യുഎസ് ഫെഡ് മൂന്നാം വട്ടവും പലിശ നിരക്ക് കുറക്കുമോ? ഡിസംബറിലെ പണനയ തീരുമാനം എപ്പോൾ, എവിടെ കാണാം?

ഒടുവിൽ ആ പ്രഖ്യാപനം ഉടൻ എത്തും. ലോകം മുഴുവൻ ഉറ്റു നോക്കുന്നത് യുഎസ് കേന്ദ്ര ബാങ്കായ ഫെഡറൽ റിസർവ്വിൻ്റെ പണനയ പ്രഖ്യാപനത്തെ കുറിച്ചാണ്. രണ്ട് ദിവസത്തെ പണനയ യോ​ഗം ഇന്ന് രാത്രിയോടെ അവസാനിക്കും. ഇന്നലെ ഡിസംബർ 9ന് ആരംഭിച്ച ഫെഡ് മീറ്റിം​​ഗിനെ അന്തിമ പ്രഖ്യാപനം ഇന്ന് ഡിസംബർ 10 ബുധനാഴ്ച EDT ഉച്ചയ്ക്ക് 2 മണിക്ക്, അതായത് വ്യാഴാഴ്ച ഇന്ത്യൻ സമയം പുലർച്ചെ 12:30 ന് പ്രഖ്യാപിക്കും.

ഇത്തവണയും അടിസ്ഥാന പലിശ നിരക്ക് ഫെഡ് കുറക്കുമെന്നാണ് സാമ്പത്തിക വിദ​ഗ്ദർ അഭിപ്രായപ്പെട്ടത്. അങ്ങനെ സംഭവിച്ചാൽ തുടർച്ചയായ മൂന്നാം തവണയായിരുന്നു യുഎസ് ഫെഡ് പലിശ കുറക്കുന്നത്. യുഎസ് പലിശനിരക്കുകളിലെ ചലനങ്ങൾ ആഗോള സമ്പദ്‌വ്യവസ്ഥകളിലുടനീളമുള്ള സാമ്പത്തിക വിപണികളെയും സാമ്പത്തിക സാഹചര്യങ്ങളെയും സ്വാധീനിക്കുന്നതിനാൽ ആഗോള നിക്ഷേപകർ വരാനിരിക്കുന്ന തീരുമാനത്തെയും കൂടുതൽ സൂക്ഷ്മമായി നിരീക്ഷിക്കുന്നു. ഇത്തവണയും 0.25% പലിശ നിരക്ക് കുറയുമെന്നാണ് എല്ലാവരുടെയും പ്രതീക്ഷ.

ഒക്ടോബറിലെ പ്രഖ്യാപനം

2025 ഒക്ടോബർ 29-ന് നടന്ന പണനയ യോഗത്തിൽ ഫെഡ് അടിസ്ഥാന പലിശ നിരക്ക് 25 ബേസിസ് പോയിന്റുകൾ കുറച്ചു. ഇതോടെ പലിശ നിരക്ക് 3.75%-4.00% ആയി കുറച്ചു. ഇതിനു മുന്നേ 2025 സെപ്റ്റംബറിൽ നടന്ന യോ​ഗത്തിലും പലിശ നിരക്ക് 25 ബേസിസ് പോയിൻ്റ് കുറച്ചിരുന്നു. 2024 ഡിസംബറിനു ശേഷം 2025 സെപ്റ്റംബറിലാണ് ഫെഡ് റിസർവ് പലിശ കുറച്ചത്.

ഡിസംബറിലെ വിപണി പ്രതീക്ഷകൾ

പ്രതീക്ഷകൾക്കൊത്ത് ഡിസംബറിൽ വീണ്ടും നിരക്ക് കുറച്ചാൽ അത് 3.50%-3.75% ആയി കുറയ്ക്കാനുള്ള സാധ്യത കൂടുതലാണ്. അതായത് ഇത്തവണയും 25 ബേസിസ് പോയിൻ്റ് കുറയുമെന്ന് അർത്ഥം. പക്ഷേ മറുവശത്ത് ചില സാമ്പത്തിക വിദ​ഗ്ദർ പറയുന്നത് ഫെഡ് 3.75%-4.00% എന്ന നിരക്കിൽ പലിശ നിലനിർത്തുമെന്നാണ്.

പലിശ കുറയാനുള്ള കാരണങ്ങൾ

പണപ്പെരുപ്പം ഒരു പ്രശ്നമായി നിലനിൽക്കുമ്പോഴും ഇത്തവണ നിരക്കുകൾ കുറയ്ക്കുന്നതിൻ്റെ പ്രധാന കാരണമായി കണക്കാക്കുന്നത് തൊഴിൽ വിപണിയിലെ ബലഹീനതയാണ്. ഈ വർഷം 3 തവണ തുടർച്ചയായി പലിശ കുറച്ചെങ്കിലും 2026ൽ 2 തവണ മാത്രമേ കുറക്കുകയുള്ളൂ എന്നാണ് സിഎംഇ ഡാറ്റ സൂചിപ്പിക്കുന്നത്.

ജെറോം പവലിന്റെ പത്രസമ്മേളനം

ഡിസംബർ 10ന് EDT ഉച്ചയ്ക്ക് 2:30 ന് നടക്കാനിരിക്കുന്ന പത്രസമ്മേളനത്തിൽ യുഎസ് ഫെഡറൽ റിസർവ് ചെയർമാൻ ജെറോം പവൽ മാധ്യമങ്ങളെ അഭിസംബോധന ചെയ്യും. പവലിൻ്റെ പ്രഖ്യാപനങ്ങൾ ഇന്ത്യയിൽ ഡിസംബർ 11, വ്യാഴാഴ്ച പുലർച്ചെ 1:00 മണിക്കായിരിക്കും ലഭ്യമാകുന്നത്. യുഎസ് സമ്പദ്‌വ്യവസ്ഥയെക്കുറിച്ചും, മീറ്റിം​ഗിലെ തീരുമാനങ്ങളെ കുറിച്ചും, ഭാവി നേട്ടങ്ങളെ കുറിച്ചുമെല്ലാം ഈ പത്രസമ്മേളനത്തിൽ പവൽ വ്യക്തമാക്കും. ഫെഡറൽ റിസർവിന്റെ ഔദ്യോഗിക വെബ്‌സൈറ്റിലൂടെയും ഔദ്യോഗിക യൂട്യൂബ് ചാനലിലൂടെയും പവലിന്റെ പത്രസമ്മേളനം തത്സമയം കാണാം.