ബെംഗളൂരു നഗരത്തിന് വേഗം കൂടും, നമ്മ മെട്രോ ഇനി ഓരോ 10 മിനിട്ടിലും, അറിയാം വിശേഷങ്ങൾ

ബെംഗളൂരു നഗരത്തിലെ ഏറ്റവും വലിയ തലവേദന ട്രാഫിക് ബ്ലോക്കുകളാണ്. മണിക്കൂറുകളാണ് രാവിലേയും വൈകുന്നേരവും ബ്രോക്കുകളിൽ പെട്ടുപോയാൽ നഷ്ടപ്പെടുന്നത്. നമ്മ മെട്രോയുടെ വരവ് ഈ പ്രശ്നത്തിന് ഒരുപരിധിവരെ പരിഹാരം കണ്ടെത്തിയെങ്കിലും ഇപ്പോഴും പൂർണ്ണമായിട്ടില്ല. എന്നാൽ മെട്രോ യാത്രക്കാരെ സംബന്ധിച്ച് സന്തോഷം നൽകുന്ന ഒരുവാർത്തയാണ് ഇപ്പോൾ പുറത്ത് വരുന്നത്. യെല്ലോ ലൈനിലെ കാത്തിരിപ്പ് സമയം കുറയാൻ പോവുകയാണ്.

10 മിനുട്ടിൽ ട്രെയിൻ എത്തും

ബെംഗളൂരു മെട്രോയുടെ യെല്ലോ ലൈനിലൂടെ ഇനി ഓരോ 10 മിനുട്ടിലും അടുത്ത ട്രെയിനെത്തും. ജനുവരി 15 മുതല്‍ ഈ ലൈനിലൂടെ ഏഴാമത്തെ ട്രെയിനും സര്‍വീസ് ആരംഭിച്ചു. ഇതോടെയാണ് കാത്തിരിപ്പ് സമയം പത്ത് മിനുട്ടായി കുറഞ്ഞതെന്ന് ബെംഗളൂരു മെട്രോ റെയില്‍ കോര്‍പ്പറേഷന്‍ ലിമിറ്റഡ് (ബിഎംആര്‍സിഎല്‍) അറിയിച്ചു. നേരത്തെ 13 മിനിറ്റ് ഇടവേളയിലായിരുന്നു യെല്ലോ ലൈന്‍ വഴിയുള്ള ട്രെയിന്‍ ഗതാഗതം.

തിങ്കൾ മുതൽ ശനി വരെയുള്ള പീക്ക്-അവർ സർവീസുകൾ ഓരോ 10 മിനിറ്റിലും സർവീസ് നടത്തുമെന്നും ഞായറാഴ്ചകളിൽ യാത്രാ സമയം 15 മിനിറ്റിൽ നിന്ന് 14 മിനിറ്റായി കുറയ്ക്കുമെന്നും ബിഎംആർസിഎൽ അറിയിച്ചു. ആർവി റോഡ്, ബൊമ്മസാന്ദ്ര എന്നീ ടെർമിനൽ സ്റ്റേഷനുകളിൽ നിന്നുള്ള ആദ്യ, അവസാന ട്രെയിനുകളുടെ സമയക്രമത്തിൽ മാറ്റമുണ്ടാകില്ല.

ശരാശരി 1 ലക്ഷം യാത്രക്കാർ

കഴിഞ്ഞ വർഷം ഓഗസ്റ്റ് 11 ന് തുറന്ന യെല്ലോ ലൈൻ തെക്കൻ ബെംഗളൂരുവിലെ ഇലക്ട്രോണിക്സ് സിറ്റിയുടെ ടെക് ഹബ്ബിനെ ബന്ധിപ്പിക്കുന്നു. 19.15 കിലോമീറ്ററാണ് ആകെ നീളം. ആഴ്ചയിൽ ശരാശരി ഒരു ലക്ഷം യാത്രക്കാരാണ് യാത്ര ചെയ്യുന്നത്. ഉടൻ തന്നെ എട്ടാമത്തെ യെല്ലോ ലൈൻ ട്രെയിനും നമ്മ മെട്രോയ്ക്ക് ലഭിക്കും. കൊൽക്കത്ത ആസ്ഥാനമായുള്ള ടിറ്റാഗഡ് റെയിൽ സിസ്റ്റംസ് ലിമിറ്റഡ് (ടിആർഎസ്എൽ) ജനുവരി 8 ന് ആറ് കോച്ചുകളുള്ള ട്രെയിൻസെറ്റ് അയച്ചു. 750 കിലോമീറ്റർ പരീക്ഷണ ഓട്ടത്തിന് ശേഷം, ഫെബ്രുവരി പകുതിയോടെ ട്രെയിൻ സർവീസ് ആരംഭിക്കാൻ സാധ്യതയുണ്ട്. ഇത് പീക്ക്-ഹവർ ഫ്രീക്വൻസി 10 മിനിറ്റിൽ താഴെയായി കുറയ്ക്കും. പുതിയ ട്രെയിനുകൾ വരുന്നത് തിരക്ക് കുറയ്ക്കുകയും ആയിരക്കണക്കിന് ദൈനംദിന യാത്രക്കാർക്ക് യാത്രാ സുഖം മെച്ചപ്പെടുത്തുകയും ചെയ്യുമെന്ന് പ്രതീക്ഷിക്കുന്നു.

അൺലിമിറ്റഡ് യാത്രാ പാസുകൾ

യാത്രാ പാസുകൾ ഡിജിറ്റൽ ടിക്കറ്റിംഗിലേക്കുള്ള നീക്കത്തിന്റെ ഭാഗമായി, ബാംഗ്ലൂർ മെട്രോ റെയിൽ കോർപ്പറേഷൻ ലിമിറ്റഡ് (ബിഎംആർസിഎൽ) ജനുവരി 15 മുതൽ 1, 3, 5 ദിവസത്തേക്ക് മൊബൈൽ അധിഷ്ഠിത ക്യുആർ കോഡ് അൺലിമിറ്റഡ് യാത്രാ പാസുകൾ ആരംഭിച്ചു. ഔദ്യോഗിക നമ്മ മെട്രോ ആപ്പ് വഴി ലഭ്യമായ ഈ പുതിയ പാസുകൾ, കോൺടാക്റ്റ്‌ലെസ് സ്മാർട്ട് കാർഡുകൾക്ക് മുമ്പ് ആവശ്യമായിരുന്ന 50 രൂപ റീഫണ്ടബിൾ സെക്യൂരിറ്റി ഡെപ്പോസിറ്റ് ഒഴിവാക്കുന്നു. പ്രവേശനത്തിനും പുറത്തുകടക്കലിനും ഓട്ടോമാറ്റിക് ഫെയർ കളക്ഷൻ ഗേറ്റുകളിൽ യാത്രക്കാർക്ക് അവരുടെ മൊബൈൽ ഫോണുകളിൽ ക്യുആർ കോഡ് സ്കാൻ ചെയ്യാൻ കഴിയും.

ഒരു ദിവസത്തെ മൊബൈൽ ക്യുആർ പാസിന്റെ വില 250 രൂപയാണ്, അതേസമയം മൂന്ന് ദിവസത്തെയും അഞ്ച് ദിവസത്തെയും പാസുകൾക്ക് യഥാക്രമം 550 രൂപയും 850 രൂപയുമാണ് വില. ഈ സംരംഭം ക്യൂകൾ കുറയ്ക്കാനും യാത്രക്കാരുടെ സൗകര്യം വർദ്ധിപ്പിക്കാനും സഹായിക്കുമെന്ന് ബിഎംആർസിഎൽ പറഞ്ഞു. സമയം ലാഭിക്കുകമാത്രമല്ല, സാമ്പത്തിക ലാഭം നേടാനും പുതിയ സംവിധാനത്തിലൂടെ കഴിയും.