പുതിയ ഫെഡറൽ റിസർവ് ചെയർമാൻ ഉടൻ, പ്രഖ്യാപനം നടത്തി ഡൊണാൾഡ് ട്രംപ്, നീക്കത്തിന് പിന്നിൽ എന്ത്..?

ഫെഡറൽ റിസർവ് ചെയർമാനായ ജെറോം പവലിന് പകരക്കാരനെ ഉടൻ പ്രഖ്യാപിക്കുമെന്നാണ് യുഎസ് പ്രസിഡന്‍റ് ഡൊണാൾഡ് ട്രംപ് ഇന്നലെ പറഞ്ഞത്. തുടർച്ചയായി മൂന്ന് തവണ പലിശ നിരക്കുകൾ കുറച്ചതിന് ശേഷം കഴിഞ്ഞ മീറ്റിംഗിൽ പലിശ നിരക്കുകൾ സ്ഥിരമായി നിലനിർത്താൻ ഫെഡ് തീരുമാനിച്ചിരുന്നു. ആ പ്രഖ്യാപനം വന്ന് ഒരു ദിവസത്തിന് ശേഷമാണ് ട്രംപിന്‍റെ പ്രസ്താവന വന്നത് എന്നത് ശ്രദ്ധേയമാണ് . നിരക്കുകൾ ഉയർത്താൻ ട്രംപ് പലതവണ കേന്ദ്ര ബാങ്കിൽ സമ്മർദ്ദം ചെലുത്തിയിരുന്നു.

ആരായിരിക്കും പുതിയ ചെയർമാൻ..?

പവലിന്‍റെ പിൻഗാമിയായി യുഎസ് സെൻട്രൽ ബാങ്കിന്‍റെ തലവനാകാൻ നിരവധി പേരുകൾ പരിഗണനയിലുണ്ടെന്നാണ് അമേരിക്കൻ മാധ്യമങ്ങൾ റിപ്പോർട്ട് ചെയ്യുന്നത്. വൈറ്റ് ഹൗസ് നാഷണൽ ഇക്കണോമിക് ഡയറക്ടർ കെവിൻ ഹാസെറ്റ്, മുൻ ഫെഡ് ഗവർണർ കെവിൻ വാർഷ്, നിലവിലെ ഫെഡ് ഗവർണർ ക്രിസ്റ്റഫർ വാലർ, ബ്ലാക്ക് റോക്ക് എക്സിക്യൂട്ടീവ് റിക്ക് റീഡർ എന്നിവരാണ് സാധ്യതാ പട്ടികയിലുള്ളത്. ട്രംപിന്‍റെ നോമിനിയെ സെനറ്റിന്‍റെ അംഗീകാരത്തിനായി അയക്കുകയാണ് ചെയ്യുക. ഫെഡ് ചെയർമാനായി ട്രംപ് വാർഷിനെയോ ഹാസെറ്റിനെയോ തിരഞ്ഞെടുക്കാൻ സാധ്യതയുണ്ടെന്നാണ് ദി വാൾ സ്ട്രീറ്റ് ജേണൽ റിപ്പോർട്ട് ചെയ്തുന്നത്.

ആരാണ് കെവിൻ ഹാസെറ്റ്..?

സാമ്പത്തിക ശാസ്ത്രത്തിൽ പിഎച്ച്ഡി നേടിയ ഹാസെറ്റ് ട്രംപുമായി ദീർഘകാല ബന്ധം പുലർത്തുന്ന ആളാണ്. 2017 മുതൽ 2019 വരെ ട്രംപിന്‍റെ മുതിർന്ന സാമ്പത്തിക ഉപദേഷ്ടാവായിരുന്നു ഹാസെറ്റ്. 2025 ജനുവരിയിൽ അദ്ദേഹം ദേശീയ സാമ്പത്തിക കൗൺസിലിന്‍റെ തലവനായി നിയമിതനായി.

കെവിൻ വാർഷ്, മുൻ ഫെഡ് ഉദ്യോഗസ്ഥൻ: വാർഷ് 2006 മുതൽ 2011 വരെ ഫെഡറൽ റിസർവ് ഗവർണറായി സേവനമനുഷ്ഠിച്ചു. ബിബിസിയുടെ കണക്കനുസരിച്ച് , അദ്ദേഹം ഫെഡറലിന്റെ തുറന്ന വിമർശകനായിരുന്നു. സാമ്പത്തിക ഡാറ്റയെ അമിതമായി ആശ്രയിക്കുന്നതിനെയും ബാലൻസ് ഷീറ്റിലെ ആസ്തികൾ ഉപയോഗിക്കുന്നതിനെയും വെല്ലുവിളിച്ചു. അധികാരത്തിലിരിക്കുമ്പോൾ ഉയർന്ന നിരക്കുകളെ അനുകൂലിക്കുന്ന "പരുക്കൻ" നിലപാടിന് പേരുകേട്ടയാളാണെങ്കിലും, ഇപ്പോൾ അദ്ദേഹത്തെ സമീപകാലത്ത് കുറഞ്ഞ നിരക്കുകളെ കൂടുതൽ പിന്തുണയ്ക്കുന്നയാളായി കാണുന്നു.

ക്രിസ്റ്റഫർ വാലർ, ഫെഡ് ഗവർണർ: 2020 ൽ ട്രംപ് നാമനിർദ്ദേശം ചെയ്ത നിലവിലെ ഫെഡ് ഉദ്യോഗസ്ഥനാണ് വാലർ. ട്രംപിന്റെ മുൻഗണനകളുമായി യോജിപ്പിച്ച് ഫെഡറൽ റിസർവിന് പലിശനിരക്ക് കൂടുതൽ കുറയ്ക്കാൻ അവസരമുണ്ടെന്ന് അദ്ദേഹം അടുത്തിടെ പറഞ്ഞിരുന്നു. എന്നാൽ വാലറിന് ട്രംപുമായി വ്യക്തിപരമായി വലിയ അടുപ്പമില്ലെന്നാണ് ബിബിസി റിപ്പോർട്ട് പറയുന്നത്.

റിക്ക് റൈഡർ, ബ്ലാക്ക് റോക്ക് എക്സിക്യൂട്ടീവ്: വാൾ സ്ട്രീറ്റിലെ ഒരു നീണ്ട കരിയറിനൊപ്പം, ഫെഡറൽ റിസർവ് പരിഷ്കരണത്തിനുള്ള തന്റെ നിർദ്ദേശങ്ങളിലൂടെ റൈഡർ ട്രംപിന്റെ ശ്രദ്ധ ആകർഷിച്ചുവെന്ന് ബ്ലൂംബെർഗ് പറയുന്നു. അദ്ദേഹം ഒരിക്കലും ഫെഡിൽ ജോലി ചെയ്തിട്ടില്ല.

പലിശയിൽ മാറ്റമില്ല

വായ്പ പലിശനിരക്കുകളിൽ മാറ്റം വരുത്താതെ ഫെഡറൽ റിസർവ്. പലിശനിരക്ക് 3.5 ശതമാനത്തിൽ 3.75 ശതമാനത്തിനും ഇടയിൽ തുടരുമെന്നാണ് ഫെഡറൽ റിസർവ് യോഗത്തിന് ശേഷം ചെയർമാൻ ജെറോം പവൽ അറിയിച്ചു. വരുന്ന വായ്പ അവലോകന യോഗങ്ങളിലും പലിശനിരക്കുകളിൽ മാറ്റമുണ്ടാവില്ലെന്ന സൂചനയും യു.എസ് കേന്ദ്രബാങ്കായ ഫെഡറൽ റിസർവ് നൽകിയിട്ടുണ്ട്. അതേസമയം, വായ്പ അവലോകന യോഗത്തിന് ശേഷം നടത്തിയ വാർത്താസമ്മേളനത്തിൽ വൈറ്റ് ഹൗസുമായി ബന്ധപ്പെട്ട് ഇക്കാര്യത്തിൽ നടക്കുന്ന ഏറ്റുമുട്ടലുകളെ കുറിച്ച് പ്രതികരിക്കാൻ അദ്ദേഹം തയാറായില്ല.