സേവന മാനദണ്ഡങ്ങൾ ലംഘിച്ചു; വോഡഫോൺ ഐഡിയയുടെയും എയർടെല്ലിന്റെയും പ്രീമിയം പ്ലാനുകൾ ട്രായ് റദ്ദാക്കി

ടെലികോം റെഗുലേറ്ററി അതോറിറ്റി ഓഫ് ഇന്ത്യ (ട്രായ്) ഭാരതി എയർടെൽ ലിമിറ്റഡിന്റെ പ്ലാറ്റിനം, വോഡഫോൺ ഐഡിയ ലിമിറ്റഡിന്റെ റെഡ് എക്സ് പ്രീമിയം പ്ലാനുകൾ റദ്ദാക്കി. കൂടുതൽ പണമടയ്ക്കുന്ന പോസ്റ്റ്പെയ്ഡ് ഉപഭോക്താക്കൾക്ക് വേഗത്തിലുള്ള ഡാറ്റ വേഗതയും മുൻ‌ഗണനാ സേവനങ്ങളും വാഗ്ദാനം ചെയ്യുന്ന ഇത്തരം സ്കീമുകൾ മാനദണ്ഡങ്ങൾ ലംഘിക്കുന്നുവെന്നും ഈ പ്ലാനുകൾക്ക് പുറത്തുള്ളവരുടെ സേവനങ്ങളുടെ ഗുണനിലവാരത്തെ ബാധിക്കുമെന്നും വ്യക്തമാക്കിയാണ് പ്ലാനുകൾ റദ്ദാക്കിയത്.

ഈ പ്ലാനുകൾ സേവന മാനദണ്ഡങ്ങളുടെ ഗുണനിലവാരം ലംഘിക്കുന്നതാണെന്നും ഇത് നിലവിലുള്ള ഉപഭോക്താക്കളെ കുറയ്ക്കുമെന്നും കൂടാതെ അളവുകൾ കണക്കാക്കാൻ കഴിയാത്തതിനാൽ പുതിയ ഉപയോക്താക്കൾക്ക് എന്താണ് വാഗ്ദാനം ചെയ്യുന്നതെന്ന് വ്യക്തമല്ലെന്നും ഒരു ട്രായ് ഉദ്യോഗസ്ഥൻ ലൈവ് മിന്റിനോട് വ്യക്തമാക്കി. എന്നാൽ രണ്ട് ഓഫറുകളും നെറ്റ് ന്യൂട്രാലിറ്റിയുമായി ബന്ധപ്പെട്ട നിയമങ്ങളൊന്നും ലംഘിക്കുന്നില്ലെന്ന് ഒരു മുതിർന്ന ടെലികോം അനലിസ്റ്റ് പറഞ്ഞു.

സേവന മാനദണ്ഡങ്ങൾ ലംഘിച്ചു; വോഡഫോൺ ഐഡിയയുടെയും എയർടെല്ലിന്റെയും പ്രീമിയം പ്ലാനുകൾ ട്രായ് റദ്ദാക്കി

ഭാരതി എയർടെൽ ലിമിറ്റഡ് ജൂലൈ 6 നാണ് പ്ലാറ്റിനം ഉപഭോക്താക്കൾക്കായി 4 ജി ഡാറ്റാ വേഗത പ്രഖ്യാപിച്ചത്. 499 രൂപയോ അതിൽ കൂടുതലോ അടയ്ക്കുന്ന പോസ്റ്റ്പെയ്ഡ് ഉപയോക്താക്കൾക്കാണ് ഈ സേവനം ലഭിക്കുക. 'മുൻ‌ഗണന 4 ജി നെറ്റ്‌വർക്കിനായി' നൂതന സാങ്കേതികവിദ്യകൾ നൽകുന്നുണ്ടെന്ന് സുനിൽ മിത്തലിന്റെ നേതൃത്വത്തിലുള്ള ടെലികോം ഭീമനായ എയർടെൽ വ്യക്തമാക്കിയിരുന്നു. ഇത് പ്ലാറ്റിനം വരിക്കാർക്ക് നെറ്റ്‌വർക്കിൽ മുൻഗണന നൽകും.

പോസ്റ്റ്പെയ്ഡ് ഉപഭോക്താക്കൾക്കായി 999 രൂപ വിലയുള്ള റെഡ് എക്സ് പ്ലാൻ വോഡഫോൺ ഐഡിയ 2019 നവംബറിലാണ് അവതരിപ്പിച്ചത്. 50% വരെ വേഗതയും പ്രത്യേക സേവനങ്ങളുമാണ് പ്ലാൻ വാഗ്ദാനം ചെയ്യുന്നത്. പദ്ധതിയുടെ വില മെയ് മാസത്തിൽ 100 ​​രൂപ ഉയർത്തിയിരുന്നു.