1 ലക്ഷം 5 വർഷം കഴിഞ്ഞ് എത്രയാകും? പോസ്റ്റ് ഓഫീസിൽ നിക്ഷേപിക്കുന്നതിന് മുൻപ് ഇക്കാര്യം അറിഞ്ഞിരിക്കാം

സുരക്ഷിതമായ നിക്ഷേപങ്ങളിലൂടെ മികച്ച വരുമാനം ആഗ്രഹിക്കുന്നവർക്ക് എക്കാലത്തും പ്രിയപ്പെട്ടതാണ് പോസ്റ്റ് ഓഫീസ് പദ്ധതികൾ. കേന്ദ്ര സർക്കാർ നേരിട്ട് നടപ്പിലാക്കുന്ന പദ്ധതിയെന്ന നിലയിൽ ഇതിലെ നിക്ഷേപങ്ങൾക്ക് പൂർണ്ണ സുരക്ഷയുണ്ട്. പോസ്റ്റ് ഓഫീസിലെ ഏറ്റവും ജനപ്രിയമായ നിക്ഷേപങ്ങളിലൊന്നാണ് 'ടൈം ഡിപ്പോസിറ്റ്'. ബാങ്ക് ഫിക്സഡ് ഡിപ്പോസിറ്റുകൾക്ക് സമാനമായ ഈ പദ്ധതിയിൽ അഞ്ച് വർഷത്തേക്ക് ഒരു ലക്ഷം രൂപ നിക്ഷേപിച്ചാൽ ലഭിക്കുന്ന ലാഭത്തെക്കുറിച്ച് അറിയാം.

5 വർഷത്തെ ടൈം ഡിപ്പോസിറ്റ്: പലിശ നിരക്കും ലാഭവും

നിലവിൽ പോസ്റ്റ് ഓഫീസ് 5 വർഷത്തെ ടൈം ഡിപ്പോസിറ്റുകൾക്ക് 7.5 ശതമാനം വാർഷിക പലിശയാണ് നൽകുന്നത്. നിങ്ങൾ ഒരു ലക്ഷം രൂപ 5 വർഷത്തേക്ക് ഈ പദ്ധതിയിൽ നിക്ഷേപിക്കുകയാണെങ്കിൽ കാലാവധി പൂർത്തിയാകുമ്പോൾ ലഭിക്കുന്ന ഏകദേശ തുക താഴെ പറയുന്ന രീതിയിലായിരിക്കും.

നിക്ഷേപ തുക: 1,00,000 രൂപ

പലിശ നിരക്ക്: 7.5% (പ്രതിവർഷം)

കാലാവധി: 5 വർഷം

ലഭിക്കുന്ന ആകെ പലിശ: ഏകദേശം 44,995 രൂപ

കാലാവധി പൂർത്തിയാകുമ്പോൾ ലഭിക്കുന്ന തുക: ഏകദേശം 1,44,995 രൂപ

ഈ പദ്ധതിയുടെ പ്രധാന പ്രത്യേകതകൾ

5 വർഷത്തെ പോസ്റ്റ് ഓഫീസ് ടൈം ഡിപ്പോസിറ്റ് നിക്ഷേപങ്ങൾക്ക് ഇൻകം ടാക്സ് ആക്ട് സെക്ഷൻ 80C പ്രകാരം നികുതി ഇളവ് ലഭിക്കും (1.5 ലക്ഷം രൂപ വരെ). കേന്ദ്ര സർക്കാരിന്റെ പരമാധികാര ഗ്യാരണ്ടി ഉള്ളതിനാൽ നിക്ഷേപത്തിന് പൂർണ്ണ സുരക്ഷയുണ്ട്.

ആർക്കൊക്കെ അക്കൗണ്ട് തുടങ്ങാം?

പ്രായപൂർത്തിയായ ഏതൊരാൾക്കും ഒറ്റയ്ക്കോ അല്ലെങ്കിൽ മൂന്ന് പേർ ചേർന്ന് ജോയിന്റ് അക്കൗണ്ടായോ നിക്ഷേപം തുടങ്ങാം. പത്ത് വയസ്സിന് മുകളിലുള്ള കുട്ടികൾക്ക് സ്വന്തം പേരിലും അക്കൗണ്ട് എടുക്കാവുന്നതാണ്. വെറും 1000 രൂപ മുതൽ നിക്ഷേപം ആരംഭിക്കാം. നിക്ഷേപത്തിന് ഉയർന്ന പരിധിയില്ല. ഇന്ത്യയിലെ ഏത് പോസ്റ്റ് ഓഫീസിലേക്കും നിങ്ങളുടെ നിക്ഷേപ അക്കൗണ്ട് മാറ്റാൻ സാധിക്കും.

ബാങ്കുകളിലെ സ്ഥിര നിക്ഷേപങ്ങളെ അപേക്ഷിച്ച് പലപ്പോഴും മികച്ച പലിശ നിരക്കാണ് പോസ്റ്റ് ഓഫീസ് ടൈം ഡിപ്പോസിറ്റുകൾ വാഗ്ദാനം ചെയ്യുന്നത്. വിരമിച്ചവർക്കും റിസ്ക് എടുക്കാൻ താല്പര്യമില്ലാത്തവർക്കും ദീർഘകാലാടിസ്ഥാനത്തിൽ പണം വളർത്താൻ അനുയോജ്യമായ ഒരു മാർഗമാണിത്.