സ്ഥിര നിക്ഷേപങ്ങളുടെ പലിശ നിരക്കുകൾ പുതുക്കി ബാങ്കുകൾ; ഏറ്റവും പുതിയ നിരക്കുകളിങ്ങനെ...

സ്ഥിര നിക്ഷേപങ്ങൾ എപ്പോഴും ജനപ്രിയമായ നിക്ഷേപ മാർഗങ്ങളാണ്. ദീർഘകാലാടിസ്ഥാനത്തിൽ വലിയൊരു സമ്പാദ്യം നേടിയെടുക്കുകയെന്ന ലക്ഷ്യത്തോടെയാണ് പലരും സ്ഥിര നിക്ഷേപങ്ങളെ ആശ്രയിക്കുന്നത്. വലിയ പലിശ നിരക്കും സ്ഥിര നിക്ഷേപങ്ങളുടെ ആകർഷണീയതാണ്. പല ബാങ്കുകളും സ്ഥിര നിക്ഷേപങ്ങൾക്ക് ഉയർന്ന് പലിശ നിരക്ക് വാഗ്‌ദാനം ചെയ്യുന്നുണ്ട്.

എന്നാൽ, സ്വകാര്യ ബാങ്കായ യെസ് ബാങ്ക് സ്ഥിരനിക്ഷേപ പലിശ നിരക്കുകൾ അടുത്തിടെ വെട്ടിക്കുറച്ചു. 25 ബേസിസ് പോയിന്റുകളാണ് ബാങ്ക് വെട്ടിക്കുറച്ചത്. 2024 നവംബർ 5 മുതൽ ഈ നിരക്ക് പ്രാബല്യത്തിൽ വന്നു. ഇപ്പോൾ സാധാരണ പൗരന്മാർക്ക്, യെസ് ബാങ്കിലെ എഫ്ഡി പലിശ നിരക്കുകൾ 3.25% മുതൽ 7.75% വരെയാണ്. മുതിർന്ന പൗരന്മാർക്ക് 3.75% മുതൽ 8.25% വരെ പലിശ ലഭിക്കും. 18 മാസത്തെ എഫ്ഡികൾക്കാണ് ബാങ്ക് ഏറ്റവും ഉയർന്ന പലിശ നിരക്ക് നൽകുന്നത്. സാധാരണ പൗരന്മാർക്ക് 7.75 ശതമാനവും മുതിർന്ന പൗരന്മാർക്ക് 8.25 ശതമാനവുമാണ് ബാങ്ക് വാഗ്‌ദാനം ചെയ്യുന്ന പലിശ നിരക്ക്. സ്റ്റേറ്റ് ബാങ്ക് ഓഫ് ഇന്ത്യ, ഐസിഐസിഐ ബാങ്ക്, പഞ്ചാബ് നാഷണൽ ബാങ്ക്, എച്ച്‌ഡിഎഫ്‌സി ബാങ്ക് എന്നിവയുടെ പലിശ നിരക്കുകളെക്കുറിച്ച് അറിയാം.

എസ്ബിഐ

സ്റ്റേറ്റ് ബാങ്ക് ഓഫ് ഇന്ത്യയിൽ സാധാരണ പൗരന്മാർക്കുള്ള പലിശ നിരക്ക് 3.50% മുതൽ 7.10% വരെയാണ്, മുതിർന്ന പൗരന്മാർക്ക് 4% മുതൽ 7.60% വരെയാണ്. എസ്ബിഐയുടെ പ്രത്യേക '400 ദിവസം' എഫ്ഡി സ്കീമിൽ മുതിർന്ന പൗരന്മാർക്ക് 7.60% പലിശ ലഭിക്കുന്നു.

ഐസിഐസിഐ

ഐസിഐസിഐ ബാങ്ക് സ്ഥിരനിക്ഷേപ നിരക്കുകൾ സാധാരണ പൗരന്മാർക്ക് 3% മുതൽ 7.25% വരെയും മുതിർന്ന പൗരന്മാർക്ക് 3.50% മുതൽ 7.80% വരെയും കുറച്ചിട്ടുണ്ട്. 15 മുതൽ 18 മാസം വരെയുള്ള എഫ്ഡിയിൽ ഏറ്റവും ഉയർന്ന പലിശയായ 7.80% ബാങ്ക് നൽകുന്നു.

എച്ച്ഡിഎഫ്‌സി

എച്ച്‌ഡിഎഫ്‌സി ബാങ്കും എഫ്‌ഡി നിരക്കിൽ മാറ്റം വരുത്തിയിട്ടുണ്ട്. സാധാരണ പൗരന്മാർക്ക് പലിശ നിരക്ക് 3% ൽ നിന്ന് 7.35% ആയും മുതിർന്ന പൗരന്മാർക്ക് 3.50% ൽ നിന്ന് 7.85% ആയും ഉയർത്തി. എച്ച്ഡിഎഫ്‌സി ബാങ്ക് 2 വർഷവും 11 മാസം മുതൽ 35 മാസം വരെയുള്ള എഫ്ഡികൾക്ക് 7.75% പലിശ നൽകുന്നു.

പഞ്ചാബ് നാഷണൽ ബാങ്ക്

പഞ്ചാബ് നാഷണൽ ബാങ്ക് (പിഎൻബി) എഫ്ഡി നിരക്കുകൾ 3.50% മുതൽ 7.25% വരെയും മുതിർന്ന പൗരന്മാർക്ക് 4% മുതൽ 7.75% വരെയും നിശ്ചയിച്ചിട്ടുണ്ട്. 400 ദിവസത്തെ എഫ്ഡിയിൽ 7.75% ആണ് പിഎൻബിയുടെ ഉയർന്ന പലിശ നിരക്ക്.