2026-ൽ വൈദ്യുത ചിലവ് കുറയ്ക്കാം, ഈ കേന്ദ്ര സർക്കാർ പദ്ധതിയുടെ സബ്സിഡി 40,000 രൂപയായി ഉയർത്തും, വായിക്കാം

2026-ലെ കേന്ദ്ര ബജറ്റ് അവതരണത്തിന് ഇനി ഒരുമാസമാണ് ബാക്കിയുള്ളത്. സാധാരണയായി ഫെബ്രുവരി ഒന്നിന് അവതരിപ്പിക്കാറുണ്ട്, എന്നാൽ 2026-ൽ ഫെബ്രുവരി 1 ഞാറാഴ്ച ആയതിനാൽ തീയതിയിൽ മാറ്റം വരാൻ സാധ്യതയുണ്ട്. 2025-26 കേന്ദ്ര ബഡ്ജറ്റ് ജനുവരി 31 ശനിയാഴ്ച അവതരിപ്പിക്കുമോ, അതോ ഫെബ്രുവരി 2 തിങ്കളാഴ്ച അവതരിപ്പിക്കുമോ, അതോ ഫെബ്രുവരി ഒന്ന് ഞായറാഴ്ച അവതരിപ്പിക്കുമോ എന്നത് സംബന്ധിച്ച് ഇതുവരെ തീരുമാനമായിട്ടില്ല എന്ന് എൻഡിടിവി റിപ്പോർട്ട് ചെയ്തു. പാർലമെന്ററി കാര്യങ്ങൾക്കായുള്ള കാബിനറ്റ് കമ്മിറ്റിയാണ് ഇക്കാര്യത്തിൽ അന്തിമ തീരുമാനം എടുക്കുന്നത്. അവതരിപ്പിക്കുന്ന തീയ്യതിയിൽ തീരുമാനമായില്ലെങ്കിലും ബജറ്റിലെ പ്രതീക്ഷകൾ എന്തൊക്കെ എന്നതിനെ സംബന്ധിച്ച് കണക്ക് കൂട്ടുകയാണ് സാമ്പത്തിക വിദഗ്ധർ.

സോളാർ പാനലുകൾക്ക് സബ്സിഡി

വരാനിരിക്കുന്ന കേന്ദ്ര ബജറ്റിൽ പ്രധാനമന്ത്രി സൂര്യ ഘർ: മുഫ്ത് ബിജ്‌ലി യോജന (പിഎംഎസ്ജിവൈ) പ്രകാരം മേൽക്കൂരയിലെ സോളാർ ഇൻസ്റ്റാളേഷനുകൾക്കുള്ള സബ്‌സിഡികൾ സർക്കാർ വർദ്ധിപ്പിക്കാൻ സാധ്യതയുണ്ടെന്നാണ് ദേശീയ മാധ്യമങ്ങൾ നൽകുന്ന സൂചന. വർദ്ധിച്ചുവരുന്ന ഊർജ്ജ ആവശ്യകതകളും കാലാവസ്ഥാ വ്യത്യാനങ്ങൾക്കും ഇടയിൽ വീടുകൾക്ക് സൗരോർജ്ജം കൂടുതൽ ലഭിക്കാനും വേഗത്തിൽ നടപടികൾ പൂർത്തിയാക്കാനും സബ്സിഡി വർദ്ധന സഹായിക്കുമെന്നാണ് വിലയിരുത്തൽ.

10 ദശലക്ഷം സോളാർ വീടുകൾ

2 kW വരെയുള്ള സിസ്റ്റങ്ങളെയാണ് നിർദ്ദിഷ്ട വർദ്ധനവ് ലക്ഷ്യമിടുന്നത്, സബ്സിഡി നിലവിലുള്ള kW-ന് 30,000 രൂപയിൽ നിന്ന് 40,000 രൂപയായി ഉയർത്തുന്നു. 2 kW നും 3 kW നും ഇടയിലുള്ള ഇൻസ്റ്റാളേഷനുകൾക്ക്, സബ്സിഡി kW-ന് 18,000 രൂപയായി തുടരും, അതേസമയം 3 kW-ൽ കൂടുതലുള്ള സിസ്റ്റങ്ങൾക്ക്, ഇത് 78,000 രൂപയായി പരിമിതപ്പെടുത്തും. ഈ മാറ്റങ്ങൾ നടപ്പിലാക്കുകയാണെങ്കിൽ, റെസിഡൻഷ്യൽ ഉപയോക്താക്കളുടെ മുൻകൂർ ചെലവ് ഗണ്യമായി കുറയ്ക്കാൻ അവയ്ക്ക് കഴിയും, ഇത് സൗരോർജ്ജത്തിന്റെ സ്വീകാര്യത ത്വരിതപ്പെടുത്താൻ സാധ്യതയുണ്ട്.

2027 സാമ്പത്തിക വർഷത്തോടെ 10 ദശലക്ഷം സോളാർ ഇൻസ്റ്റാളേഷനുകൾ എന്ന ലക്ഷ്യം കൈവരിക്കുന്നതിന് സബ്‌സിഡി തുക വർദ്ധിപ്പിക്കാനാണ് കേന്ദ്രസർക്കാർ തീരുമാനമെന്നാണ് ദേശീയ മാധ്യമങ്ങൾ പറയുന്നത്. 2025 ജൂലൈ വരെ ഏകദേശം 1.6 ദശലക്ഷം സോളാർ ഇൻസ്റ്റാളേഷനുകൾ പൂർത്തിയായി.

ജലവൈദ്യുത നയവും പ്രഖ്യാപിച്ചേക്കും

ബജറ്റിൽ സർക്കാർ ഒരു ചെറിയ ജലവൈദ്യുത നയവും പ്രഖ്യാപിച്ചേക്കാമെന്നാണ് സൂചന. 25 മെഗാവാട്ട് വരെ ശേഷിയുള്ള ജലവൈദ്യുത പദ്ധതികൾക്ക് സാമ്പത്തിക പ്രോത്സാഹനങ്ങൾ നൽകും. നവ & പുനരുപയോഗ ഊർജ്ജ മന്ത്രാലയം ഇത് സംബന്ധിച്ച ഒരു നിർദ്ദേശം നൽകിയിട്ടുണ്ട്. ഇതോടെ പുനരുപയോഗ ഊർജ്ജ മേഖലയ്ക്കുള്ള മൊത്തം ബജറ്റ് വിഹിതം 26,500 കോടി രൂപയിൽ അധികമാക്കിയേക്കാം.

പ്രധാനമന്ത്രി സൂര്യ ഘര്‍ മുഫ്ത് ബിജ്ലി യോജന

ഇന്ത്യൻ കുടുംബങ്ങൾക്ക് സൗജന്യ വൈദ്യുതി ലക്ഷ്യമിട്ടുള്ള കേന്ദ്രസർക്കാരിൻ്റെ പദ്ധതിയാണ് 'പിഎം സൂര്യ ഘർ: മുഫ്ത് ബിജ്ലി യോജന'. സോളാർ സംവിധാനങ്ങൾ സ്ഥാപിക്കുന്നതിന് സബ്സിഡിയും കുറഞ്ഞ പലിശയിൽ വായ്പയും നൽകും. ഈ പദ്ധതി പ്രകാരം, വെറും 6% എന്ന കുറഞ്ഞ നിരക്കിൽ 2 ലക്ഷം രൂപ വരെ വായ്പകൾ കേന്ദ്രം നൽകും. പ്രധാനമന്ത്രി സൂര്യ ഘർ പദ്ധതിയുടെ ഔദ്യോഗിക വെബ്സൈറ്റ് https://pmsuryaghar.gov.in/ സന്ദർശിച്ച് പദ്ധതിക്ക് അപേക്ഷിക്കാം.

അറിയിപ്പ്: ഇവിടെ പ്രകടിപ്പിച്ചിട്ടുള്ള അഭിപ്രായങ്ങളും നിർദ്ദേശങ്ങളും വ്യക്തിഗത വിശകലന വിദഗ്ദ്ധരുടെയോ സ്ഥാപനങ്ങളുടെയോ മാത്രം കാഴ്ചപ്പാടുകളാണ്. ഇത് Goodreturns.in-ന്റെയോ Greenium Information Technologies Private Limited-ന്റെയോ നിലപാടുകളെ പ്രതിഫലിക്കുന്നില്ല. ഈ ഉള്ളടക്കത്തിന്റെ കൃത്യത, പൂർണ്ണത, അല്ലെങ്കിൽ വിശ്വാസ്യത എന്നിവയ്ക്ക് ഞങ്ങൾ യാതൊരു ഉറപ്പും നൽകുന്നില്ല, മാത്രമല്ല അതിന് ഉത്തരവാദിത്തം ഏറ്റെടുക്കുന്നുമില്ല.

ഞങ്ങൾ ഏതെങ്കിലും തരത്തിലുള്ള നിക്ഷേപ ഉപദേശങ്ങൾ നൽകുകയോ, ഓഹരികൾ വാങ്ങാനോ വിൽക്കാനോ ശുപാർശ ചെയ്യുകയോ ചെയ്യുന്നില്ല. ഈ വിവരങ്ങൾ വിജ്ഞാനപ്രദമായ ആവശ്യങ്ങൾക്ക് മാത്രമുള്ളതാണ്. അതിനാൽ, ഏതെങ്കിലും നിക്ഷേപ തീരുമാനങ്ങൾ എടുക്കുന്നതിന് മുൻപ്, ലൈസൻസുള്ള ഒരു സാമ്പത്തിക ഉപദേഷ്ടകനുമായി കൂടിയാലോചിക്കുന്നത് നിർബന്ധമാണ്.