10,000 രൂപ എസ്‌ഐപിയിലൂടെ 34 ലക്ഷം നേടാം; ഇതാണ് എൽഐസിയുടെ കിടിലൻ ഫണ്ട്

മാര്‍ക്കറ്റ് സൈക്കിളുകളിലെ സ്ഥിരതയാണ് ഒരു ശരാശരി മ്യൂച്വല്‍ ഫണ്ടിനേയും മികച്ച പ്രകടനം കാഴ്ചവെക്കുന്നവയേയും വ്യത്യസ്തമാക്കുന്നത്. എല്‍ഐസി മ്യൂച്വല്‍ ഫണ്ട് സ്‌കീമുകളില്‍ ദീര്‍ഘകാല നിക്ഷേപങ്ങളില്‍ മികച്ച പ്രകടനം ഉറപ്പാക്കുന്ന ഫണ്ടാണ് എല്‍ഐസി എംഎഫ് ഇന്‍ഫ്രാസ്ട്രക്ചര്‍ ഫണ്ട് - ഡയറക്ട് പ്ലാന്‍ - ഗ്രോത്ത്. 

ലംപ്‌സം നിക്ഷേപകര്‍ക്കും എസ്‌ഐപി നിക്ഷേപകര്‍ക്കും 3 വര്‍ഷ, 5 വര്‍ഷ, 10 വര്‍ഷ കാലയളവുകളില്‍ മികച്ച ഫലം നല്‍കുവാന്‍ ഈ ഫണ്ടിന് സാധിക്കുന്നു. ഒറ്റത്തവണ നിക്ഷേപം നടത്തുന്നവര്‍ക്ക് ആകര്‍ഷകമായ ആദായമാണ് ലഭിച്ചിരിക്കുന്നത്. 1 ലക്ഷം രൂപയുടെ 3 വര്‍ഷത്തേക്കുള്ള ഒറ്റത്തവണ നിക്ഷേപത്തിന്റെ സിഎജിആര്‍ 28.26 ശതമാനവും നിക്ഷേപമവസാനിപ്പിക്കുമ്പോള്‍ ലഭിക്കുന്ന മൂല്യം 2.10 ലക്ഷം രൂപയുമാണ്. അതേ തുക അഞ്ച് വര്‍ഷത്തേക്ക് നിക്ഷേപിക്കുമ്പോള്‍ സിഎജിആര്‍ 27.06 ശതമാനവും നിക്ഷേപകാലയളവ് പൂര്‍ത്തിയാകുമ്പോഴുള്ള മൂല്യം 3.31 ലക്ഷം രൂപയുമാണ്. 10 വര്‍ഷത്തേക്ക് 1 ലക്ഷം രൂപയുടെ നിക്ഷേപത്തില്‍ സിഎജിആര്‍ 17.85 ശതമാനവും നിക്ഷേപകാലയളവ് പൂര്‍ത്തിയാകുമ്പോഴുള്ള മൂല്യം 5.14 ലക്ഷം രൂപയുമാണ്. 5 വര്‍ഷത്തെ നിക്ഷേപത്തില്‍ മൂന്നിരട്ടിയോളമാണ് നിക്ഷേപത്തുകയുടെ മൂല്യത്തില്‍ വര്‍ധനവുണ്ടായിരിക്കുന്നത്. ഇന്‍ഫ്രാസ്ട്രക്ചര്‍ അടിസ്ഥാനമാക്കിയുള്ള സ്‌കീമുകളില്‍ ദീര്‍ഘകാല നിക്ഷേപം നടത്തുമ്പോഴുള്ള നേട്ടമാണ് ഇത് വ്യക്തമാക്കുന്നത്. 

എസ്‌ഐപി നിക്ഷേപമാണെങ്കില്‍ 10,000 രൂപയുടെ 3 വര്‍ഷക്കാലത്തെ പ്രതിമാസ നിക്ഷേപത്തില്‍ സിഎജിആര്‍ 17.17 ശതമാനവും, നിക്ഷേപ മൂല്യം 4.64 ലക്ഷം രൂപയുമായിരിക്കും. 5 വര്‍ഷത്തേക്കാണ് ഈ നിക്ഷേപമെങ്കില്‍ സിഎജിആര്‍ 22.03 ശതമാനവും നിക്ഷേപമൂല്യം 10.36 ലക്ഷം രൂപയുമായി ഉയരും. 10 വര്‍ഷ നിക്ഷേപത്തില്‍ സിഎജിആര്‍ 19.86 ശതമാനവും നിക്ഷേപ മൂല്യം 34 ലക്ഷം രൂപയുമായിരിക്കും. ദീര്‍ഘകാലയളവിലേക്ക് അച്ചടക്കത്തോടെ നടത്തുന്ന നിക്ഷേപങ്ങള്‍ സ്ഥിരതയുള്ള നേട്ടത്തിന് കാരണമാകുമെന്ന് ഈ കണക്കുകള്‍ വ്യക്തമാക്കുന്നു.  

2013 ജനുവരി 02ന് ലോഞ്ച് ചെയ്യപ്പെട്ട ഈ ഫണ്ട് ഇതുവരെ 15.19 ശതമാനം ആദായം ഉറപ്പുനല്‍കുന്നുണ്ട്. 2025 ഡിസംബര്‍ 31 വരെയുള്ള കണക്കുകള്‍ പ്രകാരം 1003 കോടി രൂപയുടെ ആസ്തികളാണ് ഫണ്ട് കൈകാര്യം ചെയ്യുന്നത്. 0.83 ശതമാനമാണ് എക്‌സ്‌പെന്‍സ് റേഷ്യോ. 

ഇന്‍ഫ്രസ്ട്രക്ചര്‍ ഫോക്കസ്ഡ് ഫണ്ട് ആയതിനാല്‍ത്തന്നെ വെരി ഹൈ റിസ്‌ക് കാറ്റഗറിയിലാണ് ഈ ഫണ്ടിനെ ഉള്‍പ്പെടുത്തിയിരിക്കുന്നത്. ഉയര്‍ന്ന ആദായ സാധ്യത ഉള്ളതിനാല്‍ത്തന്നെ ഹ്രസ്വകാലയളവിലെ ചില അസ്ഥിരതകള്‍ക്കും നിക്ഷേപകര്‍ തയ്യാറായിരിക്കണം. റിസ്‌ക് മെട്രിക്‌സ് നോക്കുമ്പോള്‍, മീന്‍ റിട്ടേണ്‍ 27.53 ശതമാനവും, ഷാര്‍പ് റേഷ്യോ 1.06, സോര്‍ട്ടിനോ റേഷ്യോ 1.45 എന്നിങ്ങനെയാണ്. 

മുന്‍കാലങ്ങളില്‍ മികച്ച പ്രകടനം കാഴ്ചവച്ചു എന്നതുകൊണ്ട് ഭാവിയിലും അതേ രീതിയില്‍ ആദായം ലഭിക്കണമെന്നില്ലെന്ന് നിക്ഷേപകര്‍ മനസ്സിലാക്കണം. ഇന്‍ഫ്രാസ്ട്രക്ചര്‍ ഫണ്ടുകളായതില്‍ അണ്ടര്‍പെര്‍ഫോമന്‍സും ഉണ്ടായേക്കാം.