YEAR ENDER 2025: ഈ വർഷം ഏറ്റവുമധികം കളക്ഷൻ നേടിയ 10 ഇന്ത്യൻ സിനിമകൾ; ഒന്നാം സ്ഥാനം ഈ ജയറാം ചിത്രത്തിന്

2025-ൽ വേറിട്ട ഒട്ടനവധി സിനിമകളാണ് ഇന്ത്യയിൽ റിലീസ് ചെയ്തത്. ഭാഷാഭേദമന്യേ ബോക്സ് ഓഫീസിൽ നിരവധി സിനിമകൾ വിജയം കൈവരിച്ചു. മലയാളം, തമിഴ്, കന്നട, തെലു​ഗു, ഹിന്ദി ഭാഷകളിലായി ബി​ഗ് ബഡ്ജറ്റ് ചിത്രങ്ങളും ചെറിയ ബഡ്ജറ്റിൽ എത്തിയ ചിത്രങ്ങളും ഒരുപോലെ ഇത്തവണ ശ്രദ്ധ നേടി. 2025 അവസാനിക്കാറാവുമ്പോൾ ഈ വർഷത്തെ ഏറ്റവും കൂടുതൽ കളക്ഷൻ നേടിയ മികച്ച 10 ഇന്ത്യൻ സിനിമകൾ ഏതെല്ലാമെന്ന് നോക്കിയാലോ?

1. കാന്താര: എ ലെജൻഡ് - ചാപ്റ്റർ 1

ഋഷഭ് ഷെട്ടിയുടെ കാന്താര: എ ലെജൻഡ് - ചാപ്റ്റർ 1 എന്ന കന്നട ചിത്രമാണ് ഈ വർഷം ഏറ്റവും കൂടുതൽ കളക്ഷൻ നേടിയത്. വേൾഡ് വൈഡ് കണക്കുകൾ പ്രകാരം 853.4 കോടി രൂപയാണ് ചിത്രം സ്വന്തമാക്കിയത്. അതായത് ഇന്ത്യയിൽ മാത്രം 622.5 കോടി രൂപ കളക്ഷൻ നേടി. 130 കോടി ബഡ്ജറ്റിൽ നിർമ്മിച്ച ഈ ചിത്രം ലോകശ്രദ്ധ നേടി. ചിത്രത്തിൽ ഋഷഭ് ഷെട്ടിക്കൊപ്പം രു​ഗ്മിണി വസന്ത്, ജയറാം തുടങ്ങിയ താരങ്ങളും അണിനിരന്നു.

2. ഛാവ

വിക്കി കൗശൽ, അക്ഷയ് ഖന്ന, രാഷ്മിക മന്ദാന എന്നിവർ പ്രധാന കഥാപാത്രങ്ങളായി അഭിനയിച്ച ചിത്രമാണ് ഛാവ. മറാത്ത സാമ്രാജ്യത്തിന്റെ പശ്ചാത്തലത്തിൽ ഒരുക്കിയ ഈ ചിത്രം ഔറംഗസേബിന്റെ സൈന്യങ്ങൾക്കെതിരായ സാംബാജി മഹാരാജിന്റെ ചെറുത്തുനിൽപ്പിനെ കുറിച്ച് ചർച്ച ചെയ്യുന്നു. വേൾഡ് വൈഡ് കണക്കുകൾ പ്രകാരം 808.7 കോടി രൂപ കളക്ഷൻ നേടി. അതിനാൽ 2025ലെ ഏറ്റവും കൂടുതൽ കളക്ഷൻ നേടിയ രണ്ടാമത്തെ ചിത്രമാണ് ഛാവ.

3. സയാര

മോഹിത് സൂരി സംവിധാനം ചെയ്ത റൊമാന്റിക് ഡ്രാമയാണ് സയാര. 50 കോടി രൂപയിൽ നിർമ്മിച്ച ചിത്രം ആഗോളതലത്തിൽ 575.8 കോടി രൂപ നേടി. അഹാൻ പാണ്ഡെയും അനീത് പദ്ദയും അഭിനയിച്ച ചിത്രത്തിന് വൻ സ്വീകാര്യത ലഭിച്ചു.

4. കൂലി

ലോകേഷ് കനകരാജിന്റെ സംവിധാനത്തിൽ സൂപ്പർസ്റ്റാർ രജനികാന്ത് നായകനായി എത്തിയ കൂലി എന്ന തമിഴ് ചിത്രം ബോക്സ് ഓഫീസിൽ വലിയ വിജയമായിരുന്നില്ല. എന്നിരുന്നാലും 350 കോടി രൂപയുടെ ബഡ്ജറ്റിൽ നിർമ്മിച്ച ചിത്രം 516.7 കോടി രൂപ കളക്ഷൻ നേടി. നാഗാർജുന, സൗബിൻ ഷാഹിർ, സത്യരാജ് തുടങ്ങി വലിയ താരനിരയിൽ വന്ന ബി​ഗ് ബഡ്ജറ്റ് ചിത്രമായിരുന്നു കൂലി.

5. വാർ 2

ഋത്വിക് റോഷനും ജൂനിയർ എൻ‌ടി‌ആറും ആദ്യമായി ഒന്നിച്ച ഹിന്ദി ചിത്രമാണ് വാർ 2. വലിയ പ്രതീക്ഷയോടെ റിലീസ് ചെയ്തിട്ടും ചിത്രം പരാജയപ്പെട്ടു. 400 കോടി രൂപ ബഡ്ജറ്റിൽ നിർമ്മിച്ച ഈ ചിത്രം ആ​ഗോള തലത്തിൽ 360.7 കോടി രൂപ മാത്രമാണ് നേടിയത്.

6. മഹാവതാർ നരസിംഹ

40 കോടി രൂപ ബഡ്ജറ്റിൽ നിർമ്മിച്ച ആനിമേറ്റഡ് ഇതിഹാസ ചിത്രമാണ് മഹാവതാർ നരസിംഹ. എന്നാൽ ആഗോളതലത്തിൽ 326.1 കോടി രൂപ ചിത്രം നേടി.

7. ലോകാ ചാപ്റ്റർ വൺ: ചന്ദ്ര

ഡൊമിനിക് അരുൺ സംവിധാനം ചെയ്ത മലയാളം ചിത്രമായ ലോകാ ചാപ്റ്റർ വൺ: ചന്ദ്ര ഈ വർഷത്തെ വമ്പൻ ഹിറ്റായി മാറി. ഇതിനോടകം ചിത്രം ലോകമെമ്പാടുമായി 302.1 കോടി രൂപ നേടി. കല്യാണി പ്രിയദർശൻ, നസ്ലെൻ എന്നിവർ പ്രധാന വേഷങ്ങളിൽ എത്തിയ ലോക മലയാള സിനിമയിലെ നാഴികക്കല്ലായി മാറി.

8. ഒജി

പവൻ കല്യാൺ നായകനായി എത്തിയ ഗ്യാങ്സ്റ്റർ ഡ്രാമയാണ് ഒജി. പവൻ കല്യാണിൻ്റെ ഒരു കം ബാക്ക് ചിത്രം എന്ന നിലയിൽ ഒജി ഏറെ ശ്രദ്ധ നേടി. മാത്രമല്ല ആ​ഗോള തലത്തിൽ ചിത്രം 298.1 കോടി രൂപ വരുമാനം നേടി.

9. ഹൗസ്ഫുൾ 5

ഹിന്ദിയിലെ കോമഡി ചിത്രമായ ഹൗസ്ഫുൾ 5 കാര്യമായ വിജയം കൈവരിച്ചില്ല. അക്ഷയ് കുമാർ, അഭിഷേക് ബച്ചൻ, നാനാ പടേക്കർ, ജാക്കി ഷ്രോഫ് തുടങ്ങിയ താരങ്ങൾ അഭിനയിച്ച ചിത്രം 292.5 കോടി രൂപയാണ് കളക്ഷൻ നേടിയത്.

10. L2: എമ്പുരാൻ

പൃഥ്വിരാജ് സുകുമാരൻ സംവിധാനം ചെയ്ത് മോഹൻലാൽ അഭിനയിച്ച എമ്പുരാൻ ഈ ലിസ്റ്റിൽ പത്താം സ്ഥാനത്ത് ഉണ്ട്. ചിത്രം ചർച്ച ചെയ്ത വിഷയം മൂലം ഇന്ത്യയിലുടനീളം വിവാദം സൃഷ്ടിച്ചെങ്കിലും എമ്പുരാൻ ഹിറ്റായി മാറി. ആഗോളതലത്തിൽ 268.1 കോടി രൂപ കളക്ഷൻ നേടി