സിറ്റിയിൽ ജീവിക്കാനാണോ നിങ്ങൾക്ക് ഇഷ്ടം? ഇന്ത്യയിലെ ജീവിക്കാൻ ഏറ്റവും മികച്ച നഗരം ഏത്?

ലോകത്തിന്റെ മറ്റു രാജ്യങ്ങളിലെന്നപോലെ തന്നെ കഴിഞ്ഞ ഏതാനും പതിറ്റാണ്ടുകളായി ഇന്ത്യയിലെ സാമ്പത്തിക പ്രവർത്തനങ്ങളെയും വളർച്ചയെയും നയിക്കുന്ന പ്രധാന കേന്ദ്രങ്ങൾ നഗരങ്ങളാണ്. ഇന്ത്യയിലെ ഉപഭോക്തൃ വിപണികളുടെ പ്രധാന കേന്ദ്രങ്ങളാണ് ന​ഗരങ്ങൾ. ചെറിയ പട്ടണങ്ങളെയും ഗ്രാമങ്ങളെയും അപേക്ഷിച്ച് കൂടുതൽ തൊഴിലവസരങ്ങൾ ഉള്ളതും ന​ഗരങ്ങളിൽ തന്നെ. എന്നിരുന്നാലും, ഇന്ത്യയിലെ ഏറ്റവും വലിയ നഗരങ്ങൾ എല്ലാം തന്നെ ഇന്ന് ഒന്നിലധികം പ്രതിസന്ധികൾ നേരിടുന്നുണ്ട്. ഇവയെ മറികടന്ന് ജീവിക്കാൻ ഏറ്റവും മികച്ച ഇന്ത്യയിലെ ന​ഗരങ്ങൾ ഏതൊക്കെയാണെന്ന് പരിശോധിച്ചാം.

പ്രതിസന്ധികൾ

ഇന്ത്യയിലെ ന​ഗരങ്ങൾ നേരിടുന്ന പ്രധാന പ്രതിസന്ധികളിലൊന്ന് വായു മലിനീകരണമാണ്. ചില ന​ഗരങ്ങളിൽ പ്രതിസന്ധി സൃഷ്ടിക്കുന്നത് ​ഗതാ​ഗത പ്രശ്നങ്ങളാണ്. റിയൽ എസ്റ്റേറ്റ് മേഖലകളിലെ പ്രതിസന്ധികളും ചില ന​ഗരങ്ങളിൽ നിന്ന് വിട്ടു നിൽക്കാൻ ആളുകളെ പ്രേരിപ്പിക്കുന്നു. ഇന്ത്യയിലെ ഏറ്റവും വലിയ ആറ് നഗരങ്ങളായ ഡൽഹി, മുംബൈ, ചെന്നൈ, ഹൈദരാബാദ്, കൊൽക്കത്ത, ബെംഗളൂരു എന്നിവിടങ്ങളിലെ പ്രതിസന്ധികൾ എന്തൊക്കെയാണെന്നും ജീവിക്കാൻ ഏറ്റവും മികച്ച ന​ഗരം ഏതെന്നും കണ്ടെത്താം.

ഹൈദരാബാദ്, ബം​ഗളൂരു

ഉയർന്ന യാത്രാ വേഗത, കുറഞ്ഞ വാടക, എന്നിവയൊക്കെയാണ് ജീവിക്കാൻ ഏറ്റവും മികച്ച ന​ഗരങ്ങളുടെ പട്ടികയിൽ ഹൈദരാബാദിനെ ഒന്നാം സ്ഥാനത്ത് എത്തിച്ചത്. ഭക്ഷണശാല, പച്ചപ്പ്, ശുദ്ധവായു എന്നിവയാണ് ബംഗളൂരുവിന് രണ്ടാം സ്ഥാനം ലഭിക്കാൻ കാരണം. 

മറ്റ് ന​ഗരങ്ങൾ

ഡൽഹി, മുംബൈ, കൊൽക്കത്ത എന്നീ ന​ഗരങ്ങളും വ്യത്യസ്ത ഘടകങ്ങളിൽ മുൻനിരയിലുണ്ടെങ്കിൽ മൊത്തത്തിൽ പിൻതള്ളപ്പെട്ടു. അതായത് പൊതുഗതാഗതത്തിന്റെ കാര്യത്തിൽ ഡൽഹി വളരെ മികച്ച ന​ഗരമാണ്. ഹരിതാഭയുള്ള ന​ഗരങ്ങളാണ് ഡൽഹിയും കൊൽക്കത്തയും, കുറഞ്ഞ മലിനീകരണ തോതുള്ള ന​ഗരങ്ങളാണ് മുംബൈ, കൊൽക്കത്ത എന്നിവിടങ്ങൾ.

പിന്തള്ളപ്പെടാൻ കാരണം

കുറഞ്ഞ യാത്രാ വേഗത, ഉയർന്ന ജാതി വിഭാ​ഗീയത തുടങ്ങിയവയാണ് കൊൽക്കത്തയെ ജീവിക്കാൻ മികച്ച ന​ഗരങ്ങളുടെ പട്ടികയിൽ ഏറ്റവും പിന്നിലേയ്ക്ക് തള്ളിയത്. മലിനീകരണമാണ് ഡൽഹിയെ പിന്നിലാക്കിയത്. മുംബൈയെ സംബന്ധിച്ചിടത്തോളം ഉയർന്ന വാടക, കുറഞ്ഞ യാത്രാ വേഗത, കുറഞ്ഞ പച്ചപ്പ് എന്നിവയാണ് ദോഷകരമായി മാറിയത്.

malayalam.goodreturns.in