1 കോടി രൂപ സമ്പാദ്യം എന്നത് യാഥാർത്ഥ്യമാക്കാം, ഇതാണ് നിക്ഷേപ പദ്ധതി, ഇന്ന് തന്നെ തുടങ്ങൂ...

ലഭിക്കുന്ന വരുമാനത്തിൽ നിന്നും ഒരു ഭാഗം നിക്ഷേപത്തിനായി മാറ്റിവയ്ക്കണമെന്ന് ആഗ്രഹിക്കുന്നവരാണ് എല്ലാവരും. ഭാവി ജീവിതത്തിൽ സാമ്പത്തിക സുരക്ഷിതത്വം നേടുക എന്നതാണ് നിക്ഷേപത്തിന്‍റെ പ്രാഥമികമായ ലക്ഷ്യം. എന്നാൽ ഏത് നിക്ഷേപ പദ്ധതി തിരഞ്ഞെടുക്കണമെന്ന കാര്യത്തിലാണ് എല്ലാവർക്കും ആശയക്കുഴപ്പമുള്ളത്. ഒറ്റത്തവണ നിക്ഷേപം നടത്താൻ സാധിക്കാത്തവർക്ക് മ്യൂച്വൽ ഫണ്ട് നിക്ഷേപമാണ് ഏറ്റവും അനുയോജ്യം.

എസ്ഐപിയുടെ നേട്ടം ചെറുതല്ല

സിസ്റ്റമാറ്റിക് ഇൻവെസ്റ്റ്‌മെൻ്റ് പ്ലാൻ അഥവാ എസ്ഐപി വഴി മ്യൂച്വൽ ഫണ്ടുകളിലെ നിക്ഷേപം ഭാവിയിൽ ഉയർന്ന തുക സമ്പാദിക്കാൻ നിക്ഷേപകനെ സഹായിക്കും. ചെറിയ തുക നിക്ഷേപിക്കാനുള്ള സ്വാതന്ത്ര്യം, സാമ്പത്തിക അച്ചടക്കം തുടങ്ങിയ ഗുണങ്ങലെല്ലാം എസ്ഐപി വാഗ്ധാനം ചെയ്യുകയും ചെയ്യുന്നു.

നിക്ഷേപകന് അവരുടെ വരുമാനം അല്ലെങ്കിൽ നിക്ഷേപ ശേഷി അനുസരിച്ച് എസ്ഐപി തുക കൂട്ടുകയോ കുറയ്ക്കുകയോ ചെയ്യാം. ഫണ്ട് ഹൗസിനെ അറിയിച്ച് സാമ്പത്തിക പ്രതിസന്ധിയുടെ സമയത്ത് എസ്ഐപി നിർത്താനും നിക്ഷേപകന് സാധിക്കും. എസ്ഐപി കോമ്പൗണ്ട് ( കൂട്ടുപലിശ) നൽകുന്നു. അതിനാൽ ദീർഘകാലത്തേക്ക് നിക്ഷേപത്തിൽ തുടരുകയാണെങ്കിൽ ഉയർന്ന തുക സമ്പാദിക്കാനും സാധിക്കും. ശരാശരി 12 ശതമാനം റിട്ടേണാണ് എസ്ഐപികൾ വാഗ്ധാനം ചെയ്യുന്നത്.

ലക്ഷപ്രഭു അല്ല കോടീശ്വരൻ

എസ്ഐപി നിക്ഷേപത്തിലൂടെ 1 കോടി രൂപ വരെ സമ്പാദിക്കാൻ എല്ലാവർക്കും കഴിയും. എന്നാൽ ദീർഘകാലത്തേക്ക് നിക്ഷേപം തുടരണമെന്ന് മാത്രം. എസ്ഐപി തുകയിൽ എത്ര വർധനവ് വരുത്തുന്നോ അത്രയും വേഗം നിക്ഷേപകന് കോടീശ്വരനാകാൻ സാധിക്കും.

5,000 രൂപയുടെ എസ്ഐപി

മ്യൂച്വൽ ഫണ്ടിൽ പ്രതിമാസം 5,000 രൂപ എസ്ഐപി വഴി നിക്ഷേപിക്കുകയാണെങ്കിൽ 26 വർഷത്തിനുള്ളിൽ 1 കോടി രൂപ സമ്പാദിക്കാൻ സാധിക്കും. 12 ശതമാനം വാർഷിക റിട്ടേൺ ലഭിക്കുമ്പോഴുള്ള കണക്കാണിത്.

26 വർഷം കൊണ്ട് ആകെ നിക്ഷേപിക്കുന്ന തുക 15,60,000 രൂപ രൂപയായിരിക്കും. എന്നാൽ മൂലധന നേട്ടം വഴി ഏകദേശം 91,95,560 രൂപ (ഏകദേശം 92 ലക്ഷം രൂപ) ലഭിക്കും. അതായത് നിക്ഷേപിക്കുന്ന തുകയും മൂലധന നേട്ടവും ചേരുമ്പോൾ ആകെ 1.07 കോടി രൂപ നേടാം.

10,000 രൂപയുടെ എസ്ഐപി

എസ്ഐപി വഴി ഒരു മ്യൂച്വൽ ഫണ്ടിൽ പ്രതിമാസം 10,000 രൂപ നിക്ഷേപിക്കുകയും നിക്ഷേപത്തിന് 12 ശതമാനം വരുമാനം ലഭിക്കുകയും ചെയ്താൽ 20 വർഷം കൊണ്ട് നിങ്ങൾക്ക് കോടീശ്വരനാകാം.

20 വർഷം കൊണ്ട് ആകെ നിക്ഷേപിക്കുന്ന തുക 24,00,000 രൂപയായിരിക്കും. എന്നാൽ കോമ്പൗണ്ടിംഗ് വഴി മൂലധന നേട്ടമായി 75,91,479 (75.91 ലക്ഷം) രൂപ നേടാം. അതായത് ആകെ ഏകദേശം 99,91,479 രൂപ.

15,000 രൂപ എസ്ഐപി

പ്രതിമാസം 15,000 രൂപ എസ്ഐപി വഴി നിക്ഷേപിക്കാൻ നിങ്ങൾക്ക് സാധിക്കുമെങ്കിൽ വെറും 17 വർഷം കൊണ്ട് 1 കോടി രൂപ സമ്പാദിക്കാൻ സാധിക്കും. 17 വർഷത്തിനുള്ളിൽ, നിങ്ങളുടെ മൊത്തം നിക്ഷേപം 30,60,000 രൂപയും (30.60 ലക്ഷം രൂപ) മൂലധന നേട്ടം 69,58,812 രൂപയുമായിരിക്കും. രണ്ടും കൂടി ചേരുമ്പോൾ ലഭിക്കുന്ന തുക ഏകദേശം 1,00,18,812 രൂപ (ഒരു കോടിയിലധികം രൂപ) ആയിരിക്കും.

അറിയിപ്പ് :

മുകളിൽ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങൾ എടുക്കും മുൻപ് സാമ്പത്തിക വിദഗ്ധന്റെ നിർദേശം തേടാം. മ്യൂച്വൽ ഫണ്ടിലെ നിക്ഷേപം നഷ്ട സാധ്യതകൾക്ക് വിധേയമാണ്. സ്വന്തം റിസ്‌കിൽ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തിൽ സംഭവിക്കുന്ന ലാഭനഷ്ടങ്ങൾക്ക് ഗ്രേനിയം ഇൻഫർമേഷൻ ടെക്നോളജീസും ലേഖകനും ഉത്തരവാദികളല്ല.