വിമാന ടിക്കറ്റുകൾക്ക് വെറും 995 രൂപയുമായി വിസ്താരയുടെ ഓഫർ

ഫുൾ സർവീസ് പാസഞ്ചർ കാരിയറായ വിസ്താര എയർലൈൻസിന്റെ അഞ്ചാം വാർഷികത്തോട് അനുബന്ധിച്ചുള്ള ഓഫർ ടിക്കറ്റ് വിൽപ്പന ഇന്ന് ആരംഭിച്ചു. ഇതിന്റെ ഭാഗമായി വിമാന ടിക്കറ്റുകൾ വെറും 995 രൂപ മുതൽ കുറഞ്ഞ നിരക്കിൽ ലഭ്യമാണ്. 48 മണിക്കൂർ മാത്രമാണ് ഉപഭോക്താക്കൾക്ക് ഈ ഓഫർ ലഭിക്കുകയുള്ളൂ. ജനുവരി 10 രാത്രി 12 മണിക്ക് ഓഫർ വിൽപ്പന അവസാനിക്കും.

ആഭ്യന്തര, അന്തർദേശീയ ശൃംഖലയിലുടനീളമുള്ള മൂന്ന് ക്ലാസുകളിലെയും യാത്രകൾക്ക് ഓഫർ വിൽപ്പന നിരക്കുകൾ ബാധകമാണെന്ന് വിസ്താര അറിയിച്ചു. വിസ്താരയുടെ ആഭ്യന്തര വിമാന സർവീസ് നിരക്കുകൾ ആരംഭിക്കുന്നത് ഇക്കോണമി ക്ലാസിന് 995 രൂപയും പ്രീമിയം ഇക്കോണമിക്ക് 1,995 രൂപയും ബിസിനസ് ക്ലാസിന് 5,555 രൂപയുമാണ്. അന്തർ‌ദ്ദേശീയ ലക്ഷ്യസ്ഥാനങ്ങളിലേക്കുള്ള നിരക്ക് ആരംഭിക്കുന്നത് ഇക്കോണമി ക്ലാസിന്, 14,555 രൂപ, പ്രീമിയം ഇക്കോണമിക്ക്, 19,995 രൂപ, ബിസിനസ് ക്ലാസിന്, 35,555 രൂപ എന്നിങ്ങനെയാണ്. എല്ലാ നികുതികളും ഉൾപ്പെടെയുള്ള നിരക്കാണിത്.

വിമാന ടിക്കറ്റുകൾക്ക് വെറും 995 രൂപയുമായി വിസ്താരയുടെ ഓഫർ

2020 ജനുവരി 25 നും സെപ്റ്റംബർ 30 നും ഇടയിലുള്ള യാത്രയ്ക്കുള്ള ടിക്കറ്റുകളാണ് ഈ ഓഫറിൽ ലഭിക്കുന്നത്. ഓഫർ അനുസരിച്ചുള്ള മുംബൈ-ഡൽഹി വിമാന ടിക്കറ്റിന്റെ നിരക്ക് 2,955 രൂപയാണ്. മുംബൈ-ഗോവ ടിക്കറ്റ് നിരക്ക് 1,995 രൂപയും ഡൽഹി - ബെംഗളൂരു ടിക്കറ്റിന് 3,355 രൂപയും മുംബൈ-ബെംഗളൂരു ടിക്കറ്റിന് 2,055 രൂപയുമാണ് നിരക്ക്.

വിസ്താരയുടെ അന്താരാഷ്ട്ര റൂട്ടിൽ, ഡൽഹി - ബാങ്കോക്ക് ടിക്കറ്റിന് 14,995 രൂപയും ഡൽഹി - സിംഗപ്പൂർ ടിക്കറ്റ് നിരക്ക് 20,495 രൂപയും, മുംബൈ-കൊളംബോ നിരക്ക് 14,555 രൂപയും, മുംബൈ-ദുബായ് ടിക്കറ്റ് നിരക്ക് 18,555 രൂപയും മുംബൈ-സിംഗപ്പൂർ നിരക്ക് 21,995 രൂപയുമാണ്. ഓഫർ നിരക്കിലുള്ള സീറ്റുകളുടെ എണ്ണം പരിമിതമാണ്. ആദ്യം ബുക്ക് ചെയ്യുന്നവർക്ക് ആദ്യം എന്ന അടിസ്ഥാനത്തിലാണ് ടിക്കറ്റുകൾ ലഭിക്കുക.