രാജ്യത്ത് 4 വന്ദേ ഭാരത് ട്രെയിനുകൾ കൂടി; യാത്രാ മേഖലയിലും ടൂറിസത്തിലും പുത്തൻ വിപ്ലവം സൃഷ്ടിക്കും

പ്രധാനമന്ത്രി നരേന്ദ്ര മോദി ശനിയാഴ്ച വാരണാസിയിൽ നിന്ന് നാല് പുതിയ വന്ദേ ഭാരത് ട്രെയിനുകൾ ഫ്ലാഗ് ഓഫ് ചെയ്തിട്ടുണ്ട്. ഇതോടെ രാജ്യത്തെ മൊത്തം വന്ദേ ഭാരത് എക്സ്പ്രസ് ട്രെയിനുകളുടെ എണ്ണം 164 ആയി. ഇന്ത്യൻ റെയിൽവേയുടെ വളർച്ച അവിസ്മരണീയമെന്ന് പറയാം. പലപ്പോഴും യാത്രാ സൗകര്യത്തിൻ്റെ പേരിലും യാത്രാ ദൈർഘ്യത്തിൻ്റെ പേരിലും ട്രെയിൻ സർവ്വീസ് തിരഞ്ഞെടുക്കാത്തവരെല്ലാം ഇപ്പോൾ ട്രെയിൻ യാത്ര ഇഷ്ടപ്പെടാൻ തുടങ്ങിയിരിക്കുന്നു. അതിനു പ്രധാന കാരണം വന്ദേഭാരത് തന്നെയാണ്.

164 വന്ദേ ഭാരത് എന്നത് ചെറിയ നേട്ടമല്ല. ഇന്നലെ ബനാറസ്-ഖജുരാഹോ വന്ദേ ഭാരത് എക്സ്പ്രസ്, ലഖ്‌നൗ-സഹരൻപൂർ വന്ദേ ഭാരത് എക്സ്പ്രസ്, ഫിറോസ്പൂർ-ഡൽഹി വന്ദേ ഭാരത് എക്സ്പ്രസ്, എറണാകുളം-കോയമ്പത്തൂർ-ബെംഗളൂരു വന്ദേ ഭാരത് എക്സ്പ്രസ് എന്നിവയാണ് ഫ്ലാ​ഗ് ഓഫ് ചെയ്തത്. രാജ്യത്തെ വിവിധ ന​ഗരങ്ങളെ ബന്ധിപ്പിക്കുന്ന തരത്തിലാണ് ഈ 4 ട്രെയിനുകളും അവതരിപ്പിച്ചിരിക്കുന്നത്.

യാത്രാ ദൈർഘ്യം കുറക്കുക എന്ന ലക്ഷ്യത്തോടെയാണ് വന്ദേ ഭാരത് ട്രെയിനുകളുടെ സേവനം വർദ്ധിപ്പിക്കുന്നത്. മാത്രമല്ല രാജ്യത്തെ വിവിധ സ്ഥലങ്ങളിലെ ടൂറിസം വർദ്ധിപ്പിക്കുവാനും ഇത്തരം എക്സ്പ്രസ് ട്രെയിനുകളിലൂടെ സാധിക്കും. ഈ 4 ട്രെയിനുകളെ കുറിച്ചും, അവ എത്ര ദീർഘ്യം കുറച്ച് യാത്ര നടത്തുന്നു എന്ന് പരിശോധിക്കാം;

ബനാറസ്-ഖജുരാഹോ വന്ദേ ഭാരത്

ഈ റൂട്ടിൽ വന്ദേ ഭാരത് എത്തുന്നതിലൂടെ യാത്ര ഏകദേശം 2 മണിക്കൂർ 40 മിനിറ്റ് ലാഭിക്കാം. വാരണാസി, പ്രയാഗ്‌രാജ്, ചിത്രകൂട്, ഖജുരാഹോ എന്നിവയുൾപ്പെടെ ഇന്ത്യയിലെ ടൂറിസം മേഖലകളിലെ പ്രധാന സ്ഥലങ്ങളെ ബന്ധിപ്പിക്കും. ഇത് ടൂറിസത്തെ ശക്തിപ്പെടുത്തുന്നു.

ലഖ്‌നൗ-സഹരൻപൂർ വന്ദേ ഭാരത്

ഈ റൂട്ടിൽ ഏകദേശം 7 മണിക്കൂർ 45 മിനിറ്റിനുള്ളിൽ യാത്ര പൂർത്തിയാക്കും. ഏകദേശം 1 മണിക്കൂർ യാത്രാ സമയം ലാഭിക്കും. ലഖ്‌നൗ, സീതാപൂർ, ഷാജഹാൻപൂർ, ബറേലി, മൊറാദാബാദ്, ബിജ്‌നോർ, സഹരൻപൂർ എന്നിവിടങ്ങളിൽ നിന്നുള്ള യാത്രക്കാർക്ക് കുറഞ്ഞ സമയത്തിനുള്ളിൽ യാത്ര പൂർത്തിയാക്കാം. മാത്രമല്ല ഹരിദ്വാറിലേക്കുള്ള യാത്രയും കൂടുതൽ എളുപ്പമാവും.

ഫിറോസ്പൂർ-ഡൽഹി വന്ദേ ഭാരത്

ഈ റൂട്ടിലെ ഏറ്റവും വേഗതയേറിയ ട്രെയിനായിരിക്കും ഇത്. വെറും 6 മണിക്കൂർ 40 മിനിറ്റിനുള്ളിൽ നിങ്ങൾക്ക് യാത്ര പൂർത്തിയാക്കാനാവും. ഡൽഹിയും, പഞ്ചാബിലെ പ്രധാന നഗരങ്ങളായ ഫിറോസ്പൂർ, ബതിന്ദ, പട്യാല എന്നിവയുമായിട്ടാണ് ഈ വന്ദേ ഭാരത് ബന്ധിപ്പിച്ചിരിക്കുന്നത്. ഇത് ദീർഘ ദൂര യാത്രികർക്ക് കൂടുതൽ പ്രയോജനം ലഭിക്കും.

എറണാകുളം-ബെംഗളൂരു വന്ദേ ഭാരത്

ഉത്തരേന്ത്യയിൽ മാത്രമല്ല, ദക്ഷിണേന്ത്യയിലും പുതിയ വന്ദേ ഭാരത് എത്തിയിട്ടുണ്ട്. ഇത് മൂന്ന് സംസ്ഥാനങ്ങളിലൂടെ കടന്ന് പോകുന്ന വന്ദേ ഭാരത് എക്സ്പ്രസാണ്. 8 മണിക്കൂർ 40 മിനിറ്റിനുള്ളിൽ ഈ യാത്ര പൂർത്തിയാക്കാം. അതായത് 2 മണിക്കൂറിലധികം സമയം ലാഭിക്കാം. കേരളം, തമിഴ്‌നാട്, കർണാടക എന്നീ സംസ്ഥാനങ്ങളിലൂടെ കടന്ന് പോകുന്ന ഈ ട്രെയിൻ പ്രൊഫഷണലുകൾ, വിദ്യാർത്ഥികൾ, വിനോദസഞ്ചാരികൾ എന്നിവർക്ക് വേഗതയേറിയതും കൂടുതൽ സുഖകരവുമായ യാത്രാ ഓപ്ഷൻ നൽകുന്നു. ഒപ്പം ടൂറിസത്തെ പ്രോത്സാഹിപ്പിക്കുകയും ചെയ്യുന്നു.