ഇന്ത്യന്‍ പൊതുമേഖല കമ്പനികള്‍ വിറ്റഴിക്കുന്നു; പണച്ചാക്കുമായി വേദാന്ത, ലക്ഷ്യം ഇങ്ങനെ

മുംബൈ: പ്രകൃതി വിഭവങ്ങളുടെ ഖനനത്തിലൂടെ കോടികളുടെ വ്യവസായ സാമ്രാജ്യം കെട്ടിപ്പടുത്ത വ്യക്തിയാണ് അനില്‍ അഗര്‍വാള്‍. വേദാന്ത റിസോഴ്‌സ് എന്ന കമ്പനിയുടെ ചെയര്‍മാനായ അദ്ദേഹം രാജ്യത്തെ എണ്ണം പറഞ്ഞ ധനികരില്‍ ഒരാളാണ്. പുതിയ ലക്ഷ്യത്തോടെയാണ് ഇപ്പോള്‍ വേദാന്തയുടെ നീക്കം. സാമ്പത്തിക പ്രതിസന്ധിയുടെ പേരില്‍ കേന്ദ്രസര്‍ക്കാര്‍ പൊതുമേഖലാ കമ്പനികളെ സ്വകാര്യവല്‍ക്കരണത്തിന് നടപടികള്‍ ആരംഭിച്ചു കഴിഞ്ഞു. ഇവ വാങ്ങിക്കൂട്ടാനാണ് വേദാന്തയുടെ നീക്കം. ഇതിനായി ലണ്ടന്‍ ആസ്ഥാനമായുള്ള സെട്രിക്കസ് അസറ്റ് മാനേജ്‌മെന്റ് എന്ന കമ്പനിയുമായി സഹകരിച്ച് പദ്ധതികള്‍ ആവിഷ്‌കരിക്കുകയാണ് വേദാന്ത.

75000 കോടി രൂപയുടെ ഫണ്ട് ഒരുക്കുകയാണ് അനില്‍ അഗര്‍വാള്‍. ഏറ്റെടുക്കുന്ന കമ്പനികള്‍ കുറഞ്ഞ വര്‍ഷത്തിനുള്ള ലാഭത്തിലെത്തിച്ച് മറിച്ച് വില്‍ക്കും. മുമ്പും സമാനമായ പദ്ധതി അദ്ദേഹം ഇന്ത്യയില്‍ വിജയകരമായി നടപ്പാക്കിയിരുന്നു. സര്‍ക്കാര്‍ ഉടമസ്ഥതയിലുള്ള കമ്പനികളെ ഏറ്റെടുത്ത് പ്രഫഷണല്‍ മാനേജ്‌മെന്റ് വിദഗ്ധരുടെ സഹായത്തോടെ ലാഭകരമാക്കുകയാണ് ചെയ്യുക. ഭാരത് പെട്രോളിയത്തിന്റെ ഓഹരി വില്‍ക്കാന്‍ കേന്ദ്രസര്‍ക്കാര്‍ തീരുമാനിച്ചിരുന്നു. ഇതിന്റെ ഓഹരി വാങ്ങുന്നതിന് താല്‍പ്പര്യം പ്രകടിപ്പിച്ച് എത്തിയ കമ്പനികളില്‍ വേദാന്തയുമുണ്ട്. സ്വകാര്യ നിക്ഷേപകരില്‍ നിന്ന് പണം സ്വീകരിച്ച ശേഷമാകും ഇന്ത്യന്‍ പൊതുമേഖലാ കമ്പനികള്‍ വാങ്ങുക. പണം മുടക്കുന്നവര്‍ക്ക് പത്ത് വര്‍ഷത്തിനകം ലാഭം തിരിച്ചുകൊടുക്കും.

പൊതുമേഖലാ കമ്പനികളുടെ ഓഹരികള്‍ വിറ്റഴിക്കുന്നതിലൂടെ രണ്ട് ലക്ഷം കോടി രൂപ സമാഹരിക്കാനാണ് കേന്ദ്രസര്‍ക്കാര്‍ പദ്ധതിയിട്ടിരിക്കുന്നത്. ഈ അവസരം മുതലെടുക്കാനാണ് വേദാന്തയുടെ നീക്കം. മുമ്പ് ഖനന മേഖലയിലെ ഇന്ത്യന്‍ കമ്പനികളെ ഏറ്റെടുത്തിരുന്നു വേദാന്ത. കമ്പനിയുടെ വളര്‍ച്ചയുടെ വഴിയും അതു തന്നെയായിരുന്നു. വേദാന്തയുടെ പല ഖനനങ്ങളും പിന്നീട് രാഷ്ട്രീയ വിവാദവുമായി.