വിപ്രോ ബംഗളൂരു മാരത്തൺ ഇന്ന്; നഗരത്തിൽ ഗതാഗത നിയന്ത്രണം, യാത്രക്കാർ അറിയേണ്ടതെല്ലാം ഇതാ

വിപ്രോ ബംഗളൂരു മാരത്തൺ പ്രമാണിച്ച് ഇന്ന് രാവിലെ സെൻട്രൽ ബംഗളൂരുവിൽ ഗതാഗത നിയന്ത്രണം ഏർപ്പെടുത്തും. ശ്രീ കണ്ഠീരവ സ്റ്റേഡിയത്തിൽ നിന്നാണ് മാരത്തൺ ആരംഭിക്കുന്നതും അവസാനിക്കുന്നതും. എംജി റോഡ്, കബ്ബൺ പാർക്ക്, അൾസൂർ തടാകം എന്നീ പ്രധാന വഴികളിലൂടെയാണ് ഓട്ടം കടന്നുപോകുന്നത്. രാവിലെ 4 മണി മുതൽ 11 മണി വരെ ഗതാഗതം ഭാഗികമായി തടയാനാണ് പൊലീസിന്റെ തീരുമാനം. സിബിഡി മേഖലയിലെ പ്രധാന റോഡുകളിൽ വഴിതിരിച്ചുവിടൽ ഉള്ളതിനാൽ യാത്രക്കാർ യാത്ര മുൻകൂട്ടി പ്ലാൻ ചെയ്യേണ്ടതുണ്ട്.

പുലർച്ചെ 3:50-ഓടെ ഫുൾ മാരത്തൺ ഫ്ലാഗ് ഓഫ് ചെയ്യും. സൂര്യോദയത്തിന് മുൻപ് തന്നെ പല ഘട്ടങ്ങളിലായി മത്സരം തുടരും. ഹാഫ് മാരത്തൺ രാവിലെ 6:05-നും 10 കെ മാരത്തൺ 7:30-നും ആരംഭിക്കും. 45,000-ത്തിലധികം ഓട്ടക്കാർ പങ്കെടുക്കുമെന്നാണ് സംഘാടകർ പ്രതീക്ഷിക്കുന്നത്. ഇത് നഗരത്തിൽ തിരക്ക് കൂട്ടാൻ സാധ്യതയുണ്ട്. കബ്ബൺ റോഡ്, എംജി റോഡ്, അൾസൂർ തടാകം എന്നിവ ചുറ്റി തിരികെ സ്റ്റേഡിയത്തിൽ എത്തുന്ന രീതിയിലാണ് റൂട്ട് ക്രമീകരിച്ചിരിക്കുന്നത്. പുലർച്ചെ ഗതാഗതം സുഗമമായിരിക്കുമെങ്കിലും സമയം വൈകുംതോറും സാധാരണ വാഹനങ്ങൾ കൂടി എത്തുന്നതോടെ ഗതാഗതക്കുരുക്ക് രൂക്ഷമായേക്കാം.

വിപ്രോ ബംഗളൂരു മാരത്തൺ: റോഡ് അടച്ചിടലും പകരം വഴികളും

എംജി റോഡ്, കബ്ബൺ റോഡ്, കസ്തൂർബ റോഡ്, ഹലസൂരു ലേക്ക് സൈഡ് എന്നിവിടങ്ങളിൽ സമയാസമയങ്ങളിൽ ഗതാഗതം തടയും. ബാരിക്കേഡുകളുള്ള ഇടുങ്ങിയ റോഡുകൾ ഒഴിവാക്കി സമീപത്തെ പ്രധാന റോഡുകൾ ഉപയോഗിക്കുക. ഓഫീസുകളിലേക്ക് പോകുന്നവർ കബ്ബൺ റോഡിന് പകരം ക്വീൻസ് റോഡോ മില്ലർ റോഡോ തിരഞ്ഞെടുക്കുന്നതാവും നല്ലത്. ഇന്ദിരാനഗർ ഭാഗത്ത് നിന്ന് വരുന്നവർക്ക് അൾസൂരിലെ തിരക്ക് ഒഴിവാക്കാൻ ഓൾഡ് മദ്രാസ് റോഡും മർഫി റോഡും ഉപയോഗിക്കാം. കണ്ഠീരവ സ്റ്റേഡിയത്തിന് ചുറ്റും കബ്ബൺ പാർക്കിലും പാർക്കിങ് നിയന്ത്രണമുള്ളതിനാൽ യാത്രയ്ക്കായി കൂടുതൽ സമയം മാറ്റിവെക്കുക.

ഗതാഗത നിയന്ത്രണമുള്ള റോഡുകൾ	പകരം ഉപയോഗിക്കാവുന്ന വഴികൾ
എംജി റോഡും ബ്രിഗേഡ്-ട്രിനിറ്റി സ്ട്രെച്ചും	റെസിഡൻസി റോഡ്, ഓൾഡ് മദ്രാസ് റോഡ്
കബ്ബൺ റോഡും കാമരാജ് റോഡും	ക്വീൻസ് റോഡ്, മില്ലർ റോഡ്
അൾസൂർ തടാകം-ഹലസൂരു റോഡ്	മർഫി റോഡ്, ഓൾഡ് മദ്രാസ് റോഡ്
കസ്തൂർബ റോഡ്-കബ്ബൺ പാർക്ക് ലൂപ്പ്	വിട്ടൽ മല്യ റോഡ്, സെന്റ് മാർക്ക്സ് റോഡ്

വിപ്രോ ബംഗളൂരു മാരത്തൺ: ബിഎംടിസി റൂട്ട് മാറ്റങ്ങളും വിമാനത്താവള യാത്രക്കാർക്കുള്ള നിർദേശങ്ങളും

മാരത്തൺ സമയത്ത് സെൻട്രൽ ബിസിനസ് ഡിസ്ട്രിക്റ്റ് (സിബിഡി) റൂട്ടുകളിൽ ബിഎംടിസി ബസുകൾക്ക് മാറ്റമുണ്ടാകും. ബസ് കയറുന്നതിന് മുൻപ് ബിഎംടിസിയുടെ ഔദ്യോഗിക 'X' (ട്വിറ്റർ) ഹാൻഡിൽ വഴി റൂട്ട് മാറ്റങ്ങൾ യാത്രക്കാർ ഉറപ്പുവരുത്തേണ്ടതാണ്. വിമാനത്താവളത്തിലേക്ക് പോകുന്നവർ കൂടുതൽ സമയം കൈയിൽ കരുതണം. സിബിഡിക്ക് പുറത്തുള്ള ബസ് സ്റ്റോപ്പുകളിൽ നിന്ന് എയർപോർട്ട് ബസുകൾ കയറുന്നതാകും ഉചിതം. ബാരിക്കേഡ് കെട്ടിയ മേഖലകളിൽ നിന്നാണ് നിങ്ങളെ പിക്ക് ചെയ്യേണ്ടതെങ്കിൽ, ഫ്ലൈറ്റ് മിസ്സാകാതിരിക്കാൻ നേരത്തെ തന്നെ ഇറങ്ങുക.

വിപ്രോ ബംഗളൂരു മാരത്തൺ: റോഡുകൾ എപ്പോൾ തുറക്കും? ലൈവ് അപ്ഡേറ്റുകൾ

രാവിലെ മുതൽ ഉച്ചയ്ക്ക് മുൻപ് വരെ റോഡുകളിൽ നിയന്ത്രണമുണ്ടാകുമെന്നും ഘട്ടം ഘട്ടമായി റോഡുകൾ തുറക്കുമെന്നും ബംഗളൂരു ട്രാഫിക് പൊലീസ് അറിയിച്ചു. ഉച്ചയോടെ ഗതാഗതം സാധാരണ നിലയിലാകുമെന്നാണ് പ്രതീക്ഷിക്കുന്നത്. എങ്കിലും മത്സരങ്ങൾ അവസാനിക്കുന്ന ചില ഭാഗങ്ങളിൽ തിരക്ക് തുടർന്നേക്കാം. റോഡുകൾ തുറക്കുന്നതിനെക്കുറിച്ചും മറ്റ് വിവരങ്ങൾക്കുമായി ബംഗളൂരു ട്രാഫിക് പൊലീസിന്റെ സോഷ്യൽ മീഡിയ പേജുകൾ ശ്രദ്ധിക്കുക. ആശയക്കുഴപ്പമുണ്ടെങ്കിൽ, മെട്രോ സേവനങ്ങളോ ടാക്സിയോ ഉപയോഗിച്ച് മാരത്തൺ റൂട്ടിന് പുറത്തുള്ള റോഡുകളിലേക്ക് യാത്ര ചെയ്യാം.

വിപ്രോ ബംഗളൂരു മാരത്തൺ: യാത്രക്കാർ ശ്രദ്ധിക്കേണ്ട കാര്യങ്ങൾ

റൂട്ടിന് കുറുകെ പലതവണ ചെറിയ യാത്രകൾ നടത്തുന്നതിന് പകരം നേരിട്ടുള്ള ഒറ്റ യാത്രകൾ പ്ലാൻ ചെയ്യുക. നിങ്ങളെ പിക്ക് ചെയ്യാൻ വരുന്നവരുമായി ലൈവ് ലൊക്കേഷൻ പങ്കുവെക്കുക. ബാരിക്കേഡ് കെട്ടിയ മേഖലകളിൽ നിന്ന് മാറി എളുപ്പം തിരിച്ചറിയാൻ കഴിയുന്ന സ്ഥലങ്ങൾ ലൊക്കേഷനായി നൽകുക. ഡിജിറ്റൽ പേയ്‌മെന്റുകൾക്കൊപ്പം അത്യാവശ്യത്തിന് കയ്യിൽ ചെറിയ തുക കാഷായും കരുതുക. ക്യാബ് ഓപ്പറേറ്റർമാരുടെ ഹെൽപ്പ് ലൈൻ നമ്പറുകൾ സേവ് ചെയ്യുക. ആളുകൾ പിരിഞ്ഞുപോകുന്ന സമയത്ത് റോഡുകളിലെ വൺ-വേ മാറ്റങ്ങൾ ശ്രദ്ധിക്കുക.