വന്ദേ ഭാരത് vs ശതാബ്ദി: മികച്ച യാത്രാനുഭവം നൽകുന്നത് ഏത് ട്രെയിൻ? നിങ്ങൾ അറിയേണ്ട സവിശേഷതകൾ ഇതാ

ഇന്ത്യൻ റെയിൽവേ നിരവധി തരത്തിലുള്ള ട്രെയിൻ സർവ്വീസുകൾ നടത്തുന്നുണ്ട്. സമീപകാലത്തായി വേ​ഗതയേറിയ പ്രീമിയം ട്രെയിനുകൾക്കും ഇന്ത്യൻ റെയിൽവേ പ്രാധാന്യം നൽകുന്നുണ്ട്. ഇതിൻ്റെ ഭാ​ഗമായിട്ടാണ് കൂടുതൽ വന്ദേ ഭാരത് ട്രെയിനുകൾ എത്തിയത്. വന്ദേ ഭാരതിനു മുന്നേ എത്തിയ ശതാബ്ദി എക്സ്പ്രസും വേ​ഗതയുടെ കാര്യത്തിൽ ഒട്ടും പുറകിലല്ല. എങ്കിലും ഈ രണ്ട് ട്രെയിൻ സർവ്വീസും തമ്മിൽ നിരവധി വ്യത്യാസങ്ങളുണ്ട്.

നിലവിലെ സാഹചര്യത്തിൽ ശതാബ്ദി എക്സ്പ്രസിനേക്കാൾ വന്ദേ ഭാരത് ജനപ്രിയമായി മാറി. എങ്കിലും സാധാരണക്കാർക്ക് പലപ്പോഴും താങ്ങാനാവുന്ന ടിക്കറ്റ് നിരക്ക് വാ​ഗ്ദാനം ചെയ്യുന്നത് ശതാബ്ദി തന്നെയാണ്. രണ്ട് എക്സ്പ്രസുകളുടെയും പ്രധാന സവിശേഷതകൾ അറിയാം;

വന്ദേ ഭാരത് എക്സ്പ്രസ്

മെയ്ക്ക് ഇൻ ഇന്ത്യ പ്രോഗ്രാമിന് കീഴിൽ 2019 ൽ ആരംഭിച്ച വന്ദേ ഭാരത് ആരെയും അതിശയിപ്പിക്കുന്ന തരത്തിൽ രൂപകൽപ്പന ചെയ്ത ഒരു പ്രീമിയം ട്രെയിനാണ്. കുറഞ്ഞ സമയത്തിനുള്ളിൽ യാത്ര പൂർത്തിയാക്കാൻ വന്ദേ ഭാരത് എക്സ്പ്രസുകളിലൂടെ സാധിക്കും. വിമാനത്തിലെന്ന പോലെയുള്ള ഇൻ്റീരിയർ ഡിസൈനും വിശാലമായ ഇരിപ്പടങ്ങളുമെല്ലാം വന്ദേ ഭാരതിൻ്റെ പ്രത്യേകതയാണ്.

ഓട്ടോമാറ്റിക് വാതിലുകൾ, ബയോ-വാക്വം ടോയ്‌ലറ്റുകൾ, യുഎസ്ബി ചാർജിംഗ് പോർട്ടുകൾ, വൈഫൈ, സിസിടിവി ക്യാമറകൾ, എക്സിക്യൂട്ടീവ് ക്ലാസിൽ കറങ്ങുന്ന ഇരിപ്പിടങ്ങളും എന്നിവയും വന്ദേ ഭാരതിൻ്റെ സവിശേഷതകളാണ്. ഒപ്പം ഭക്ഷണം ബുക്ക് ചെയ്യാനും സാധിക്കും.

മണിക്കൂറിൽ 160 കിലോമീറ്റർ വേഗതയിലാണ് ഈ പ്രീമിയം ട്രെയിൻ സഞ്ചരിക്കുന്നത്. വെറും 52 സെക്കൻഡിനുള്ളിൽ 100 കിലോമീറ്റർ വേഗത കൈവരിക്കുന്നു.

ശതാബ്ദി എക്സ്പ്രസ്

1988-ൽ അവതരിപ്പിച്ച ശതാബ്ദി ഇന്ത്യയിലുടനീളം സർവ്വീസ് നടത്തുന്നുണ്ട്. താരതമ്യേന വേ​ഗതയേറിയ ട്രെയിൻ തന്നെയാണ് ഇതും. ചാരിയിരിക്കുന്ന സീറ്റുകൾ, എസി കോച്ചുകൾ, വൃത്തിയുള്ള എൽഎച്ച്ബി കോച്ചുകൾ തുടങ്ങിയ സവിശേഷതകളെല്ലാം ശതാബ്ദി ട്രെയിനുകൾക്കും ഉണ്ട്. ചില ശതാബ്ദി ട്രെയിനുകൾ ഇപ്പോൾ വൈ-ഫൈയും നവീകരിച്ച ഇന്റീരിയറുകളും വാഗ്ദാനം ചെയ്യുന്നു. കേരളത്തിലെ ശതാബ്ദി സർവ്വീസുകൾ ഇത്തരം സേവനങ്ങൾ വാ​ഗ്ദാനം ചെയ്യുന്നില്ല.

ശതാബ്ദി എക്സ്പ്രസ് മണിക്കൂറിൽ 150 കിലോമീറ്റർ വേഗത്തിൽ സഞ്ചരിക്കും. എന്നാൽ പല കാരണങ്ങളാണ് സാധാരണയായി 130 കിലോമീറ്റർ വേഗതയിലാണ് ഓടുന്നത്. വന്ദേ ഭാരതുമായി താരതമ്യം ചെയ്യുമ്പോൾ ഇതിൻ്റെ വേ​ഗത കുറവാണ്.

സാങ്കേതികവിദ്യ

വന്ദേ ഭാരത് ഒരു ഇലക്ട്രിക് മൾട്ടിപ്പിൾ യൂണിറ്റ് (EMU) സിസ്റ്റത്തിലാണ് പ്രവർത്തിക്കുന്നത്. ഇവിടെ ഓരോ കോച്ചിലും അതിന്റേതായ മോട്ടോർ ഉണ്ട്. ഇത് ജെർക്ക് കുറയ്ക്കുകയും സുരക്ഷ വർദ്ധിപ്പിക്കുകയും ചെയ്യുന്നു. അതിനാലാണ് സമാധാനപരമായ യാത്ര ലഭ്യമാവുന്നത്.

ശതാബ്ദി എക്സ്പ്രസ് ലോക്കോമോട്ടീവ്-ഹോൾഡ് LHB കോച്ചുകളാണ് ഉപയോഗിക്കുന്നത്. ഇവ സുരക്ഷിതമാണെങ്കിലും EMU സാങ്കേതികവിദ്യ പോലെ കാര്യക്ഷമമല്ല.

നിങ്ങൾ ഏത് ട്രെയിൻ തിരഞ്ഞെടുക്കും?

വേഗതയും ആധുനിക സൗകര്യങ്ങളും ആഗ്രഹിക്കുന്ന യാത്രക്കാർക്ക് വന്ദേ ഭാരത് ഒരു മികച്ച തിരഞ്ഞെടുപ്പായിരിക്കും. ഒരു ദിവസത്തിനുള്ളിൽ യാത്ര പൂർത്തിയാക്കാൻ ആ​ഗ്രഹിക്കുന്നവർക്കും ഇതൊരു മികച്ച തിരഞ്ഞെടുപ്പായിരിക്കും.

എന്നാൽ കുറഞ്ഞ നിരക്കിൽ പകൽ യാത്ര ആ​ഗ്രഹിക്കുന്ന യാത്രക്കാർക്ക് ശതാബ്ദി എക്സ്പ്രസ് തിരഞ്ഞെടുക്കാം. ഇവയും വിശാലമായ ഇരിപ്പിടങ്ങൾ വാ​ഗ്ദാനം ചെയ്യുന്നു.

ഈ രണ്ട് ട്രെയിൻ സർവ്വീസുകളും മികച്ച യാത്രാ അനുഭവം വാ​ഗ്ദാനം ചെയ്യുന്നു. യാത്രക്കാരൻ്റെ താത്പര്യം അനുസരിച്ച് ട്രെയിൻ സർവ്വീസ് തിരഞ്ഞെടുക്കാം.