13 മുതല്‍ സ്വര്‍ണബോണ്ടില്‍ നിക്ഷേപിക്കാം

കേന്ദ്ര സര്‍ക്കാരും റിസര്‍വ് ബാങ്കും സെബിയും സംയുക്തമായി അവതരിപ്പിച്ച സ്വര്‍ണബോണ്ടുകളുടെ രണ്ടാംഘട്ട വില്‍പന 13 മുതല്‍ ആരംഭിക്കും. കുറഞ്ഞ നിക്ഷേപം ഒരു ഗ്രാമാണ്.

എന്‍എസ്ഇയുടെ കാഷ് വിഭാഗത്തിലാണ് സ്വര്‍ണ ബോണ്ട് വ്യാപാരം ആരംഭിക്കുക. സ്വര്‍ണബോണ്ട് വാങ്ങും മുന്‍പേ ഈ കാര്യങ്ങള്‍ അറിഞ്ഞിരിക്കണം.

സ്വര്‍ണബോണ്ട് പദ്ധതി

സ്വര്‍ണത്തിന്റെ അതേ മൂല്യത്തില്‍ ബോണ്ടുകള്‍ വാങ്ങാനും നിശ്ചിത പലിശ നേടാനും സാധിക്കുന്ന പദ്ധതിയാണിത്.

കാലാവധി

അഞ്ചു വര്‍ഷമാണ് സ്വര്‍ണ ബോണ്ടിന്റെ കാലാവധി. 2.75 ശതമാനമാണ് വാര്‍ഷിക പലിശനിരക്ക്.

ഓഹരികള്‍ പോലെ വില്‍ക്കാം

അധിക നടപടിക്രമങ്ങളില്ലാതെ എക്സ്ചേഞ്ച് വഴി വാങ്ങലും വില്‍ക്കലും സാധിക്കുന്നതിനാല്‍ സ്വര്‍ണ ബോണ്ടുകള്‍ കൂടുതല്‍ ആളുകളിലേക്ക് എത്തിപ്പെടും. ഓഹരികള്‍ വില്‍ക്കുന്നതുപോലെ എക്‌സ്‌ചേഞ്ചിലൂടെ സ്വതന്ത്രമായി സ്വര്‍ണബോണ്ടുകള്‍ നിക്ഷേപകര്‍ക്ക് വാങ്ങാനും വില്‍ക്കാനും സാധിക്കും.

തൂക്കം

ഒരു ഗ്രാം മുതല്‍ക്കുള്ള സ്വര്‍ണ ബോണ്ടുകള്‍ ഉപഭോക്താക്കള്‍ക്ക് വാങ്ങാം. കാലാവധി പൂര്‍ത്തിയാകുമ്പോള്‍ നിബന്ധനകള്‍ക്ക് വിധേയമായി ബോണ്ടുകള്‍ വിറ്റഴിക്കാം. കഴിഞ്ഞ ഒക്‌ടോബര്‍ 30നാണ് കേന്ദ്ര സര്‍ക്കാര്‍ സ്വര്‍ണ ബോണ്ട് പദ്ധതി അവതരിപ്പിച്ചത്.

റിട്ടേണ്‍

സ്വര്‍ണ വിലയുമായി ബന്ധിപ്പിച്ചാണ് നിക്ഷേപകര്‍ക്കു റിട്ടേണ്‍ ലഭിക്കുക. കൂടാതെ 2.75% വാര്‍ഷിക പലിശ അര്‍ധവാര്‍ഷികമായി ലഭിക്കുന്ന വിധമാണ് ബോണ്ട് പുറത്തിറക്കിയത്.