ചൈനയ്ക്ക് മുന്നിൽ മുട്ട് മടക്കി അമേരിക്ക, അധിക താരിഫുകളില്ല, ട്രംപിന്‍റെ ഏഷ്യൻ പര്യടനം തുടങ്ങി

അമേരിക്കയും ചൈനയും തമ്മിലുള്ള വ്യാപാര യുദ്ധം അവസാനിക്കുകയാണ്. പ്രസിഡന്‍റ് ഡൊണാൾഡ് ട്രംപും ചൈനീസ് പ്രസിഡന്റ് ഷി ജിൻപിങ്ങും തമ്മിലുള്ള നിർണായക കൂടിക്കാഴ്ചയ്ക്ക് ദിവസങ്ങൾക്ക് മുമ്പ് തന്നെ തീരുവ ഭീഷണി ഒഴിഞ്ഞു. യുഎസ് ട്രഷറി സെക്രട്ടറി സ്കോട്ട് ബെസെന്റും യുഎസ് വ്യാപാര പ്രതിനിധി ജാമിസൺ ഗ്രീറും നയിക്കുന്ന യുഎസ് പ്രതിനിധി സംഘവും ചൈനീസ് വൈസ് പ്രീമിയർ ഹെ ലൈഫെങ്ങും തമ്മിൽ രണ്ട് ദിവസം നീണ്ടുനിന്ന തീവ്രമായ ചർച്ചകൾക്ക് ശേഷമാണ് ഈ വഴിത്തിരിവ് ഉണ്ടായത്. ക്വാലാലംപൂരിൽ നടക്കുന്ന ആസിയാൻ ഉച്ചകോടിക്കിടെയാണ് ചർച്ചകൾ നടന്നതെന്ന് ചൈനയുടെ ഔദ്യോഗിക വാർത്താ ഏജൻസിയായ സിൻഹുവ റിപ്പോർട്ട് ചെയ്തു.

ചർച്ചകളെ വ്യക്തവും, ആഴത്തിലുള്ളതും എന്നാണ് ലൈഫെങ് വിശേഷിപ്പിച്ചു. താരിഫ്, കയറ്റുമതി നിയന്ത്രണങ്ങൾ, കാർഷിക വ്യാപാരം എന്നിവയുൾപ്പെടെ നിരവധി നിർണായക വിഷയങ്ങൾ ഇരുപക്ഷവും അവലോകനം ചെയ്തതായി അദ്ദേഹം കൂട്ടിച്ചേർത്തു. ബീജിംഗും വാഷിംഗ്ടണും തമ്മിലുള്ള സാമ്പത്തിക ബന്ധത്തിന്റെ അടിത്തറ പരസ്പര നേട്ടത്തിലാണ്. "ഇരു രാജ്യങ്ങളും സഹകരണത്തിൽ നിന്ന് നേട്ടമുണ്ടാക്കുകയും ഏറ്റുമുട്ടലിൽ നിന്ന് നഷ്ടമുണ്ടാക്കുകയും ചെയ്യുന്നു" എന്ന് അദ്ദേഹം ചൂണ്ടിക്കാട്ടി.

ക്വാലാലംപൂരിൽ നടക്കുന്ന ആസിയാൻ ഉച്ചകോടിക്കിടെ നടന്ന ചർച്ചകൾ നവംബർ 1 മുതൽ ചൈനീസ് ഇറക്കുമതിക്ക് 100 ശതമാനം തീരുവ ഏർപ്പെടുത്താൻ പ്രസിഡന്റ് ഡൊണാൾഡ് ട്രംപ് തീരുമാനിച്ചതിന്റെ ഭീഷണി ഇല്ലാതാക്കിയതായി യുഎസ് ട്രഷറി സെക്രട്ടറി സ്കോട്ട് ബെസെന്റ് പറഞ്ഞു. ഈ മാസം ആദ്യം രൂക്ഷമായ വ്യാപാര സംഘർഷം ലഘൂകരിക്കുന്നതിലാണ് ഇരു രാജ്യങ്ങളും ഇപ്പോൾ ശ്രദ്ധ കേന്ദ്രീകരിച്ചിരിക്കുന്നതെന്ന് സിഎൻഎൻ റിപ്പോർട്ട് ചെയ്തു.

നിലപാട് മാറ്റിയ ട്രംപ്

ഏപ്രിലില്‍ ചൈനയെ അമേരിക്കയ്ക്കുള്ള ഏറ്റവും വലിയ ഭീഷണി എന്നാണ് ട്രംപ് വിശേഷിപ്പിച്ചത്. പതിറ്റാണ്ടുകളായി അവര്‍ അമേരിക്കയെ വഞ്ചിച്ചുകൊണ്ടിരിക്കുന്നുവെന്നും കുറ്റപ്പടുത്തി. തുടര്‍ന്നാണ് അദ്ദേഹം ചൈനീസ് ഉല്‍പ്പന്നങ്ങള്‍ക്ക് 145 ശതമാനം തീരുവ ചുമത്തിയത്. എന്നാല്‍, മാസങ്ങള്‍ക്ക് ശേഷം പറഞ്ഞതെല്ലാം ട്രംപ് അപ്പാടെ വിഴുങ്ങി. ചൈനയ്ക്കെതിരേ താരിഫ് ഉയര്‍ത്തുന്നത് താല്‍ക്കാലികമായി നിര്‍ത്തിവച്ചു. ചൈനയ്ക്കുള്ള താരിഫ് നിരക്ക് 30 ശതമാനമായി പരിമിതപ്പെടുത്തി. മാത്രമല്ല, ചൈനീസ് പ്രസിഡന്റ് ഷി ജിന്‍പിങ്ങിനെ ശക്തനായ നേതാവ് എന്ന് പ്രശംസിച്ചു.

ട്രംപ് ഏഷ്യയിൽ

ആസിയാൻ ഉച്ചകോടിയിൽ പങ്കെടുക്കാൻ ട്രംപ് ഞായറാഴ്ച മലേഷ്യയിലെത്തി. ഒക്ടോബർ 30 ന് ദക്ഷിണ കൊറിയയിൽ പ്രസിഡന്റ് ഷി ജിൻപിങ്ങുമായുള്ള ഏറെ പ്രതീക്ഷയോടെയുള്ള കൂടിക്കാഴ്ചയോടെയാണ് യാത്ര അവസാനിക്കുന്നത്. ചർച്ചകൾക്ക് മുന്നോടിയായി മാധ്യമപ്രവർത്തകരോട് സംസാരിക്കവെ, നടന്നുകൊണ്ടിരിക്കുന്ന ചർച്ചകളെക്കുറിച്ച് ട്രംപ് ശുഭാപ്തിവിശ്വാസം പ്രകടിപ്പിച്ചു. "ചൈനയുമായി നമുക്ക് ഒരു കരാറിലെത്താൻ കഴിയുമെന്ന് ഞാൻ കരുതുന്നു," അദ്ദേഹം പറഞ്ഞു.

ജനുവരിയിൽ വീണ്ടും അധികാരമേറ്റതിനുശേഷം ട്രംപിന്റെ ഏറ്റവും ദൈർഘ്യമേറിയ വിദേശ യാത്രയാണിത്. എന്നാൽ, ഈ യാത്രയുടെ കാതൽ ചൈനീസ് പ്രസിഡന്റ് ഷി ജിൻപിങ്ങുമായുള്ള ഏറെ പ്രതീക്ഷയോടെ കാത്തിരിക്കുന്ന കൂടിക്കാഴ്ചയാണ്. യുക്രെയ്‌ൻ-റഷ്യ യുദ്ധവും ഇസ്രയേൽ-ഗാസ സംഘർഷവും ഉയർത്തുന്ന വെല്ലുവിളികൾക്കിടയിലും, ട്രംപ് തന്റെ രണ്ടാം ടേമിലെ കൈവരിച്ച വിദേശനയ നേട്ടം നിലനിർത്താൻ തീവ്രമായി ശ്രമിക്കുന്നു.