ഇനി ഫ്ലൈറ്റിലും വൈഫൈ; പുതിയ സേവനവുമായി വിസ്താര

വിസ്താരയുടെ പുതിയ ബോയിങ് 787 ഡ്രീംലൈനർ വിമാനത്തിൽ വൈഫൈ, സ്ട്രീമിംഗ് സേവനങ്ങൾ അവതരിപ്പിക്കാൻ ഒരുങ്ങുന്നു. സിംഗപ്പൂർ എയർലൈൻസ് ലിമിറ്റഡിന്റെ ഇന്ത്യൻ അഫിലിയേറ്റായ വിസ്താര ഇതോടെ വൈ-ഫൈ, സ്ട്രീമിംഗ് സേവനങ്ങൾ ലഭ്യമാക്കുന്ന രാജ്യത്തെ ആദ്യത്തെ കാരിയറായി മാറും. പുതിയ സേവനം ലഭ്യമാക്കുന്നതോടെ യാത്രക്കാർക്ക് ഇന്ത്യയിലെ ഏറ്റവും ജനപ്രിയ കായിക വിനോദമായ ലൈവ്-സ്ട്രീം ക്രിക്കറ്റ് മത്സരങ്ങൾ കാണാനും, ഒപ്പം ഫേസ്‌ബുക്ക്, വാട്ട്‌സ്ആപ്പ് എന്നിവ ഉപയോഗിക്കാനുമാകും.

ആറ് ഡ്രീംലൈനർ വിമാനങ്ങൾക്കാണ് വിസ്താര ഓർഡർ നൽകിയിട്ടുള്ളത്. ഇതിൽ ആദ്യത്തേത് ഉടനെത്തും. ഇതിലാണ് പുതിയ സേവനങ്ങൾ നൽകിത്തുടങ്ങുക. സേവനത്തിനുള്ള നിരക്കുകൾ പിന്നീട് പ്രഖ്യാപിക്കുന്നതായിരിക്കും. ചീഫ് സ്ട്രാറ്റജി ഓഫീസർ വിനോദ് കണ്ണൻ വ്യക്തമാക്കി. പാനസോണിക് എവിയോണിക്സ് കോർപ്, നെൽകോ ലിമിറ്റഡ് എന്നിവയുമായി ചേർന്നാണ് കമ്പനി വൈഫൈ സേവനം നൽകുക. സിംഗപ്പൂർ എയർലൈൻസും ടാറ്റ ഗ്രൂപ്പും ചേർന്നുള്ള സംരംഭമായ വിസ്താര 2015-ലാണ് പ്രവർത്തനം തുടങ്ങിയത്.

ഇൻ-ഫ്ലൈറ്റ് വൈ-ഫൈ അനുവദിക്കുന്നതിള്ള പദ്ധതി ഇന്ത്യ മുൻപ് തന്നെ ആലോചിച്ചിരുന്നു, എന്നാൽ റെഡ് ടേപ്പും സുരക്ഷയെക്കുറിച്ചുള്ള ആശങ്കയും അംഗീകാര പ്രക്രിയയെ വൈകിപ്പിക്കുകയായിരുന്നു. ഇന്ത്യൻ ടെലിഗ്രാഫ് നിയമത്തിലെ വ്യവസ്ഥകളും അനുബന്ധ നിയമങ്ങളും ഭേദഗതി ചെയ്ത് ഇൻ-ഫ്ലൈറ്റ് കണക്റ്റിവിറ്റി വാഗ്ദാനം ചെയ്യുന്നതിനായി ഇന്ത്യയുടെ വ്യോമയാന മന്ത്രാലയം ടെലികമ്മ്യൂണിക്കേഷൻ വകുപ്പുമായി ചർച്ചകൾ നടത്തിയിരുന്നു.