ഡെബിറ്റ് കാർഡുകൾക്ക് ഭീഷണിയായി യു.പി.ഐ; പുതിയ ഫീച്ചറുകൾ ഡിജിറ്റൽ പേയ്മെന്റ് മേഖലയിലെ വലിയ മാറ്റം

ഡിജിറ്റൽ പേയ്മെന്റ് മേഖല വ്യാപകമായി വളർന്നു. എല്ലായിടത്തും ഇടപാടുകൾ ഡിജിറ്റലായി നടത്തുന്നു. സാമ്പത്തിക മേഖലയിലെ വളർച്ച അതിവേ​ഗമാണ്. ആ വളർച്ചയുടെ ഭാ​ഗമായിട്ടാണ് യു.പി.ഐ (യൂണിഫൈഡ് പേയ്മെന്റ് ഇന്റർഫേസ്) ഉപയോ​ഗം ഇത്രയും വ്യാപകമായത്. യു.പി.ഐ പേയ്മെന്റ് സിസ്റ്റത്തിലൂടെ എല്ലാ തരം സേവനങ്ങളും അനുവദിക്കുന്നു. നേരത്തെ ഡെബിറ്റ് കാർഡുകൾ ഉപയോ​ഗിച്ച് എ.ടി.എം വഴിയാണ് പണം എടുത്തിരുന്നതെങ്കിൽ ഇപ്പോൾ യു.പി.ഐ വഴിയാണ്.

യു.പി.ഐ വഴി ഒരു അക്കൗണ്ടിൽ നിന്ന് മറ്റൊരു അക്കൗണ്ടിലേക്ക് പണം അയക്കുന്ന പോലെ എ.ടി.എം സൗകര്യം ഉപയോ​ഗിച്ച് യു.പി.ഐ വഴി പണം എടുക്കാൻ സാധിക്കും. ഈ രീതിക്ക് ഡെബിറ്റ് കാർഡിന്റെ ആവശ്യകതയില്ല. അത്യാവശ്യ ഘട്ടങ്ങളിലെല്ലാം ഈ സേവനം വലിയ ആശ്വാസം നൽകും. എല്ലാ ആവശ്യങ്ങൾക്കും ഡെബിറ്റ് കാർഡിനെ ആശ്രയിച്ചിരുന്നവർ ഇപ്പോൾ യു.പി.ഐ മാർ​ഗത്തിലൂടെ ഇടപാടുകൾ നടത്തുമ്പോൾ ഡെബിറ്റ് കാർഡുകൾ ഒരു ഭീഷണിയായി മാറുമോ?

എ.ടി.എം വഴി പണം പിൻവലിക്കൽ, കുടുംബാംഗങ്ങൾക്കും സുഹൃത്തുക്കൾക്കുമുള്ള ഡെലിഗേറ്റഡ് പേയ്‌മെൻ്റുകൾ തുടങ്ങിയ പുതിയ ഫീച്ചറുകൾ യു.പി.ഐ അവതരിപ്പിച്ചപ്പോൾ ഡെബിറ്റ് കാർഡ് വിപണിയുടെ വലിയൊരു ഭാഗം പിടിച്ചെടുക്കാൻ യു.പി.ഐയെ കൂടുതൽ സഹായിക്കുമെന്ന് കരുതുന്നു. യു.പി.ഐ സർക്കിൾ, യു.പി.ഐ എ.ടി.എം എന്നീ ഫീച്ചറുകൾ വന്നതോടെ ഇന്ത്യയുടെ ഡിജിറ്റൽ പേയ്മെന്റുകളിൽ ഒരു പ്രധാന മാറ്റം അടയാളപ്പെടുത്തുന്നു.

ഡെബിറ്റ് കാർഡുകൾ അപ്രത്യക്ഷമാകുമോ?

ഡെബിറ്റ് കാർഡുകൾ പൂർണ്ണമായും അപ്രത്യക്ഷമാകില്ല. വലിയ ഇടപാടുകൾ, ഓഫ്‌ലൈൻ പേയ്‌മെൻ്റുകൾ, അന്താരാഷ്‌ട്ര ഉപയോഗം എന്നിവയ്‌ക്ക് ഡെബിറ്റ് കാർഡുകൾക്ക് ഒരു പ്രധാന പങ്കുണ്ട്. അതായത് വലിയ തുക യു.പി.ഐ വഴി പിൻവലിക്കാൻ സാധിക്കില്ല. യു.പി.ഐ എ.ടി.എം വഴി ഒരു ദിവസം 10,000 രൂപ മാത്രമാണ് പണം പിൻവലിക്കാൻ സാധിക്കുന്നത്. എന്നാൽ 50,000 രൂപ വരെ ഡെബിറ്റ് കാർഡ് വഴി പിൻവലിക്കാൻ സാധിക്കും.

പരമ്പരാ​ഗത രീതിയിൽ മാറുന്നു....

യു.പി.ഐ എ.ടി.എം പിൻവലിക്കലുകളും സർക്കിളുകളും പോലുള്ള യു.പി.ഐ ഫീച്ചറുകൾ അവതരിപ്പിച്ചത് പരമ്പരാഗത ബാങ്കിംഗ് രീതിയെ വല്ലാതെ ബാധിക്കുന്നുണ്ട്. ഏറെ എളുപ്പത്തിൽ പണം പിൻവലിക്കാനും ഇടപാടുകൾ നടത്താനും സാധിക്കുന്നവിധം സേവനങ്ങൾ നൽകുന്നതിനാൽ ഡെബിറ്റ് കാർഡുകൾക്ക് യു.പി.ഐ വലിയൊരു തിരിച്ചടി നൽകിയതു പോലെയായി. ഡെബിറ്റ് കാർഡ് ഉപയോ​ഗിക്കുന്നതിലും എളുപ്പത്തിൽ ഇടപാടുകൾ അവസാനിപ്പിക്കാൻ സാധിക്കും.

യു.പി.ഐ സർക്കിൾ പോലുള്ള പുതിയ യു.പി.ഐ ഫീച്ചറുകൾ ഒരു അക്കൗണ്ട് വഴി കുടുംബത്തിലെ അം​ഗങ്ങൾക്കെല്ലാം ഇടപാട് നടത്താൻ അവസരം ഒരുക്കുന്നു. അതായത്, തങ്ങളുടെ യു.പി.ഐ-ലിങ്ക്ഡ് അക്കൗണ്ടുകളിൽ നിന്ന് നേരിട്ട് ഇടപാടുകൾ നടത്തുന്നതിന്, കുട്ടികളോ പ്രായമായ മാതാപിതാക്കളോ പോലുള്ള കുടുംബാംഗങ്ങൾക്ക് അവസരമുണ്ട്. ഈ ഫീച്ചർ ബാങ്കുകളുടെ ആഡ്-ഓൺ ഡെബിറ്റ് കാർഡുകൾക്ക് നേരിട്ടുള്ള വെല്ലുവിളി ഉയർത്തുന്നു. ഇത് സാധാരണയായി കുടുംബാംഗങ്ങൾക്ക് പ്രാഥമിക അക്കൗണ്ട് ആക്‌സസ് ചെയ്യുന്നതിനായി നൽകും.

ആഡ്-ഓൺ കാർഡ്

ഒരു ആഡ്-ഓൺ കാർഡ് എന്നത് പ്രാഥമിക അക്കൗണ്ട് ഉടമയുടെ അക്കൗണ്ടുമായി ലിങ്ക് ചെയ്‌തിരിക്കുന്ന ഒരു സപ്ലിമെൻ്ററി ഡെബിറ്റ് കാർഡാണ്. ഇത് സാധാരണയായി കുടുംബത്തിലെ എല്ലാ അം​ഗങ്ങൾക്കും ഒരു പോലെ ഉപയോ​ഗിക്കാം. ഈ മാർ​ഗത്തിലൂടെ ഒരു പ്രധാന അക്കൗണ്ട് ഉണ്ടെങ്കിൽ മറ്റെല്ലാവർക്കും അതിന്റെ ആക്സസ് ലഭിക്കുന്നു.