് എക്സിക്യൂട്ടീവ് ഓഫീസർ ഭുവനേഷ് കുമാർ പറഞ്ഞു. "വിരലടയാളങ്ങളും ഐആർഐഎസും നൽകുന്നത് ഒഴികെയുള്ള മറ്റെല്ലാം നിങ്ങൾക്ക് വീട്ടിൽ ഇരുന്ന് തന്നെ ചെയ്യാൻ കഴിയും," . ഹോട്ടൽ ചെക്ക്-ഇന്നുകൾ, പ്രോപ്പർട്ടി ഡീലുകൾ, ട്രെയിനുകളിലെ തിരിച്ചറിയൽ പരിശോധനകൾ എന്നിവയിൽ പോലും ക്യുആർ-കോഡ് മാർ​ഗത്തിലൂടെ ആധാർ അയക്കാൻ സാധിക്കുന്നു.

ആധാറിന്റെ ദുരുപയോഗം പരിമിതപ്പെടുത്തുന്നതിനാണ് ആപ്പിൽ ക്യുആർ കോഡ് രൂപകൽപ്പന ചെയ്തിരിക്കുന്നത്. "ഇത് നിങ്ങളുടെ സ്വന്തം ഡാറ്റയിൽ പരമാവധി ഉപയോക്തൃ നിയന്ത്രണം വാഗ്ദാനം ചെയ്യുന്നു, മാത്രമല്ല ക്യൂആർ കോഡ് വഴി ആധാർ ഷെയർ ചെയ്യണമെങ്കിൽ നിങ്ങൾ സമ്മതം നൽകേണ്ടി വരും" ഭുവനേഷ് കുമാർ കൂട്ടിച്ചേർത്തു. പല വിധത്തിലാണ് രേഖകൾ വഴി തട്ടിപ്പ് നടത്തുന്നത്. അതിനാൽ പ്രോപ്പർട്ടി രജിസ്ട്രേഷൻ ഓഫീസുകളിൽ ഈ സംവിധാനം ഉപയോഗിക്കാൻ യുഐഡിഎഐ സംസ്ഥാനങ്ങളോട് അഭ്യർത്ഥിക്കുന്നു.

കുട്ടികളുടെ രേഖകൾ ശ്രദ്ധിക്കണം...

അഞ്ച് മുതൽ ഏഴ് വയസ്സ് വരെയുള്ള കുട്ടികൾക്കും 15 മുതൽ 17 വയസ്സ് വരെയുള്ള കുട്ടികൾക്കും നിർബന്ധിത ബയോമെട്രിക് അപ്‌ഡേറ്റുകൾ പൂർത്തിയാക്കുന്നതിനായി യുഐഡിഎഐ പദ്ധതിയിടുന്നു. ആദ്യ റൗണ്ടിൽ എട്ട് കോടി അപ്‌ഡേറ്റുകളും രണ്ടാം റൗണ്ടിൽ 10 കോടി അപ്‌ഡേറ്റുകളും ഇനിയും തീർപ്പാക്കാനുണ്ടെന്ന് ഉദ്യോഗസ്ഥർ കണക്കാക്കുന്നു.

ആധാറിൻ്റെ പുതിയ മാറ്റങ്ങളെല്ലാം വഞ്ചനാപരമായ കുറ്റങ്ങൾ അവസാനിപ്പിക്കാനും, ഇത്തരം പ്രശ്നങ്ങൾ നിയന്ത്രണ വിധേയമാക്കുന്നതിനും ഉപകാരപ്രദമാവും. അനാവശ്യമായി രേഖകൾ നൽകിയാൽ അത് ദുരുപയോ​ഗം ചെയ്യപ്പെടാൻ സാധ്യതയുണ്ട്, അതിനാൽ പുതിയ ഡിജിറ്റൽ മാർ​ഗം ആധാർ ഉടമയുടെ പൂർണ സുരക്ഷ ഉറപ്പാക്കുന്നു.

FAQs

ആധാറിൻ്റെ പുതിയ ആപ്പിൻ്റെ സവിശേഷത എന്താണ്?

യുഐഡിഎഐയുടെ പുതിയ മൊബൈൽ ആപ്പ് ഉപയോഗിച്ച് ആധാർ ഉടമകൾക്ക് ഡിജിറ്റൽ മാർ​ഗത്തിലൂടെ ആധാർ അയക്കാം. ഇത് ക്യുആർ കോഡ് വഴി അവരുടെ ആധാറിൻ്റെ പൂർണ്ണമായതോ മാസ്ക് ചെയ്തതോ ആയ കോപ്പി അയക്കാൻ അനുവദിക്കും. 

പുതിയ നിയമം അനുസരിച്ച് ആധാറിലെ വ്യക്തിഗത വിവരങ്ങൾ എങ്ങനെയാണ് അപ്‌ഡേറ്റ് ചെയ്യുക?

വ്യക്തികൾക്ക് അവരുടെ മേൽവിലാസം, ഫോൺ നമ്പർ, പേര്, ജനനതിയതി എന്നിവ വീട്ടിൽ നിന്ന് തന്നെ അപ്ഡേറ്റ് ചെയ്യാനാവും. എന്നാൽ വിരലടയാളങ്ങളും ഐറിസ് സ്കാനുകളും എൻട്രോൾമെന്റ് സെന്ററിൽ നേരിട്ടെത്തി അപ്ഡേറ്റ് ചെയ്യണം. 

പുതിയ ക്യൂആർ കോഡ് രീതിയുടെ ലക്ഷ്യം എന്താണ്?

ആധാർ ഡാറ്റയുടെ ദുരുപയോഗം പരിമിതപ്പെടുത്തുക, ഉപയോക്താക്കൾക്ക് അവരുടെ വിവരങ്ങളിൽ പരമാവധി നിയന്ത്രണം നൽകുക തുടങ്ങിയ കാര്യങ്ങൾ കൊണ്ടാണ് പുതിയ മാറ്റം എത്തുന്നത്.