Union Budget 2026: എന്താണ് സാമ്പത്തിക സർവേ? ബജറ്റിന് മുൻപേ ഇത് അവതരിപ്പിക്കുന്നത് എന്തിന്?

പുതുവർഷം പിറന്നതോടെ രാജ്യം ഏറെ ആകാംക്ഷയോടെ കാത്തിരിക്കുന്നത് 2026-27 സാമ്പത്തിക വർഷത്തേക്കുള്ള കേന്ദ്ര ബജറ്റിനായാണ്. മുൻ വർഷങ്ങളിൽ നിന്ന് വ്യത്യസ്തമായി ഇത്തവണ അപ്രതീക്ഷിതമായ വലിയ പ്രഖ്യാപനങ്ങൾക്ക് സാധ്യത കുറവാണെങ്കിലും, സാമ്പത്തിക മേഖലയിൽ വലിയ മാറ്റങ്ങൾ ഉണ്ടായേക്കാം. സാധാരണയായി ഫെബ്രുവരി 1നാണ് ബജറ്റ് അവതരിപ്പിക്കാറുള്ളത്. എന്നാൽ 2026 ഫെബ്രുവരി 1 ഞായറാഴ്ചയായതിനാൽ അവതരണ തീയതിയിൽ മാറ്റമുണ്ടാകുമോ എന്ന കാര്യത്തിൽ ഔദ്യോഗിക സ്ഥിരീകരണം വരാനിരിക്കുന്നതേയുള്ളൂ.

ബജറ്റ് അവതരണത്തിന് കൃത്യം ഒരു ദിവസം മുൻപാണ് ധനകാര്യ മന്ത്രാലയം 'സാമ്പത്തിക സർവ്വേ' സമർപ്പിക്കുന്നത്. ബജറ്റ് ഫെബ്രുവരി 1ന് തന്നെ തീരുമാനിക്കുകയാണെങ്കിൽ, ജനുവരി 31-ന് സാമ്പത്തിക സർവ്വേ പുറത്തിറക്കും. രാജ്യത്തിന്റെ സാമ്പത്തിക പ്രകടനത്തെക്കുറിച്ചുള്ള സമഗ്രമായ വിശകലനം വാഗ്ദാനം ചെയ്യുന്ന അതിപ്രധാനമായ രേഖയാണിത്.

സർക്കാരിന്റെ മുഖ്യ സാമ്പത്തിക ഉപദേഷ്ടാവ് (CEA) വി. അനന്ത നാഗേശ്വരന്റെ മേൽനോട്ടത്തിൽ സാമ്പത്തിക കാര്യ വകുപ്പാണ് (DEA) ഈ വാർഷിക റിപ്പോർട്ട് തയ്യാറാക്കുന്നത്. കഴിഞ്ഞ സാമ്പത്തിക വർഷത്തിൽ ഇന്ത്യ കൈവരിച്ച പുരോഗതി, നേരിട്ട വെല്ലുവിളികൾ, വിവിധ മേഖലകളിലെ വളർച്ചാ നിരക്ക് എന്നിവയെല്ലാം ഇതിൽ വിശദീകരിക്കുന്നു.

മുഖ്യ സാമ്പത്തിക ഉപദേഷ്ടാവും മറ്റ് മുതിർന്ന ഉദ്യോഗസ്ഥരും പങ്കെടുക്കുന്ന പത്രസമ്മേളനത്തിലൂടെയാണ് സർവ്വേ റിപ്പോർട്ട് പുറത്തുവിടുന്നത്. രാജ്യത്തിന്റെ വരാനിരിക്കുന്ന സാമ്പത്തിക ദിശ നിശ്ചയിക്കുന്നതിലും ബജറ്റ് നയങ്ങൾ രൂപീകരിക്കുന്നതിലും ഈ സർവ്വേയിലെ കണ്ടെത്തലുകൾ നിർണ്ണായക പങ്ക് വഹിക്കുന്നു.

ആദ്യത്തെ സാമ്പത്തിക സർവ്വേ അവതരിപ്പിച്ചത് 1950-51ലാണ്. 1964 വരെ കേന്ദ്ര ബജറ്റിനൊപ്പമായിരുന്നു ഈ സർവ്വേ അവതരിപ്പിച്ചിരുന്നത്. അതിനു ശേഷമാണ് ബജറ്റ് പ്രഖ്യാപനത്തിന് തൊട്ടു മുന്നേയായി ഇത് അവതരിപ്പിക്കാൻ തുടങ്ങിയത്.

സാമ്പത്തിക സർവ്വേയുടെ രണ്ട് ഭാ​ഗങ്ങൾ

രണ്ട് ഭാഗങ്ങളായിട്ടാണ് സാമ്പത്തിക സർവ്വേ വേർതിരിച്ചിരിക്കുന്നത്. പാർട്ട് A എന്നും പാർട്ട് B എന്നും ഈ ഭാ​ഗങ്ങൾ അറിയപ്പെടും. ആദ്യ ഭാഗത്തിൽ വളർച്ച, പണപ്പെരുപ്പം, ധനസ്ഥിതി, മേഖല തിരിച്ചുള്ള പ്രകടനം തുടങ്ങിയ വിശാലമായ സാമ്പത്തിക ട്രെൻഡുകൾ ഉൾക്കൊള്ളും. എന്നാൽ രണ്ടാം ഭാഗത്തിൽ ദാരിദ്ര്യം, വിദ്യാഭ്യാസം, ആരോഗ്യം, മനുഷ്യവികസനം, കാലാവസ്ഥാ സംബന്ധമായ വെല്ലുവിളികൾ തുടങ്ങിയ വിവരങ്ങളും ഉൾക്കൊള്ളുന്നു.

രാജ്യത്തിന്റെ സാമ്പത്തിക ഭദ്രതയും ഭാവി സാധ്യതകളും വിലയിരുത്തുന്ന സാമ്പത്തിക സർവ്വേ പ്രധാനമായും ജിഡിപി വളർച്ച, വിലക്കയറ്റം, തൊഴിൽ, ധനക്കമ്മി തുടങ്ങിയ പ്രധാന സൂചകങ്ങളെയാണ് ട്രാക്ക് ചെയ്യുന്നത്. അതുപോലെ തന്നെ കൃഷി, വ്യവസായം തുടങ്ങി കഴിഞ്ഞ സാമ്പത്തിക വർഷത്തിൽ കൈവരിച്ച നേട്ടങ്ങളും നേരിട്ട വെല്ലുവിളികളും സർവ്വേ വിലയിരുത്തുന്നു. ആഗോള വിപണിയിലെ ആവശ്യകതയും മറ്റും ഇന്ത്യൻ സമ്പദ്‌വ്യവസ്ഥയെ എങ്ങനെയെല്ലാം ബാധിച്ചേക്കാം എന്നതിനെക്കുറിച്ചും റിപ്പോർട്ടിൽ വ്യക്തമാക്കും.

മാസങ്ങളോളം നീണ്ടു നിൽക്കുന്ന പ്രക്രിയയാണ് സാമ്പത്തിക സർവ്വേ. ധനകാര്യ മന്ത്രാലയത്തിലെ സാമ്പത്തിക വിഭാഗമാണ് ഈ പ്രവർത്തനങ്ങൾക്ക് നേതൃത്വം നൽകുന്നത്. കേന്ദ്ര-സംസ്ഥാന വകുപ്പുകൾ, സ്വയംഭരണ സ്ഥാപനങ്ങൾ, ഗവേഷണ കേന്ദ്രങ്ങൾ, അന്താരാഷ്ട്ര സാമ്പത്തിക ഏജൻസികൾ എന്നിവയിൽ നിന്നുള്ള വിവരങ്ങളും ശേഖരിക്കുന്നു.