വിപണിയില്‍ പ്രതീക്ഷ മങ്ങുന്നു; ഭക്ഷ്യവില കുതിച്ചു, പണപ്പെരുപ്പ നിരക്ക് വര്‍ധിച്ചു

ദില്ലി: വിപണിയെ ചലിപ്പിക്കാനുള്ള ആര്‍ബിയുടെ ശ്രമങ്ങള്‍ പാഴാകുമോ എന്ന് ആശങ്ക. ഭക്ഷ്യവില കുതിക്കുകയും മൊത്ത വില സൂചിക ഉയരുകയും ചെയ്തു. ഇതാകട്ടെ, വ്യക്തികളുടെയും കുടുംബങ്ങളുടെയും ബജറ്റ് താളം തെറ്റിക്കും. രാജ്യം പണപ്പെരുപ്പത്തിന്റെ സമ്മര്‍ദ്ദത്തിലേക്ക് നീങ്ങുന്നു എന്ന സൂചനയാണ് വിപണിയില്‍ നിന്ന് ലഭിക്കുന്നത്. ഭക്ഷ്യവിലയിലും നിര്‍മാണ വസ്തുക്കളുടെ വിലയിലും വര്‍ധനവ്് പ്രകടമായി. ഗ്രാമങ്ങളെ ചലിപ്പിക്കാന്‍ ബാങ്ക് വായ്പകളിലൂടെ ആര്‍ബിഐ ശ്രമം നടത്തിവരികയാണ്. എന്നാല്‍ എല്ലാ ശ്രമങ്ങളും തകിടം മറിയാനുള്ള സാധ്യതയാണ് തെളിയുന്നത്.

പലിശ നിരക്ക് കുറച്ച് വിപണിയിലേക്ക് കൂടുതല്‍ പണമെത്തിക്കാമെന്നാണ് ആര്‍ബിഐ കരുതുന്നത്. ജീവനക്കാര്‍ക്ക് ആനുകൂല്യങ്ങള്‍ പ്രഖ്യാപിച്ച് കേന്ദ്ര സര്‍ക്കാരും ശ്രമം ഊര്‍ജിതമാക്കിയിട്ടുണ്ട്. ഇതിന്റെ ഭാഗമാണ് കഴിഞ്ഞദിവസം കേന്ദ്ര ധനമന്ത്രി നിര്‍മല സീതാരാമന്‍ പ്രഖ്യാപിച്ച എല്‍ടിസി വൗച്ചറും ഉല്‍സവകാല പ്രഖ്യാപനങ്ങളും. പക്ഷേ, വിപണിയില്‍ വില ഉയരുന്നത് ഉപഭോക്താക്കളെ പിന്നോട്ടടിപ്പിക്കും. ഇതോടെ സര്‍ക്കാരും കേന്ദ്രബാങ്കും കണക്കു കൂട്ടിയ ലക്ഷ്യം കൈവരിക്കാന്‍ സാധിച്ചെന്ന് വരില്ല.

സെപ്തംബര്‍ മാസത്തില്‍ ഭക്ഷ്യ ഉല്‍പ്പന്ന വിലക്കയറ്റം 8.17 ശതമാനമാണ്. ആഗസ്റ്റില്‍ ഇത് 3.84 ശതമാനം ആയിരുന്നു. ഭക്ഷ്യ വസ്തുക്കളുടെ വില കയറ്റം കാരണം മൊത്തവില സൂചികയിലും വര്‍ധനവ് പ്രകടമായി. മൊത്തവില അടിസ്ഥാനമാക്കിയുള്ള പണപ്പെരുപ്പ നിരക്ക് 1.32 ശതമാനമായി വര്‍ധിച്ചു. കഴിഞ്ഞ ആഗസ്റ്റില്‍ ഇത് 0.16 ശതമാനം ആയിരുന്നു.

നിര്‍മാണ വസ്തുക്കളുടെ വില വര്‍ധന കഴിഞ്ഞ ആഗസ്റ്റില്‍ 1.27 ശതമാനം ആയിരുന്നു. സെപ്തംബറില്‍ 1.61 ആയി വര്‍ധിച്ചു. ഇതെല്ലാം രാജ്യം പണപ്പെരുപ്പത്തിലേക്ക് നീങ്ങുകയാണോ എന്ന തോന്നലുണ്ടാക്കിയിട്ടുണ്ട്. അങ്ങനെ സംഭവിച്ചാല്‍ പണച്ചുരുക്കത്തിനുള്ള നടപടികള്‍ക്ക് സര്‍ക്കാര്‍ നിര്‍ബന്ധിതമാകും. വിപണയില്‍ കൂടുതല്‍ പണമത്തിക്കാനുള്ള നീക്കത്തില്‍ നിന്ന ആര്‍ബിഐ പിന്‍മാറും.