ഉപഭോക്താക്കളുടെ എണ്ണത്തില്‍ കുതിച്ചുയര്‍ന്ന് ഫോണ്‍ പേ; 300 ദശലക്ഷം കടന്നെന്ന് കമ്പനി

മുംബൈ: 300 ദശലക്ഷം രജിസ്റ്റര്‍ ചെയ്ത ഉപയോക്താക്കളുടെ നാഴികക്കല്ല് പിന്നിട്ടതായി വാള്‍മാര്‍ട്ടിന്റെ ഉടമസ്ഥതയില്‍ പ്രവര്‍ത്തിക്കുന്ന ഡിജിറ്റല്‍ പേയ്മെന്റ് സ്ഥാപനമായ ഫോണ്‍പെ അറിയിച്ചു. പ്രതിമാസം സജീവമായ ഉപയോക്താക്കളുടെ എണ്ണം 125 ദശലക്ഷമായി ഉയര്‍ന്നിട്ടുണ്ടെന്നും ഈ വര്‍ഷം മേയ് മാസത്തില്‍ ആകെ 390 ബില്യണ്‍ ഡോളറിലധികം ഇടപാടുകള്‍ നടന്നെന്നും കമ്പനി പുറപ്പെടുവിച്ച പ്രസ്താവനയിലൂടെ അറിയിച്ചു.

ഫോണ്‍പേയുടെ വ്യാപാര ശൃംഖല ഇന്ത്യയിലുടനീളം അതിവേഗം വളരുന്നുണ്ട്. ഇപ്പോള്‍ ഇന്ത്യയിലെ 11,000 പട്ടണങ്ങളിലും താലൂക്കുകളിലുമായി 20 ദശലക്ഷത്തിലധികം ഓഫ്ലൈന്‍ വ്യാപാരികള്‍ ഫോണ്‍ പേ ഉപയോഗിക്കുന്നുണ്ടെന്ന് കമ്പനി വ്യക്തമാക്കുന്നു. രജിസ്റ്റര്‍ ചെയ്ത 300 ദശലക്ഷം ഉപയോക്താക്കളെന്ന നാഴികക്കല്ല് മറികടന്നതില്‍ ഞങ്ങള്‍ക്ക് സന്തോഷമുണ്ട്, ഒപ്പം നിരവധി ഇന്ത്യക്കാര്‍ നമ്മില്‍ തുടരുന്ന വിശ്വാസത്തിന് നന്ദിയുള്ളവരാണെന്നും കമ്പനി സിഇഒ സമീര്‍ നിഗം അറിയിച്ചു.

ഗൂഗിള്‍ പേ, ആമസോണ്‍ പേ, അലിബാബ പിന്തുണയുള്ള പേടിഎം തുടങ്ങിയ വമ്പന്‍ എതിരാളികളുമായാണ് ഫോണ്‍പേ മത്സരിക്കുന്നത്. 2020 നവംബറില്‍ ഇത് 250 ദശലക്ഷം രജിസ്റ്റര്‍ ചെയ്ത ഉപയോക്താക്കളുടെ എണ്ണം മറികടന്നിരുന്നു, കൂടാതെ 6 മാസത്തിനുള്ളില്‍ രജിസ്റ്റര്‍ ചെയ്ത 50 ദശലക്ഷം ഉപയോക്താക്കളെ കൂടി ചേര്‍ക്കാന്‍ ഫോണ്‍പേയ്ക്ക് സാധിച്ചിട്ടുണ്ട്. 2021 മാര്‍ച്ചില്‍, ഒരു മാസത്തിനുള്ളില്‍ ഒരു ബില്ല്യണ്‍ യുപിഐ ഇടപാടുകള്‍ പ്രോസസ്സ് ചെയ്യുന്ന ആദ്യത്തെ കമ്പനിയായി ഫോണ്‍പേ മാറിയിരുന്നു.