പാന്‍ കാര്‍ഡില്ലാതെ ഈ ഇടപാടുകള്‍ നടക്കില്ല

പലപ്പോഴും ഇടപാടുകള്‍ക്കായി ബാങ്കില്‍ എത്തിയതിന് ശേഷമായിരിക്കും പാന്‍ ഉണ്ടെങ്കിലേ കാര്യം നടക്കൂ എന്ന് മനസിലാവൂ. ഒരു പരിധിക്കപ്പുറം പണം വിനിമയം നടത്തണമെങ്കില്‍ പാന്‍ (പെര്‍മനന്റ് അക്കൗണ്ട് നമ്പര്‍) വേണമെന്ന് ഇന്‍കം ടാക്‌സ് നിയമങ്ങളുണ്ട്.

കെവൈസി(നോ യുവര്‍ കസ്റ്റമര്‍) അനുസരിച്ച വേണം ഉയര്‍ന്ന തുകയുടെ ഇടപാടുകള്‍ ബാങ്കുകള്‍ ശ്രദ്ധിക്കാന്‍.

പാന്‍ കാര്‍ഡ് എന്തൊക്കെ ഇടപാടുകള്‍ക്ക് വേണമെന്ന് നോക്കൂ.

ടൈം ഡിപ്പോസിറ്റ്

50,000 രൂപയില്‍ കൂടുതല്‍ ഒരു ബാങ്കിംഗ് കമ്പനിയില്‍ നിക്ഷേപിക്കുമ്പോള്‍ പാന്‍ നിര്‍ബന്ധമാണ്. കോപ്പറേറ്റീവ് ബാങ്കുകള്‍,പോസ്റ്റ് ഓഫീസ്,നിധി,എന്‍ബിഎഫ്‌സി കമ്പനികള്‍ എന്നിവയിലും പാന്‍ നിര്‍ബന്ധമാണ്.

പുതിയ അക്കൗണ്ട്

ബേസിക് സേവിംഗ്സ് അക്കൗണ്ടും ഒഴികെയുള്ള എല്ലാ അക്കൗണ്ടുകളും തുടങ്ങുന്നതിന് പാന്‍ നിര്‍ബന്ധമാണ്.കോപ്പറേറ്റീവ് ബാങ്കുകള്‍ക്കും ഇത് ബാധകമാണ്.

ബാങ്ക് ഡ്രാഫ്റ്റ്, പേ ഓര്‍ഡര്‍

50,000 രൂപയില്‍ കൂടുതല്‍ രൂപക്ക് ബാങ്ക് ഡ്രാഫ്റ്റും പേ ഓര്‍ഡറുമെടുക്കുമ്പോള്‍ പാന്‍ വേണം.

ഡിപോസിറ്റ്

50,000 രൂപയും അതിലധികവും ഒരു ദിവസം ഡിപോസിറ്റ് ചെയ്യുമ്പോള്‍ പാന്‍ വേണം.

കാഷ് കാര്‍ഡ്

50,000 രൂപക്കോ അതിന് മുകളിലോ തുകക്ക്് കാഷ് കാര്‍ഡുകളും പ്രീപെയ്ഡ് സാധനങ്ങളും വാങ്ങുകയാണെങ്കില്‍ പാന്‍കാര്‍ഡ് വേണം.

ക്രെഡിറ്റ് കാര്‍ഡ്

ബാങ്കുകളില്‍ നിന്നോ ധനകാര്യ സ്ഥാപനങ്ങളില്‍ നിന്നോ ക്രഡിറ്റ് കാര്‍ഡിന് അപേക്ഷിക്കുമ്പോള്‍ പാന്‍ കാര്‍ഡ് നിര്‍ബന്ധമാണ്.