ഇന്ധന വില കുത്തനെ മുകളിലേക്ക്, രാജ്യത്ത് ഇന്ധന ഉപഭോഗം കുറഞ്ഞെന്ന് റിപ്പോർട്ട്

ദില്ലി: വില റോക്കറ്റ് പോലെ മുകളിലേക്ക് കുതിക്കുന്നതിനിടെ രാജ്യത്ത് ഇന്ധന ഉപയോഗം കുറഞ്ഞതായി റിപ്പോര്‍ട്ട്. ഫെബ്രുവരിയിലെ ഇന്ധന ഉപഭോഗം സംബന്ധിച്ചുളള റിപ്പോര്‍ട്ടിലാണ് ഈ കണ്ടെത്തല്‍. പെട്രോളിയം ആന്റ് നാച്യുറല്‍ ഗ്യാസ് മന്ത്രാലയത്തിന് കീഴിലുളള പെട്രോളിയം പ്ലാനിംഗ് ആന്‍ഡ് അനാലിസിസ് സെല്‍ തയ്യാറാക്കിയ റിപ്പോര്‍ട്ടിലാണ് രാജ്യത്ത് ഇന്ധന ഉപയോഗം കുറഞ്ഞതായി കണ്ടെത്തിയിരിക്കുന്നത്.

ഫെബ്രുവരി മാസത്തില്‍ രാജ്യത്ത് പെട്രോളിന്റെയും ഡീസലിന്റെയും വില കുത്തനെ ഉയര്‍ന്നിരുന്നു. പ്രതിദിനമെന്നോണം വില ഉയര്‍ത്തിയത് വലിയ പ്രതിഷേധങ്ങള്‍ക്കും ഇടയാക്കി. വില കൂടിയ മാസത്തിലെ ഇന്ധന ഉപഭോഗം 17. 21 ദശലക്ഷം ടണ്‍ ആണെന്നാണ് റിപ്പോര്‍ട്ടില്‍ പറയുന്നത്. ഫെബ്രുവരിയുമായി താരതമ്യം ചെയ്യുമ്പോള്‍ കഴിഞ്ഞ സെപ്റ്റംബറില്‍ മാത്രമാണ് ഇത്രയും കുറഞ്ഞ ഇന്ധന ഉപഭോഗം രാജ്യത്തുണ്ടായിരുന്നത്.

ഇന്ധന ഉപഭോഗത്തില്‍ 4.9 ശതമാനത്തിന്റെ ഇടിവാണ് ഉണ്ടായിരിക്കുന്നത് എന്നും റിപ്പോര്‍ട്ടില്‍ പറയുന്നു. പെട്രോളിന്റെയും ഡീസലിന്റെയും ഉപഭോഗത്തില്‍ ഉണ്ടായ ഇടിവ് സംബന്ധിച്ച് പ്രത്യേകമായും റിപ്പോര്‍ട്ടില്‍ പറയുന്നു. 2.4 ദശലക്ഷം ടണ്‍ പെട്രോള്‍ ആണ് ഫെബ്രുവരിയില്‍ രാജ്യത്ത് വില്‍പന നടന്നിരിക്കുന്നത്. അതായത് 6..5 ശതമാനം ആണ് പെട്രോള്‍ വില്‍പനയില്‍ ഇടിവ് സംഭവിച്ചിരിക്കുന്നത്.

അതേസമയം ഡീസലിന്റെ ഉപയോഗം പെട്രോളിനെ അപേക്ഷിച്ച് പിന്നെയും കുറവാണ്. 8.55 ശതമാനം ആണ് ഡീസലിന്റെ ഉപഭോഗം ഫെബ്രുവരി മാസത്തില്‍ കുറവ് കാണിക്കുന്നത്. ഈ മാറ്റം വിറ്റതാകട്ടെ 6.55 ദശലക്ഷം ടണ്‍ ഡീസലാണ്. പാചകവാതകത്തിന്റെ വില്‍പന ഫെബ്രുവരില്‍ ഉയര്‍ന്നു. 7.6 ശതമാനം ആണ് എല്‍പിജി വില്‍പനയിലെ ഉയര്‍ച്ച എന്നും പെട്രോളിയം പ്ലാനിംഗ് ആന്‍ഡ് അനാലിസിസ് സെല്‍ റിപ്പോര്‍ട്ടില്‍ ചൂണ്ടിക്കാട്ടുന്നു.